Tanınmış Rusiya tibb mütəxəssisi və tele-aparıcı doktor Aleksandr Myasnikov rəsmi Moskvanın koronavirus infeksiyası hallarının artması səbəbiylə rus turistlərin Türkiyəyə gedişini məhdudlaşdırmaq barədəki qərarını tənqid edib. 

 

Moderator.az  xəbər verir ki, televiziya aparıcısı bu haqda fikirlərini URA.RU-ya müsahibəsində səsləndirib. 

 

Tibb mütəxəssisi bəhs olunan addımın Rusiya Federasiyasında “COVID”-in yayılması ilə bağlı problemi həll etməyə kömək etməyəcəyinə əmindir. 

 

“Bir tərəfdən qorxuruq, bağırırıq: “Ay aman, Türkiyədən gəlirlər, hər şey pisdir, hər şey batdı, şef, sərhədləri bağla”. Bəs onda  niyə hamınız peyvənd olunmursunuz? Əvvəlcə beyinlərinizdəki problemi həll edib qərar verin, sonra sərhədləri bağlayın"- deyə rus həkim bəyan edib.  

 

Doktor Myasnikov peyvənd istisna olmaqla heç bir tədbirin koronavirusla mübarizədə kömək etməyəcəyini vurğulayaraq Rusiyaya çoxdan “COVİD-19”-un yeni ştamlarının  gətirildiyini, lakin yayılma saylarının hələ bilinmədiyini söyləyib. 

 

Həkim xaricdən gələn vətəndaşların ciddi bir təhlükə ola bilməyəcəyinə də diqqət çəkib. “...Çünki testlər  sərhədi keçənlərin yalnız 1 faizindən azında müsbət nəticələr göstərir. Eyni zamanda simptomları olan praktik olaraq bir nəfər də olmayıb. Bunlar yalnız “müsbət nəticəli” testlərdir və bir çoxu tamamilə mümkün olan laboratoriya səhvləri ilə doludur" – deyə mütəxəssis bildirib. 

 

Xəbərin sonunda  qeyd edilir ki, Türkiyə rusiyalı turistlər üçün ən sevimli məkandır. Tur-operatorlarının məlumatlarına görə, ruslar sərhədlərin qapalı olacağı dövr üçün putyovka və biletlərə təxminən 32 milyard rubl ödəyib.

 

Xatırladaq ki, Rusiya “COVID-19”-un yayılması ilə mübarizə çərçivəsində aprelin 15-dən iyunun 1-dək Türkiyəyə uçuşların məhdudlaşdırılması barədə qərar qəbul edib.

 

Sultan Laçın