Millət vəkili əfsanəvi komandanın nəvəsi ilə görüşüb. 

Millət vəkili Qənirə Paşayeva Azərbaycanda səfərdə olan, 1918-ci ildə Bakını bolşevik və daşnaklardan azad etmiş Qafqaz İslam Ordusunun komandanı Nuru Paşanın qardaşı nəvəsi, başqa sözlə Osmanlının Hərbiyyə naziri olmuş əfsanəvi komandan Ənvər Paşanın nəvəsi, tanınmış ziyalı Osman Mayatepek ilə görüşüb. Osman bəyi Azərbaycanda görməkdən məmun olduğunu deyən millət vəkili Qənirə Paşayeva “Vətəninizə xoş gəldiniz, bura sizin də Vətəninizdir. Babalarınızın adı bu torpaqlarda həmişə dərin sayğı ilə çəkilib. Sizin Azərbaycana gəlişiniz, sözün hər anlamında, bizimçün də, sizinçün də ziyarətdir!” deyib. 

Hələ televiziyada çalışdığı illərdə hazırladığı və Azərbaycan Xalq Cumhuriyyətinin yaranmasından bəhs edən “Apreldən öncə May” sənədli filminin çəkilişləri zamanı Nuri Paşa, Ənvər Paşa ilə də bağlı çoxlu tarixi bilgilər əldə etdiyini və filmdə istifadə etdiyini xatırladıb. Xanım Paşayeva, “Bakıdakı Türk Şəhidliyi bu günkü və gələcək nəsillərimizə bugün üçün də, gələcək üçün də ən gözəl qardaşlıq örnəyidir və bugün biz, sabah gələcək nəsillər şəhidlərimizi hər zaman sayğı və sevgi ilə xatırlayacaq” deyib. 

Azərbaycanı görməkdən, yaxından tanımaqdan böyük xoşbəxtlik duyduğunu deyən Osman Mayatepek “burada özümü gerçəkdən öz evimdəki kimi hiss edirəm. Azərbaycanda insanlarımızın bizə və dədələrimə sevgi və sayğısı məni özəlliklə duyğulandırdı” deyərək, öz təəsüratlarını bölüşüb.

 İki qardaş ölkənin qarşılıqlı münasibətlərinin, bu münasibətlərin inkişafında aydınların rolunun geniş müzakirə olunduğu görüş zamanı, Ermənistanın Azərbaycan torpaqlarını işğalı, Xocalı Soyqırımı, qondarma erməni soyqırımı” iddiaları, həqiqətlərin dünyaya daha geniş çatdırılması, yalanlara qarşı birgə mübarizədə türk insanının, diasporumuzun rolunun, birgə səylərin daha da gücləndirilməsi də diqqət mərkəzində olub. 

Görüşün sonunda millət vəkili Qənirə Paşayeva Osman Mayatepekə Azərbaycan, tariximiz, mədəniyyətimiz, musiqimizlə bağlı kitablar, albomlar hədiyyə etməklə yanaşı, özünün müəllifi olduğu kitabları və həmmüəllifi olduğu "Hocalı Soykırımı tanıkların dilinden" kitabını da təqdim edib və “Sizi Azərbaycanda təkrar görməkdən böyük məmunluq duyacağıq” deyərək, cənab Mayatepeklə görüçün yaddaşında əbədi qalacağını vurğulayıb. 

“Azərbaycan hər zaman könlümdə olacaq” deyən Osman Mayatepek də öz növbəsində xanım millət vəkilnə öz müəllifi olduğu "Dədəm Ənvər Paşa" kitabını hədiyyə edib.

 Görüşün sonunda xatirə şəkilləri çəkilib.