**** ***

 

Koronavirusdu, “koviddi”-nədi, ondan qorunmaq, bu mərəz, onun səbəb olduğu yoluxma və ölüm statistikası haqda informasiyaları eşitmək, oxumaq başımızı nə təhər qatıbsa, qorunmalı, mühafizə olunmalı digər bəlalar, xəstəliklər yadımızdan çıxıb?.. Hər kəs öz canının hayındadır... Ən əsası, ruhumuzu, mənəviyyatımızı, mənliyimizi, vicdanımızı, ümummilli qürurumuzu qorumaq vəzifəsini unutmuşuq...

 

*** *** 

 

Məsələn, neçə vaxtdır ləğv edilmiş Milli Təhlükəsizlik Nazirliyinin İstintaq Baş İdarəsinin sabiq rəisi Mövlam Şıxəliyev və digərlərinin cinayət işi üzrə məhkəmə prosesi gedir. Həmin məhkəmədə adı çəkilən generalın milyonlarla dollar rüşvət alması haqda iddialar səslənir, cinayət işində onun 7 milyon dəyərində mülkləri olması barədə faktlar yer alır...

Heç görəsən, bu faktları eşidən kəslərdə belə bir sual yaranırmı: necə oldu beləsi general rütbəsi aldı? Buna hansı mühit şərait yaratdı?..

Hələ 2017-ci ildə  məhkəməyə şahid qismində gətirilən  bu generalı görəndə, onun danışıqlarını eşidəndə  zərərçəkmişlərdən biri hiddətlə demişdi:“Necə olub ki, bu adama general rütbəsi veriblər?  Mövlam Şıxəliyev milyonlarla rüşvət alıb. O, həbs olunmasa, özümü yandıracam...”

 

*** ***

 

Doğrudan da çox vacib sualdır:  Necə olur ki, Eldar Mahmudov, Akif Çovdarov, Mövlam Şıxəliyev kimilər illərlə, on illərlə çavuş, gizir, leytenant rütbəsindən pillə-pillə qalxıb general olur, ölkənin milli(!) təhlükəsizliyinə cavabdeh qurumun baş istintaq idarəsinin rəisi kimi vacib və məsul bir vəzifə tutur və bizim bir xalq dövlət olaraq bundan xəbərimiz olmur?...

Cavab sadədir: 

 

Əlbəttə ki, ölkədəki mövcud mühit, ən azı Çar Rusiyası və Sovet imperiyasının müstəmləkəsi olduğumuz iki əsrə yaxın dövrlərdəki fiziki və ruhi, mənəvi-ideoloji manqurtlaşdırmanın nəticəsi olaraq sonrakı on illiklərdə də həmin imperiyanın “KQB”-“QRU”-“PKK” agentura şəbəkəsi tərəfindən formalaşdırılmış kütləvi əqidəsizlik, cəzasızlıq...

Və cəmiyyətdə belə bir durumun yaranmasında yalnız imperiyalar dövründən bəri başımızda duran hakimiyyətlər deyil, özümüz də bir xalq, millət olaraq günahkarıq... Çünki rayonlardakı adi məktəb direktorlarından, təhsil şöbəsi müdirlərindən, icra başçılarından tutmuş nazirlərədək bütün vəzifə sahiblərini öz içimizdən yetişdirmişik. Öz əqidəmizlə, əslində əqidəsizliyimizlə yetişdirmişik... Rüşvətxorluğun, korrupsiyanın hələ indiki qədər kütləviləşmədiyi sovetlər dönəmində nəinki, şəhərlərdə, rayonlarda, kənddə-kəsəkdə də babat bir vəzifəsi, imkanı olan, hətta xeyli mal-heyvanı, qoyun-quzusu, yaxud kartof, pomidor, soğan sahəsi  olanların əksəriyyəti bu düşüncə, məqsədlə yaşayırdı: “Ayə, görüm, bir az pul düzəldib oğlumu “sistem”ə(milis, yaxud “KQB”) keçirə, ya da universitetin hüquq fakültəsinə, yaxud “narxoz”a(o vaxtkı Xalq Təsərrüfatı institutu, indiki İqtisad universiteti), ya da Tibb institutuna qəbul etdirə bilərəmmi?..”  Nə yazıqlar ki, eyni əqidə, düşüncə, yaşam tərzi bu gün də davam edir... Təbii ki, bu əqidəsizliyin yaranmasına səbəb öncə təhsildə, hüquq-mühafizə orqanlarında, tibb sahəsində rüşvətə, korrupsiyaya şərait yaradanlar olub... 

 

*** ***

 

O günləri Sudanda hərbi çevriliş xəbərini alanda düşündüm ki, birdən o yazıq xalqın başına döyüşlərdə canlarını qoymuş, əsgərləri ilə bərabər səngərdə yatmış rəhmətlik Polad Həşimov, Hikmət Mirzəyev kimi əsl insan-generallar yox,   Eldar Mahmudov, Mövlan Şıxəliyev, Nəcməddin Sadlıkov tipli  nəfs qulu olan generallar gələr. Onda yazıq o xalqın gününə... 

*** ***

Bütün ölkələr, xalqlar, bütün bəşəriyyət üçün ən təhlükəlisi nəfs köləsi olan siyasətşi, hərbçi, general və iş adamlarının azadlığa can atanlar insanlar, toplumlar üzərində hakimiyyətə nail olmasıdır... Bu, koronavirusdan, xərçəngdən də dəhşətli bir bəladır...  

 

*** ***

 

İnsan məxluqunun ən təhlükəlisi nəfsinə qul olandır... 

 

*** *** 

 

Necə də gülünc səslənir, eləmi? Nəfsinə qul olan general... O boyda general da qul olarmı? Nə yazıqlar ki, olur... Özü də nəfsinə qul olandan sonra digər Allah bəndələrinə, əslində şərbəndələrinə də qul olmağa razılıq verir... Təki çiyinlərində general paqonları olsun və onların hesabına ölkəni, ordunu, xüsusi xidmət orqanını, kəşfiyyatı, gömrüyü, vergini və s. söksün-dağıtsın...

 

*** ***

 

General almaq və ya general qalmaq naminə öz xalqının oğullarına, öz ordusunun əsgərlərinə, zabitlərinə “satqın” damğası vurdurub işgəncə verdirənlər,  bu mənzərəyə ləzzətlə tamaşa edənlər var...

 

*** *** 

 

İnsan, general, polkovnik, zabit, gizir, mülki, yaxud hərbi həkim nə qədər alçalar, azğınlaşar, quduzlaşar ki, hansısa düşmən kəşfiyyatına satıla və  hər hansı bir iqtisadi, siyasi, yaxud hərbi cinayət işinin(çox vaxt da qondarma) araşdırılması, istintaqı zamanı  öz  “satqın”, “xain” adını  xalqının oğullarına, öz ordusunun əsgər və zabitlərinə qoyub onlara misli görünməmiş işgəncələr verə, onların dilindən xalqın, ordunun əsl cəfakeşlərinə -  digər vətənpərvər siyasətçilərinə, iş adamlarına generallarına, zabitlərinə, əsgərlərinə qarşı “ifadələr” almağa, onlar barədə saxta tibbi rəylər verməyə çalışa?..

 

*** ***

 

Və bir ölkə, xalq üçün ən dəhşətlisi də odur ki, bütövlükdə bir xalq belə nəfs tuluqlarına, nəsf köləsi olan siyasətçi və generallara baş əyə... Cəmiyyətin digər ziyalı, siyasətçi, ekspert, jurnalist, alim, şair, deputat  və s. sayılan nümayəndələri hansısa maddi vədlər, vəzifə, kürsü, pul-para “mükafatı” və s. sayəsində, yaxud sadəcə, qorxaqlıq, yaltaqlıq xislətindən həmin cinayətkarları, xainləri tərifləyə, mədh edə və onların diqtəsi ilə bu cinayətkarlara qarşı gerçək mübarizə aparan xalqın əsl vətənpərvərlərini gözdən sala, ləkələyə... Bu yolu tutan xalq heç bir halda hüquqi cəhətdən müstəqillik əldə edərək rəsmən ayrıldığı imperiyanın caynağından o imperiyanın özü tam dağılmayınca əsl mənada qurtulub azad ola bilməz...

 

*** ***

 

Heç kəs  bu dünyada ölümsüz deyil...  O cümlədən siyasətçilər və generallar da.... Hər gün bir doğmamızı, dostumuzu, həmkarımızı, ziyalımızı, sənətkarımızı itiririk..  Hamı bir-bir köçəcək dünyadan, o cümlədən bu sətirlərin müəllifi də... Ancaq gəlin bir Allah bəndəsi, bir xalqın nümayəndəsi, bir vətəndaş olaraq  elə işlər görək ki, dünyada, ölkədə baş verən gerçəklərə elə münasibət bildirək ki,  bir ad, bir vəzifə, ev, maşın, pul, bir qarın çörək xətrinə Allaha, haqqa qarşı çıxmayaq, bəşəri və ümummilli dəyərlərimizi tapdamayaq, onlara xəyanət etməyək...

 

*** *** 

 

1991-ci ildən, yəni hüquqi cəhətdən müstəqil olandan bəri Çar Rusiyası və Sovet imperiyası dövründə xalqımıza, ziyalılarımıza, şair, yazıçı və alimlərimizə, Cavidlərə, Cavadlara, Mikayıl Müşfiqlərə qarşı işgəncələrdə, repressiyalarda imperiya prokurorları, milisləri, müstəntiqlərinin, cəlladlarının(o cümlədən erməni millətinə mənsub) yanında olmuş digər vətəndaşlarımızı, “xalq şairi”, “professor”  və s. adları alan digər ziyalı hesab olunanları şiddətlə lənətləyirik... Bu zülmlərə kütləvi şəkildə susan ata-babalarımızı isə kəskin şəkildə qınayırıq... Gəlin bu gün hər birimiz öz sahəmizdə, işimizdə, xidmətimizdə bir vətəndaş olaraq elə mövqe nümayiş etdirək ki, bu, caynağından 30 il öncə de-yure qurtulduğumuz Rusiya imperiyasının ölkəmizdə qurduğu və siyasətimizi, elmimizi, ordumuzu, səhiyyəmizi, iqtisadiyyatımızı və s. nəinki ləkələməyə, çökdürməyə çalışan  “KQB”-“QRU” korrupsiya-xəyanət-işgəncə şəbəkəsinin  möhkəmlənməsinə yox, ifşa olunmasına, çökməsinə xidmət etsin... Axı indi biz müstəqilik(!), azadıq(!)... Axı indi sovet rejiminin, Kremlin, Stalinin, Beriyanın dövranı deyil... Axı biz hazırda imperiyanın tərkibində deyilik ki, “NKVD”, “KQB” addımbaşı bizi izləyə, bizə düşünməyi, danışmağı, haqsızlığa etiraz etməyi qadağan edə... Nədən və kimdən qorxuruq? Axı başımızın üzərində üçrəngli bayrağımız, arxamızda müstəqil(!) müzəffər dövlətimiz, ordumuz, DTX-mız, polisimiz, prokurorluğumuz var... Hələ qardaş Türkiyənin daim çiynimizdə olmalı olan əlini demirəm...

 

*** ***

 

Əgər 1988-ci ilin Meydan hərəkatından, 1990-cı ilin 20 Yanvarından qəhrəmanlıqla keçərək Kremlin caynağından ən azı hüquqi cəhətdən qurtulmuş, ondan 30 il sonra cəmi 44 günə Rusiyanın ermənilərə işğal etdirdiyi torpaqlarımızın azadlığına nail olmuş bir xalq olaraq biz hər tərəfdən təzyiqlər, sanksiyalar altında olan Rusiya imperiyasının ölkəmizdəki agentura şəbəkəsini çökdürüb əsl xainlərin, satqınların ifşasına və qanunlar cəzalandırılmasına nail ola bilməyəcəyiksə, o halda bizlər də gələcək nəsillərin söyüş hədəfinə dönəcəyik...

 

Sultan Laçın