“Öncə onu vurğulamaq gərəkdir ki, Güney Qafqazın üç ölkəsi olaraq bizim, yəni Azərbaycan,  Ermənistan və Gürcüstanın bir arada olması həyati vacib məsələdir. Çünki biz tarixən qonşuyuq. Biri zorla bizim qonşuluğumuza gətirilib onun üçün dövlət yaradılsa da, ərazisi tarixi Azərbaycan torpaqları hesabına 9 min kvadrat kilometrdən 29 min kvadrat kilometrədək artırılsa da, bu günədək elə həmin Moskvanın təhriki ilə xalq, dövlət olaraq bizə saysız-hesabsız zərbələr vursa da, biz həm də böyük güclərin, xüsusən də Rusiyanın bundan sonrakı təcavüzlərindən qorunmaq üçün bu Böyük Qafqaz Evində dinc yanaşı, sülh içində yaşamağı bacarmalıyıq”.

 

Klassik Azərbaycan Xalq Cəbhəsi Partiyasının sədri, istiqlalçı deputat  Mirmahmud Mirəlioğlu bu fikirləri Moderator.az-a açıqlamasında qonşu Ermənistan və  Gürcüstandakı son ictimai-siyasi prosesləri şərh edərkən  ifadə edib.

 

“İndi, ermənilərin bəzən ağlı çaşacaq, torpaq iddiasında olacaq və s. 2020-ci ilə qədər torpaqlarımızın 20 faizi əllərində olanda Ermənistan burada, az qala, hakimi mütləq idi; torpaqları işğal edirdi, soyqırım törədirdi. Təbii ki, arxalı körpək qurd basar. Arxasında Rusiya və Fransa var idi. Bu gün  yenə də hər iki ölkə Ermənistanı öz təsir dairəsində saxlamağa çalışır. Lakin hazırda xeyli fərqli situasiya yaranıb. Bu gün Rusiya Ukraynaya qarşı işğalçı savaş aparsa da, xeyli zəifləyib. Ona görə də fürsətdən yararlanaraq hər üç Güney Qafqaz dövləti birlik nümayiş etdirib Moskvanın təsirindən qurtulmaqla torpaqlarımızın həqiqətən işğaldan azad olunmasına nail ola bilərik. Ancaq, təəssüf ki, həmin birlik hələki baş tutmur. Bununla belə, Ermənistanda baş verənlər, yəni Rusiyadan uzaqlaşmağa aparan proseslər ümumilikdə Azərbaycanın da xeyrinədir. Bir sözlə, biz Güney Qafqaz ölkələri olaraq hamımız birlikdə həll edə bilməsək də, Rusiyanın nüfuz dairəsindən çıxmaq məsələsini ayrı-ayrılıqda həll etməliyik. Hesab edirəm ki, Ermənistanda bu keşiş Baqratın qatdığı xəmir hələ bir az su aparacaq və buna görə də xeyli vaxt alacaq. Baxmayaraq ki, Rusiya da tələsir, Ermənistan da mümkün qədər tez Qərblə inteqrasiya məsələlərini həll etmək istəyir”, - deyə davamında partiya sədri bildirib.

 

 

“Bu gün hər üç Güney Qafqaz ölkəsində, yəni  həm  Azərbaycan,  həm Ermənistan, həm də Gürcüstandakı bütün neqativ, sabitliyin pozulmasına yönəlmiş proseslərin arxasında neçə qüvvə durursa,  onun biri Rusiyadır. Və ya heç bir qüvvə durmursa, yenə də Rusiyadır. Təbii ki, hazırda baş verənlər Gürcüstan üçün mühüm rol oynayır. Və ölkədəki bugünkü olayların inkişaf etdiyi təqdirdə bu artıq geriyədönməz bir proses olacaq və Rusiya oradan da çıxmağa məcbur qalacaq. Ümumiyyətlə, Kreml son baş verənlərlə bağlı regiondan – Güney Qafqazdan uduzaraq çıxmalıdır. Amma bu prosesin mümkün qədər ziyansız yekunlaşmasına çalışmaq gərəkdir. Yəni nəzərə almaq lazımdır ki, bu şimal ayısı nə qədər təlim görsə də, sirkdə, döyüşlərdə və s. ondan istifadə olunsa da, onda ayıdan əlavə başqa bir iyrənc heyvanın da xisləti var. Ona görə də ondan qorunmaq, onunla qarşıdurmadan az itki ilə çıxmaq lazımdır”, - deyə siyasətçi vurğulayıb.

 

Sultan Laçın