Xəbər verdiyimiz kimi Azərbaycan Aşıqlar Birliyi görkəmli saz-söz sənətkar, haqq aşığı Aşıq Ələsgərin şeirlərindən ibarət “Lirika” adlı kitab çap edib. 

 

Moderator.az-a açıqlamasında Azərbaycan Aşıqlar Birliyinin sədri, Əməkdar elm xadimi, professor Məhərrəm Qasımlı Dədə Ələsgər yaradıcılığı ilə bağlı görüləcək işlərdən danışıb:

 

“Aşıq Ələsgərin 200 illiyi ilə bağlı Azərbaycan Aşıqlar Birliyində “Lirika” kitabıyla yanaşı, başqa işlər də görülür. Onlardan biri A.Ələsgərin Dastan rəvayətlərinin nəşr olunması məsələsidir. Dastan rəvayətlərini mən, Mahmud Allahmanlı və Aynur Xəlilova hazırlayıb. Burda A.Ələsgərin 10-dan dastan rəvayəti cəmləşib və bunları söyləyələnlər də ustad aşıqlardı. Onlardan biri oğlu Talıb Ələsgəroğlunun danışdığı “Aşıq Ələsgər və Səhnəbanu” rəvayətidir. Daha sonra A.Ələsgərin Gəncə, İrəvan, Naxçıvan, Türkiyə və sair səfərlərini də çox böyük aşıqlar danışıblar. Hüseyn Saraclı, İmran Həsənov, Mahmud Məmmədov, Fətulla Göyçəli, Hacı Bayramov kimi ustad aşıqlar dastan rəvayətlərini danışıblar. Bütün bunlar müxtəlif onilliklərdə yazıya alınıb. H.Saraclı Dədə Ələsgərin Gəncə səfərini danışıb və bunun üstündən qırx il keçib. Həmin dastan Qızıl Fondda saxlanılır və biz onu diskə yerləşdirmişik. Elbrus Hüseynov və Şöhrət Kərimovun birlikdə daşıdıqları Dədə Ələsgərin “Söyüdlü səfəri” var. Bu bir ay bundan öncə yazılıb və Azərbaycan Televiziyasının Mədəniyyət kanalında “Saz-söz axşamı” verilişdə də bir saat efirdə verilib. Bütün bunlar bir yerə cəmləşdirilib və təxminən beş saata yaxın Dastan rəvayətləri video-disk şəkilində təqdim olunacaq. 

Bizim növbəti bir diskimiz isə müxtəlif zamanlarda, yəni Dədə Şəmşirdən üzü bəri bütün böyük aşıqlar daxil olmaqla, İmran Həsənov, Ənvər Gülməmmədov, Kamandar Əfəndiyev, Hüseyn Saraclı, Əkbər Cəfərov, İsfəndiyar Rüstəmov, Pənah Pənahov, Şakir Hacıyev, Bəylər Qədirov ustadın sözlərini oxuyublar. Bizim son ifaçılarımız olan Samirə Əliyeva, Altay Məməmmədli, Qələndər Zeynalov, Ağamurad Şirvanlı, Əhliman Şirvanlı, Əli Tapdıqoğlu, Ramin Qarayev kimi aşıqlarımızın ifaları yazılıb diskə daxil ediləcək. Bu diskdə isə 30-dan çox aşığın ifası cəmləşdirilib və Aşıq Ələsgərin müxtəlif saz havaları üstündə 30-dan çox şeiri oxunub. Onun “Ustadnamələri”, “Gözəlləmələr”ini, “Divanilər”ini, “Müxənnəslər”ini aşıqlarımız çox unikal şəkildə ifa ediblər. Hətta bu diskə Cənubi Azərbaycandan olan bir neçə istedadlı aşığın ifalarını əlavə etmişik. Yəni Təbriz aşıqları da burda cəmləşib. Ümumiyyətlə, Aşıq Ələsgərin 200 illiyi ilə bağlı qarşıda görəcəyimiz işlər hələ çoxdur. Bunlar ilkin əlimizdə olan və yaxın zamanlarda işıq üzü görəcək işlərdi”.