“20 yanvar mənim ad günümdür. Sonuncu dəfə 1989-cu ilin bu günü ad günümü qeyd etmişdim. 1990-ci il yanvarın 19-da Moskvada Moskva Dövlət Universitetində təhsil alırdım və tələbə dostlarımla sabah ad günümü necə keçirəcəyimi planlaşdırmışdım. Gecə yarı xəbər gəldi ki, Bakıya qoşun yeridiblər. Səhər tezdən biz hamımız Azərbaycanın Moskvadakı nümayəndəliyinə üz tutduq. Vəziyyət eləydi ki, 20 yanvarın səhəri açılmışdı, amma nümayəndəliyin qarşısında çaşqınlıq içində olan ilk olaraq yüzlərlə, minlərlə insanın səhəri açılmırdı. Hamı 20 yanvarın qaranlığında kədərli, qəzəbli idi”

 

Bunu Moderator.az-a açıqlamasında Əməkdar jurnalist Mübariz Əsgərov deyib. O, həmin vaxt azərbaycanlıların Moskvada böyük etiraz aksiyası keçirdiyini bildirib:

 

“Ulu Öndər Heydər Əliyevin nümayəndəliyə gəlib mətbuat konfransı keçirməsi və SSRİ rəhbərliyini sərt tənqid etməsi bizim mitinq və fikirlərimizi daha izdihamlı etdi. Hüzünlü və şərəfli günlər idi. Biz o vaxt Moskvada yaşayan azərbaycanlılar mümkün olan qədər Azərbaycanın haqq səsini dünyaya çatdırmaq üçün əlimizdən gələni edirdik. O vaxt mən özüm bir qrup tələbə və aspirantlarla müstəqil mətbuat mərkəzi yaradıb müəyyən təbliğat işləriylə məşğul olurduq. Həmin vaxt təhlükəsizlik orqanları çox fəal idi. Onda biz bir qeyri-rəsmi qəzet buraxırdıq. Çünki nəzarətsiz qəzetlər ideoloji təbliğat sayılırdı və onların çapına icazə vermirdilər. Amma biz qəzet çıxardıb insanlara yayırdıq. Mətbuat konfransından sonra biz mitinqlərə çıxdıq. Tam səmimi deyirəm ki, elə olmayıb ki, qeyri-rus millətindən olan insanların Moskvanın bir başından o biri başına qədər izdihamı olsun. Biz iyirmi kilometr məsafəni qət etdik. Səlahiyyətli orqanlar qarşısında etiraz mitinqi keçirdik.

 

Mən həmin vaxtdan sonra həmin o şərəfli günlər haqqında “Bir mətbuat konfransının tarixi” adında bir sənədli film çəkdik. Moskvaya getdim, uzun müddət orda qaldım. 20 Yanvar hadisəsi zamanı Moskvaya gələn müşahidəçilərlə söhbət etdik. Moskvada hüquq müdafiəçiləri, ziyalılar o vaxt Bakıya gəlib hər şeyi öz gözləriylə görmək istəyirdilər, amma inanın ki, onlar da qorxurdular. Çünki həmin vaxt Moskvadan idarə olunan kütləvi informasiya vasitələri yazırdılar ki, guya Bakı terrorçuların və islamçıların əlindədir, şəhərdə yaşayan başqa millətlərə, o cümlədən ruslara qarşı vəhşilik törədilir. Buna görə onlar da qorxurdular, amma çoxu Bakıya gəldi. Onların bir çoxuyla söhbət etdim. O vaxt gələn SSRİ xalq deputatlarıyla da söhbət etmişəm. Bütün bunlar haqqında sənədli bir film işlədim. O vaxt Bakıya yeridilən əlli mindən çox şəxsi heyətin, mindən çox hərbi texnikanın istifadə olunduğu əməliyyatın şərti adı “Zərbə” idi. Amma bu nəhəng hərbi əməliyyat zamanı təkcə Azərbaycan yox, Sovet quruluşu daha çox zərbə aldı və dağıldı. Ən çox yadımda qalan Moskva küçələrini iflic etməyimiz idi, əlimizdə etiraz lövhələri var idi. O yol bizi müstəqilliyə aparırdı, o yolda biz bir idik. Allah müstəqilliyimizi qorusun”.