Qarabağdan, cəbhə xəttindən çox-çox uzaqlarda yerləşən, Azərbaycanın ən uğcar bölgələrindən-kəndlərindən birində, Yardımlının Bilnə kəndində, sadə bir ailədə dünyaya gələn, ancaq Vətən torpaqları yolunda canını fəda edən İkinci Vətən Müharibəsi Şəhidlərimizdən biri də Əli Nuru oğlu Rzalıdır…
Adını eşidib, üzünü görmədiyi Qarabağı uğrunda bir an tərəddüd etmədən, göz qırpmadan Şəhidlik məqamına ucalan Vətən sevdalısı Əli Rzalı…
İgid, Qəhrəman, qarşıdan Cənnətdəki üçüncü doğum günü gələn Nur üzlü Şəhidimiz Əli Nuru oğlu…
Əli Nuru oğlu Rzalı 2002-ci ilin 17 aprel tarixində Yardımlı rayonunun Bilnə kəndində dünyaya gəlib…
Ailənin üç övladından biri, evin ortancılı və böyük oğlu olub…
Uşaqlığından da yaşıdlarından yaxşı mənada fərqlənib, vətənpərvərliyi ilə seçilib, böyükdən kiçiyə hər kəsin rəğbətini, hörmətini qazanıb…
Azərbaycanın müqəddəs Dövlət bayrağına xüsusi məhəbbətinə görə hər kəs tərəfindən təqdir qazanıb…
Nənə-babalarının ən sevimli, ən istəkli nəvəsi olub…
2008-2019-cu illərdə Blinə kənd orta məktəbində oxuyub…
Orta məktəbi bitirdikdən aylar sonra, 2020-ci ilin may ayında həqiqi hərbi xidmətə, Vətənin keşiyinə yollanıb…
Goranboyda, Şubanıda və Cəlilabadda yerləşən hərbi hissələrdə xidmət edib, Xüsusi Təyinatlı Qüvvələrin (XTQ) Əsgəri olub…
İkinci Vətən Müharibəsi zamanı isə cəmi 5 ayın Əsgəri kimi döyüşlərə qatılıb…
Axırıncı dəfə atası Nuru kişi ilə müharibədən cəmi günlər öncə, sentyabrın 19-da görüşüb, tək bacısı ilə də sonuncu dəfə sentyabrın 24-də danışıb…
Həmin gündən sonra Əli ilə əlaqə saxlamaq mümkün olmayıb…
Müharibə zamanı döyüş, vuruşub, qəhrəmanlıqlara imza atıb və döyüşlərin, müharibənin 6-cı günündə, oktyabrın 2-də, səhər saatlarında Murovdağ-Kəlbəcər istiqamətində qəhrəmancasına Şəhidlik zirvəsinə yüksəlib…
Şəhidliyi xəbəri ailəsinə elə həmin gün, saat 15:00 radələrində verilib…
Bala, övlad acısı, itkisi nə qədər ağır və dözülməz olsa da, anası Samirə xanım “Mən övladımla fəxr edirəm…O, Vətəni yolunda Şəhid olub…Müharibə dayanmasın, mən də düşmənə qarşı vuruşmağa, Vətənimi qorumağa hazıram”-deyib…
Və 2 oktyabr tarixində, axşam saatlarında nəşi Bilnə kənd qəbiristanlığında Əbədiyyətə uğurlanıb, torpağa tapşırılıb…
Şəhidliyindən sonra İgidliyinə, Qəhrəmanlığına görə Ali Baş Komandan tərəfindən 4 medalla-“Vətən uğrunda”, “Cəsur döyüşçü”, “Kələbəcərin azad olunmasına görə”, “Cəbrayılın azad olunmasına görə” medalları və 3-cü dərəcəli “Rəşadət” ordeni ilə təltif olunub…
Eyni zamanda, Şəhidliyindən öncə Müdafiə naziri tərəfindən “Şücaətə görə” medalına layiq görülüb…
Əli həmçinin Bilnənin yeganə İkinci Vətən Müharibəsi Şəhididir…
Əli Rzalı eyni zamanda, tanınmış jurnalist Elşad Paşasoyun bacısı oğludur…
Əlinin yaxın qohumu, Elşad Paşasoyun xalası nəvəsi də İkinci Vətən Müharibəsi Şəhidlərindəndir…
Əli həm də subay olub.
Bu gün bir qrup tanınmış jurnalistlə, Parlament Jurnalistlər Birliyinin (PJB) üzvləri ilə birlikdə Bilnə kəndində Şəhidimizin ailəsinə, ocağına baş çəkdik…
Şəhidimizin valideynləri-anası Samirə xanım, atası Nuru kişi, babası-el ağsaqqalı, dəyərli ziyalı, təqaüddə olan tarixi müəllimi, kapitan Əlihüseyn müəllim və dayıları ilə görüşdük, bir araya gəldik…
Öncə Şəhidimizin Bilnə kəndinin girişindəki xatirə löhvəsini, sonra adını daşıyan “Şəhid bulağını” və məzarını ziyarət etdik…
Ruhuna dualar etdik…
Daha sonra Şəhidimizin ocağında, ev-muzeyində olduq…
Şəhidimizin ailə üzvlərinə, doğmalarına Allahdan səbr və dözüm arzuladıq…
“Şəhidimizin məkanı cənnətlik, ruhu şad olsun!”-dedik…
Müqəddəs ruhu qarşısında baş əydiyimizi, Şəhidimizə və cəmi Şəhidlərimizə, onları yetişdirən Qəhrəman ailələrə, Rzalı (Rzayevlər) ailəsinə bir ömür boyu borclu olduğumuzu dilə gətirdik…
Onlardan-Şəhidimizin ailəsindən halallıq istədik…
Şəhidimizin valideynləri, babası ilə qısa da olsa, söhbətləşdik…
Onlarla birlikdə Şəhidimizin qısa, lakin şərəfli həyat, hərb və döyüş yoluna nəzər saldıq…
Duyğulandıq, təsirləndik, Qürurlandıq…
Məqamı Ucalardan uca, dərgahı mübarək olsun, cəmi 18 yaşında Şəhidlik məqamına ucalan Əli Rzalının!
Nur içində uyusun!
Müstəqil, Qalib Azərbaycan var olduqca, Azərbaycan xalqı yaşadıqca, Əli də, Əlilər də var olacaq, mənən, ruhən yaşayacaqlar!
Şəhidlər-Əlilər ölməz, Vətən bölünməz!
FOTOLAR: