Moderator.az olaraq sənətkarı təbrik edir, yaradıcılığında böyük uğurlar arzu edirik. Xanəndə saytımıza açıqlamasında yaddaqalan doğum günlərindən danışıb.

 

 

“Yaddaqalan doğum günlərim çox olub. Bu qastrol səfərlərində də, xarici ölkələrdə də olub. Əlbəttə ki, ən yaddaqalan ad günüm Həcc ziyarətində olanda olub. Mən iki dəfə Həcc ziyarətində olmuşam. Bir ad günüm Mədinə şəhərinə, digəri isə Məkkəyə təsadüf edib. İlk təbriki hər zaman evimin içindən-qızımdan, nəvəmdən, həyat yoldaşımdan, sonra isə tələbələrimdən almışam. Bu gün doğum günümdə çox gözəl hava var, qar yağır. Çox sevinirəm. Bir də ona görə qürur hissi keçirirəm ki, zəfər çalan ölkənin xanəndəsiyəm. İllərdir arzusunda olduğum torpaqlarımızın azad edilməsinin sevinci ilə yaşayıram. Dövlətimin, xalqımın sevgisi mənə hədiyyədir. Xoşbəxtəm ki, dövlətim, xalqım məni sevir. Ad günlərimi təmtəraqla qeyd etməyi sevmirəm. Dəbdəbədən, şöhrətdən uzaq insanam. Adi bir şeyi qeyri-adi kimi göstərənlərdən deyiləm. Ad günü sənin ailənə, yaxın çevrənə, sevənlərinə aid gündür. Ailə içərisində qeyd edəndə rahat, sərbəst oluram. Hədiyyə almağı hamı sevir, amma hədiyyədən də çox mənim üçün diqqət önəmlidir. Hədiyyə olmaya da bilər, amma bir kəlmə ilə yada salmağın özü bir hədiyyədir”, - deyə “Şöhrət” ordenli sənətkar Səkinə İsmayılova deyib.

 

 

 

“Dövlətimizə, dövlət başçımıza, vitse prezidentimizə təşəkkür edirəm. Çünki hər zaman onların qayğısını, diqqətini görürəm. Ölkəmizdə muğam sənətinə böyük qayğı var. Mehriban xanım Əliyevanın tapşırığı və diqqəti ilə muğam müsabiqələri keçirilir. Görün o müsabiqələrdən nə qədər istedadlı gənclər çıxır. Bir neçə il bundan əvvəl ad günümdə məni “Şöhrət” ordeni ilə təltif etdilər. Mən onda da dedim, indi də deyirəm ki, bu təkcə mənə yox, muğam sənətimizə, xalq musiqimizə verilən bir dəyərdir. Sənətimiz bizə əsrlərdən gəlib çatıb. Yeganə sənətdir ki, dildən-dilə, ağızdan-ağıza ötürülüb. Əlbəttə ki, bizlərin də borcudur ki, bu sənəti yaşadaq, qoruyaq və nəsildən-nəsilə ötürək. Çox əziyyətli və çətin bir yoldur. Amma bu sənət üçün nələrsə etmisənsə, düşünürsən ki, çox şükür illərim hədər getməyib. İstər qaval ifaçılığı olsun, istər xanımlardan ibarət trio olsun, istərsə də muğamla simfonik əsərin birləşməsi olsun, bütün bunlar sevinirəm ki, mənim adımla bağlıdır”, - deyə sənətkar bildirib.