Moderator.az xəbər verir ki, bu barədə "dw.com" nəşri yazıb.

 

İkinci dünya savaşı illərində "Canavar yuvası"nın ərazisi təxminən 250 hektar təşkil edib. Vermaxtın Baş Qərargahının yanında CC reysxfüreri Henrix Himmlerin, Hitlerin ən yaxın əlaltısı German Herinqin, reysx-dəftərxanasının filialı, operativ mərkəz və  "Fremde Heere Ost" kəşfiyyat şöbəsi bir-birilə bunkerlər sistemi ilə əlaqəli olub.

 

Məhz burada 1944-cü ilin iyulunda Hitlerin həyatına uğursuz sui-qəsd olub, 1945-ci ilin yanvarında, geri çəkilməzdən öncə vermaxtın sapyorları qalınlığı səkkiz metrə çatan beton bunkerləri partladıb.

 

Bu gün sıx meşəlikdə yerləşən, bataqlıq və göllərlə əhatə olunan "Canavar yuvası" çox böyük, mamırla örtülən bunkerlər və bina qalıqlarından ibarətdir, hər il yüz minlərlə macəra axtaranların diqqətini cəlb edir.

 

 

Polşanın "Fundacja Lstebra" Fondu və Almaniyanın "Relikte der Geschichte" tarix-arxeoloji jurnalının həvəskarları artıq neçə illərdir ki, "Canavar yuvası"nın ərazisini tədqiq edir. Aprelin sonunda onların hələ fevral ayında aşkar etdikləri dəhşətli tapıntı barədə bəlli olub. 

 

Herinqin evinin xarabalıqlarında bir neçə nəfərin, o cümlədən yenidoğulmuş körpənin skeletləri tapılıb.

 

"Bu, əsl şok olub, - "Deutsche Welle" nəşrinə qrup iştirakçısı Oktavian Bartoşevski deyib. - Həmin gün biz vaxtilə Herinqə məxsus olan 15 saylı evdə beton qatının altında həqiqətən də taxta döşəmənin olduğunu aydınlaşdırmaq istəyirdik. Artıq axşam idi.

 

Təxminən 20 sm dərinlikdə biz yanmış taxtalar və zədələnmiş kanalizasiya boruları aşkar etdik. Və birdən onların arasında insanın kəllə sümüyünün fraqmentlərini gördük".

 

 

Buraya gələn ekspert-kriminalistlər daha bir skelet, sonra daha birini də aşkar edib. Cəmi beş nəfərin qalıqları-hər şeydən göründüyü kimi, iki kişi, bir qadın, 7-10 yaşında bir körpə və daha bir yenidoğulmuş körpənin qalıqları aşkar edilib. 

 

Mümkündür ki, bunlar bir ailənin üzvləri olub. Qazıntılar zamanı geyimlər, ayaqqabılar, bəzək əşyaları və ya hər hansı şəxsi əşyalar aşkar edilməyib.

 

Mümkündür ki, cəsədlər çılpaq şəkildə dəfn edilib. Tədqiqatçılar həmçinin deyib ki, bütün skeletlərdə ətraflar olmayıb.

 

"Biz nə desən aşkar edəcəyimizi düşünürdük, amma bunlar ağlımıza belə gəlməyib. Həm də müharibədən neçə illər keçəndən və nə qədər turist və xəzinə axtaranlardan sonra bunları heç gözləmirdik. Biz ümid edirik ki, kriminalistlər, tarixçilər və alimlər bu qeyri-adi tarixçəyə işıq salmağa kömək edəcək", - Oktavian Bartoşevski qeyd edib.

 

Fotosənədləşdirmədən sonra sümüklər Polşa müstəntiqləri və məhkəmə-tibbi ekspertlərə verilib.

 

Bu qalıqlar kimə məxsusdur? Onlar nasist cinayətkar Herinqin evində necə peyda olub? Nədən onlar çılpaq şəkildə dəfn edilib? Niyə skeletlərdə ətraflar yoxdur, nisbətən nazik sümüklər zamanla əriyib və ya onlar amputasiya edilib? Bu suallar indiyədək cavabsız qalıb.

 

 

Polşa Prokurorluğu tədqiqata başlayıb, lakin rəsmi versiyalar səsləndirilməyib. Hər şeydən öncə söhbətin kütləvi qətllərdən getdiyini və ya bunun nasistlərə hər hansı aidiyyətinin olduğunu aydınlaşdırmaq lazımdır. 

 

Bu dəhşətli tapıntını aşkar edən qrup iştirakçıları bir neçə versiya irəli sürüb.  Onlardan biri odur ki, Herinqin evinin altında qədim qalıqlar basdırılıb, sadəcə, binanın inşası zamanı onlar diqqətdən yayınıb.

 

"Skeletlərin yanında üzdəniraq "şeytan barmaqları", yəni bəzən amulet (bədəndə bədbəxtliyə, xəstəliklərə qarşı gəzdirilən magik əşyalar - red.) kimi istifadə edilən daşlaşmış belemnitlər (nəsli kəsilmiş mollyusklar) aşkar edilib.

 

Onlar "Canavar yuvası"nın daha heç bir yerində aşkar edilməyib, ona görə də həvəskar tədqiqatçılar düşünür ki, bu yerdə qədim məzarlıq ola bilərdi", - bu versiyanı Bartoşevski izah edib.

 

Bu versiyanın xeyrinə olmayan iki fakt var, dəfn olunan yerin üstündən kanalizasiya boruları keçir, onlar quraşdırılarkən inşaatçılar insa  qalıqlarını görməyə bilməzdilər. Bundan başqa, skeletlər cəmi 20 sm dərinlikdədir, bu da klassik dəfnedilmə üçün yetərli deyil.

 

 

Bartoşevskinin özü hesab edir ki, cəsədlər artıq evin inşasından sonra dəfn edilib, ola bilsin ki, bu, Herinqin özünün göstərişi ilə edilib.

 

"Evin döşəməsi sanki üç laydan ibarət olub. Üst layda keramik plitə, onun altında beton, sonra isə qalıqlar olan torpaq olub. İstisna edilmir ki, onlar beton tökülməzdən öncə qəsdən taxtalarla örtülüb, çünki orada taxta örtüyün hər hansı xüsusi fiksə edilməsi olmayıb", - tədqiqatçı deyib.

 

Nəhayət, istisna edilmir ki, bu cəsədlər artıq ikinci dünya savaşı bitəndən sonra basdırılıb, qalıqları aşkar edilən insanlar nasistlərə aidiyyəti olmayan kütləvi qətllərin qurbanları ola bilərdi. Bu sualların daha dəqiq cavabı tədqiqat başa çatdıqdan sonra bəlli olacaq.