"Əmanət Bankı", "Rosselxozbank" və "Modkva kredit bankı" iyunun 14-dən beynəlxalq SWIFT sistemindən ayrılıb.

 

Bu qərar iyunun əvvəlində Rusiyanın Ukraynaya hərbi müdaxiləsi səbəbindən Avropa İttifaqının 6-cı sanksiyalar paketi çərçivəsində qəbul edilib.

 

Moderator.az xəbər verir ki, bu barədə BBC-nin rus xidməti məlumat yayıb.

 

Bununla yanaşı, sanksiyalar altına düşən bankların rəhbərliyi inandırıb ki, ödəniş sistemindən ayrılması onların işinə təsir göstərməyəcək.

 

Məsələn, "Əmanət Bankı"nın mətbuat xidməti iddia edib ki, bank müəssisəsi ştat rejimində işləyir.

 

"Əsas məhdudiyyətlər artıq fəaliyyətdədir. SWIFT sistemindən ayrılma beynəlxalq hesablamalarda cari vəziyyəti dəyişmir. 

 

Rusiyadaxili əməliyyatlar SWIFT-dən asılı deyil və bank tərəfindən standart rejimdə aparılacaq", - bankın məlumatında belə deyilib.

 

"Rosselxozbank" bəyan edib ki, müəssisə SWIFT sisteminə alternativdən istifadə edir və bu sistem Rusiyanın bank sistemində çoxdan istifadə edilir.

 

Rəhbərlik istisna etmir ki, bu addım beynəlxalq ödənişlərdə ləngimələrə səbəb ola bilər.

 

"Fiziki və hüquqi şəxslər üçün əməliyyatlar həmişəki kimi olacaq. Mümkündür ki, xaricə köçürmələr adəti üzrə olduğundan çox zaman tələb etsin. Girovlar, o cümlədən valyuta girovları və kreditlər əvvəlki rejimdə olacaq. Bütün ödəniş kartları əvvəlki kimidir. O cümlədən "Mir" və "UnionPay" kartları qüvvədə olan xarici ölkələrdə ödənişlər olduğu kimi qalacaq.

 

"Moskva kredit bankı" öz növbəsində iddia edib ki, SWIFT sistemindən ayrılma beynəlxalq ödənişlərə təsir etməyəcək, bütün adi tranzaksiyalar isə adəti üzrə işləyəcək.

 

"SWIFT maliyyə məlumatlarının ötürülməsi sistemidir və bir neçə alternativ variantları var. Yeganə rahatsızlıq bundan ibarətdir ki, xarici ödənişlərin müddətləri arta bilər", - bankın məlumatında deyilib.

 

Xatırladaq ki, iyunun əvvəlində Avropa İttifaqı Rusiyaya qarşı 6-cı sanksiyalar paketini təsdiq edib. Rusiya banklarına qarşı məhdudiyyətlərdən başqa, bu sanksiyalar Rusiyadan xam neft və bir sıra neft məhsulların idxalına qadağanı nəzərdə tutub.

 

Lakin Finlandiyanın CREA energetika və təmiz hava tədqiqatı Mərkəzinin məlumatına görə, Ukraynada müharibənin 100 günü ərzində Rusiya neft, qaz və kömürdən 93 milyard avro qazanc əldə edib.

 

ABŞ Dövlət Departamentinin energetika məsələləri üsrə müşaviri Amos Xoxştaynın qeyd etdiyi kimi, Rusiya hazırda Ukraynada müharibədən öncə qazandıqlarından daha çox qazanc əldə edir, çünki dünyada enerjidaşıyıcılarının qiymətinin artması Qərbin sanksiyalarını kompensasiya edir.