Rusiyada bu gün faşizm üzərində qələbənin 76-cı ildönümü təntənəli şəkildə qeyd olunub. Rusiya Nasist Almaniyasının İkinci Dünya müharibəsində məğlubiyyətini qeyd edərək, ölkədəki paradlarla hərbi gücünü də nümayiş etdirib.

 

Hərbi məktəblərin kursantları, Hava və Quru Qoşunlarının, Dəniz Qüvvələrinin, Daxili Qoşunların əsgər və zabitləri, Müdafiə Nazirliyinin Hərbi Universiteti və digər ali hərbi məktəblərin məzunları olan qadın hərbi qulluqçular nizami keçid edib.

 

Hərbçi kolonlarından sonra İkinci Dünya müharibəsinin simvollarından olan məşhur T-34 tankı meydana daxil olub.

 

Paradda yeni növ döyüş tankları Т-90М və Т-80BVM, "Armata" piyada döyüş maşınları iştirak ediblər. Bundan başqa, paradda "Tornado -S" reaktiv raket sistemi, hava hücumundan müdafiə sistemi S-400 “Triumf”, “Pantsir-S” zenit raket kompleksləri, "İsgəndər M" operativ taktiki raket kompleksi, "Tayfun" və "Tiqr-M" zirehli avtomobilləri və digər ən müasir Rusiya hərbi texnikaları nümayiş olunub.

 

Paradda Mi-26, Mi-28 və K-52 helikopterləri, İl-76 hərbi nəqliyyat, Tu-96 MS, Tu VVM3 və Tu-16 bombardmançı, MiQ-29 MST, MiQ-31, beşinci nəsil Su-57 və SU-130SM qırıcıları hava şousu göstəriblər.

 

Prezident Vladimir Putin Moskvanın Qızıl Meydanında təxminən 12 000 əsgər, 200 hərbi texnika, təyyarə və helikopterin yer aldığı Zəfər Bayramı paradını izləyib.

 

Bu ilki Qələbə bayramı paradında diqqəti cəlb edən nüanslardan biri də Tacikistan Prezidenti Emoməli Rəhmonın həmin tədbirdə iştirakıdır. Bu yaxınlarda Qırğızıstanla sərhəd münqaşisə baş verən Tacikistan Prezidentinin Rusiyanın paytaxtında keçirilən və başqa dövlətlərin başçılarının iştirak etmədiyi paradda Putinlə birlikdə görünməsi təsadüfi hesab edilə bilməz. Vladimir Putin Tacikistan Prezidentini həmin tədbirə dəvət edib yanında oturtmaqla Rusiyanın nəzarətindən çıxmağa çalışan Qırğızıstana və digər postsovet ölkələrinə ciddi bir mesaj verib. Rusiya dövlətinin başçısı bununla Tacikistan-Qırğızıstan sərhəddindəki münaqişənin onun nəzarəti ilə baş verdiyini açıq şəkildə bütün dünyaya nümayiş etdirib. 

Rusiya ilə əlaqələrini getdikcə inkişaf etdirən Tacikistan Kollektiv Təhlükəsizlik Müqaviləsi Təşkilatının üzvüdür. 1992-ci ildən Tacikistana rəhbərlik edən Emoməli Rəhmonın Rusiya dövlətinin başçısı ilə yaxşı münasibətləri var. Ölkə rəhbərlərinin isti münasibəti dövlətlərarası əlaqələrin daha da genişləndirilməsinə gətirib çıxarıb. Keçmiş postsovet ölkələrinin bir-bir Rusiyanın nəzarətindən çıxması Şimal qonşumuzu Tacikistandan bərk yapışmağa, əlaqələri daha da inkişaf etdirməyə sövq edib. Bu yaxınlarda Rusiyanın Müdafiə naziri Sergey Şoyqu bəyan edib ki, Tacikistanla ortaq hava hücumundan müdafiə sistemi yaratmaq niyyətindədirlər. 

 

Son illər Rusiyanın Mərkəzi Asiya dövlətləri ilə münasibətlərində soyuqluq yaranıb. Qırğızıstanda baş verən inqilabdan sonra bu ölkəyə Qərbin dəstəklədiyi Sadır Japarov rəhbərlik etməyə başlayıb. Qazaxıstanın da uzun illərdir, strateji tərəfdaşı olan Rusiyadan incikliyi sezilməkdədir. Bütün bu hadisələr fonunda Tacikistana Rusiyanın xüsusi diqqətlə yanaşması bu ölkəni də itirmək qorxusundan qaynaqlanır. Tacikistan Prezidentinin Moskvada keçirilən parada dəvət olunması bu baxımdan diqqəti cəlb edir. Putin bu jestlə bu günlərdə Tacikistanla Qırğızıstan arasında baş vermiş münaqişədə Tacikistanı dəstəklədiyini açıq şəkildə nümayiş etdirdi. Rusiyanın dəstəyindən ruhlanan Tacikistan Qırğızıstanla münasibətlərində diqtə edən tərəf rolunda çıxış etməyə çalışacaq.  Bu da iki ölkənin münasibətlərinin gərginləşməsinə səbəb olacaq. Tacikistanla münaqişəli vəziyətin yaranmasından sonra Rusiya Qırğızıstana təzyiq imkanlarını genişləndirəcək. 

 

Görünən odur ki, Rusiya keçmiş postsovet ölkələrinin ərazisində daha bir münaqişə ocağı yaratmaqdadır. Bu ölkələri zor gücünə öz əlində saxlamağa çalışan Rusiya bu alınmadıqda yeni bir münaqişə ocağı yaradır. Beləliklə, sonra sülh carçısı kimi ortaya çıxıb münaqişəni nizamlaq üçün “səy göstərməyə başlayır”. 

 

Rusiya qarşıdakı dövrdə Mərkəzi Asiya ölkələri üçün sürprizlər hazırlaya bilər. Çünki bu bölgənin tamamilə Qərbin nəzarətinə keçməsi Rusiyanın sonunun yaxınlaşması deməkdir. Görək, Emoməli Rəhmonın bugünkü sürpriz Moskva səfərindən sonra bölgədə hansı hadisələr baş verəcək.