Moderator.az xəbər verir ki, bu barədə "Bloomberg" nəşri yazıb.

 

XXI əsrin əvvəlindən Rusiyaya hakimlik edən Vladimir Putin Ukraynada münaqişə səbəbindən Qərbə qarşı nüvə ritorikası fonunda beşinci dəfə prezidentlik müddəti üçün and içib.

 

Əlini Rusiya Konstitusiyasının üzərinə qoyaraq Putin çərşənbə axşamı Kremlin imperiya əzəmətli qızıl Andreyev zalında and içib. 

 

"Rusiya vətəndaşları ölkənin tutduğu yolun düzgün olduğunu təsdiq edib.

 

Bunun məhz indi, ciddi sınaqlarla üzləşdiyimiz zaman böyük əhəmiyyəti var, - Putin məmurlara və yüksək vəzifəli şəxslərə müraciətlə bəyan edib. - Biz Qərb dövlətləri ilə dialoqdan imtina etmirik, lakin bu, bərabərhüquqlu, bir-birinin maraqlarına hörmət etmək əsasında ola bilər".

 

71 yaşlı Putin sovet diktatoru İosif Stalin dönəmindən bəri bütün sələflərindən daha artıq müddətdə Rusiyaya hakimlik edir, mart ayında ciddi prezidentlik nəzarətində keçən və ciddi rəqibləri olmayan seçkilərdə rekord 87 faiz səslə yeni altı illik müddətinə qədəm qoyur. 

 

Bundan başqa, Putin 2022-ci ildən Rusiyanın Avropada ikinci dünya savaşı dönəmindən bəri ən pis münaqişəyə gətirib çıxaran "xüsusi hərbi əməliyyatı"ndan qorunması üçün Ukraynaya on milyardlarla dollarlıq silah göndərən ABŞ və müttəfiqləri ilə getdikcə dərinləşən qarşıdurma siyasəti yürüdür.

 

Andiçmə mərasimi Putinin Qərb liderlərinin Rusiyanın "təxribatçı" adlandırdığı bəyanatlarına cavab olaraq taktiki nüvə silahından istifadə etməklə döyüş təlimlərinin keçirilməsi barədə sərəncamından sonra baş tutub.

 

Kremlin mətbuat katibi Dmirtri Peskov Ukraynaya qoşun yeridilməsi barədə bəyan edən Fransa prezidenti Emmanuel Makronu və Kiyevə Britaniya silahı ilə Rusiyaya zərbələr endirməyə icazə verən Böyük Britaniya XİN rəhbəri Devid Kemeronu ittiham edib. NATO Rusiyanın nüvə ritorikasını "təhlükəli və məsuliyyətsiz adlandıraraq pisləyib.

 

Putin Rusiyanı 2000-ci ildən idarə edir, 2008-2012-ci illərdə baş nazir postunda hakimiyyətini saxlamaq üçün Dmitri Medvedevi prezident kreslosunda əyləşdirib.

 

2020-ci ildə Konstitusiyada dəyişiklik edərək daha iki müddətə, potensial olaraq 83 yaşı tamam olacaq 2036-cı ilədək hakimiyyətdə qalmasına imkan yaradıb.

 

Bu arada isə münaqişə artıq üçüncü ildir ki, davam edir, Rusiya qoşunları tədricən Ukraynanın şərqində öz üstünlüyünü artırır. Kiyevin mühasirəyə alınmış qoşunları ABŞ-ın yeni hərbi yardımını gözləyir.

 

Ötən ay Konqres dəyəri 61 milyard olan çoxdan təxirə salınan yardım paketini qəbul edib. Rusiya Ukrayna ərazisinin təxminən 20 faizini işğal edib və cəbhə xəttini yarmağa can atır, USQ isə kadr qıtlığı və arsenallarının tükənməsi ilə üzləşib.

 

Rusiya iqtisadiyyatı misli görünməyən beynəlxalq sanksiyalara uyğunlaşıb, çünki hökumət üzünü Avropadan Çinə, Hindistana və Qlobal Cənuba doğru çevirib.

 

Gələn həftə andiçmə mərasimindən sonra Putin ilk xarici səfərində Çini ziyarət etməyi planlaşdırır, bununla da Çin lideri Si Tszinpinlə münasibətlərinin əhəmiyyətini vurğulayır. 

 

Çin Rusiyaya ABŞ və müttəfiqləri tərəfindən tətbiq edilən sanksiyalara tab gətirməkdə yardım edib və Putinə diplomatik dəstək göstərib, hərçənd, Pekin münaqişədə neytral mövqe tutuduğunu bəyan edir.

 

Rusiya prezidenti ölkələrə ticarətin milli valyutalarda aparılmasına və beləliklə də dolların sıxışdırılmasına çağırış edir, oktyabr ayında ölkəsində BRIKS ölkələri sammitini keçirmək niyyətindədir.