Moderator.az xəbər verir ki, bu barədə Türkiyə prezidenti Rəcəb Tayyib Ərdoğan Astanada Şanxay Əməkdaşlıq Təşkilatının (ŞƏT) 24-cü sammitində çıxışı zamanı bəyan edib.

 

"Qəzzada 90 min yaralı fələstinlinin və 16 mindən çox həlak olan günahsız uşağın altında qaldığı xarabalıqlar mahiyyətcə öz legitimliyini itirmiş beynəlxalq sistemin qalıqlarıdır. Biz qaydalara əsaslanan beynəlxalq sistemin əsaslarının laxladığı dövrü yaşayırıq. 

 

Terrorçuluq, islamofobiya və ksenofobiya, qeyri-leqal miqrasiya, iqlim dəyişikliyi, energetika və ərzaq təhlükəsizliyi, tədarük zəncirlərində pozuntular geosiyasi təlatümləri gücləndirir.

 

Bunun son və ağrılı nümunəsi gözlərimiz qarşısında işğal edilmiş Fələstin ərazilərində, ilk növbədə Qəzzada baş verir", - Ərdoğan deyib.

 

O, xatırladıb ki, İsrail ordusunun Fələstin bölgəsinə çeşidsiz zərbələri nəticəsində təxminən 40 minə yaxın dinc sakin həlak olub.

 

Türkiyə prezidenti təcavüzü dayandırmaq  və Qəzza bögəsində daimi atəşkəsə nail olmaq üçün İsrailə təzyiqi gücləndirməyə çağlırış edib.

 

Dövlət başçısı qeyd edib ki, bütün mövcud maneələrə rəğmən, Türkiyə "sülhü, təhlükəsizliyi, sabitliyi və çiçəklənməni təmin edəcək səmərəli və inklyuziv beynəlxalq sistemin" qurulması üçün səylər göstərir.

 

"Bizim məqsədimiz regionumuzda və onun hüdudlarından kənarda başlıca məqsədləri insanlar və humanitar dəyərlər olan təşəbbüskar diplomatiya vasitəsilə sülh zolağı yaratmaqdır", - Türkiyə prezidenti deyib.

 

O, qeyd edib ki, on minlərlə vətəndaşı terror aksiyalarının qurbanı olan Türkiyə terrorçuluğun qanlı simasına yaxşı bələd olan ölkədir.

 

Onun sözlərinə görə, Türkiyə 40 il ərzində terrorçuluğun müxtəlif formaları ilə mübarizə aparıb. O, vurğulayıb ki, Türkiyə bu təzahürlərə qarşı bundan sonra da müqavimət göstərəcək.

 

Türkiyə lideri vurğulayıb ki, Ankaranın terrorçuluqla çoxillik mübarizə təcrübəsi bu təhlükəyə müqavimət göstərmək üçün beynəlxalq əməkdaşlığın vacibliyini sübut edir. "Bu mənada biz bundan sonra da Şanxay Əməkdaşlıq Təşkilatı ilə dialoqu möhkəmləndirməyə hazırıq", - Ərdoğan deyib.

 

O, qeyd edib ki, regional münaqişələr, siyasi sabitliyin olmaması və yoxsulluğun təhrik etdiyi beynəlxalq miqrasiya axınları "əsas həssaslıqlardan" biridir. Bununla əlaqədar olaraq o, xatırladıb ki, Türkiyədə Suriya qaçqınları daxil olmaqla 4 milyondan çox yerini dəyişən şəxslər var.

 

Dövlət başçısının sözlərinə görə, yaranmış vəziiyyətdə beynəlxalq birlik "məsuıiyyət hissi ilə hərəkət etməlidir". Onun sözlərinə görə, bu problemlərin həlli üçün göstərilən səylərin mühüm hissəsi humanitar yardımdır.

 

Ərdoğanın sözlərinə görə, 2013-cü ildə Ankaraya ŞƏT-lə dialoq tərəfdaşlığı statusunun verilməsi Türkiyənin Asiya ilə dialoqunun vacib kanallarından biri olub. 

 

"Türkiyə bundan sonra da Təşkilatın Asiyada çoxtərəflilik üzrə məqsədinə nail olmaqda öz tövhəsini verəcək, habelə bizim bir çox sahələrdə, ilk növbədə təhlükəsizlik, energetika və kommunikasiyalar sahələrində əməkdaşlığımızı davam etdirəcək", - Ərdoğan deyib.