Moderator.az "Yeni Müsavat"-a istinadən xəbər verir ki, SOCAR-ın evlərini sökmək istədiyi məcburi köçkünlər yolu bağladılar; vətəndaşlar şərt qoydular: “Rövnəq Abdullayevin adından danışan Ceyhun adlı mühafizəçi cəzalandırılmasa, seçki günü yolu yenidən bağlayacağıq”.
Oktyabrın 5-də Sabunçu rayonu, Ramana qəsəbəsinin ərazisində yerləşən “Yeni Şuşa” yaşayış massivinin sakinləri ərazidən keçən yolu bağlayıblar. Əraziyə çoxlu sayda polis gəlib. Səhər 10 radələrindən başlayan qarşıdurma axşam saatlarına qədər davam edib. Məşhur “Buta Palace” restoranının arxa hissəsində yerləşən məkana səhər tezdən SOCAR əməkdaşları basqın ediblər. Ceyhun adlı mühafizə rəisinin rəhbərlik etdiyi dəstə qara maskalılardan ibarət olub. Əllərində dəyənək olan maskalılar bir neçə sakini evindən çıxararaq traktorla evləri söküblər. 5 evi söküncə bütün yaşayış massivinin sakinləri ayağa qalxıb. Bunu görən Ceyhun tələsik ərazini tərk edib. Sakinləri bir qədər sonra daha böyük qüvvə ilə geri qayıdacağı ilə hədələyib.
Sakinlər Ceyhunun zülmündən qurtarmaq, hakimiyyət orqanlarının diqqətini cəlb etmək üçün “Yeni Şuşa” massivindən Zabrata gedən yolu bağlayıblar. Bundan sonra əraziyə çoxsaylı polis qüvvələri gətirilib. Əraziyə Sabunçu Rayon İcra Hakimiyyəti başçısının müavinləri gəliblər. Sakinlər bildirdilər ki, Ceyhun barəsində ölçü götürülməsini əraziyə gələn səlahiyyət sahiblərindən tələb ediblər.
Sakinlər Ceyhunun Rövnəq Abdullayevin adından danışdığını bildiriblər: “Ceyhunu bu vəzifəyə yeni təyin ediblər. O deyir ki, mən heç kimi tanımıram, tanımaq da istəmirəm. 5 min manat ver, evin sökülməsin. Deyir, bu pulu mən tək yemirəm. Aparıb yuxarılara verirəm. Deyirik ki, yuxarılar bizim boğazımızdan kəsdiyimiz tikəyə möhtacdır? Deyir ki, mən Rövnəq Abdullayevin adamıyam. Biz də deyirik ki, Rövnəq Abdullayev bu qaçqın-köçkünün tikəsinə göz dikməz. Bu adam bizə göz verib işıq vermir. Prezident seçkilərinə 5 gün qalıb, gəlib ev sökür. Bu adam dövlətə qarşıdır. Əgər onu cəzalandırmasalar, işdən çıxarmasalar, seçki günü yolu bağlayacağıq”.
Biz ərazidə olarkən Sabunçu Rayon Polis İdarəsinin əməkdaşları sakinlərlə yolu açmaq üçün danışıqlar aparırdı. Lakin qaçqınlar müqavimət göstərir və evlərinin sökülməyəcəyinə dair təminat istəyirdilər. Qarşıdurmada iki xanım döyülüb. Axşam saatlarında sakinlərə Ceyhunun cəzalandırılacağı haqda vəd verildi. Onlara bu adam haqda hüquq-mühafizə orqanlarına rəsmi ərizələr yazmaları təklif olundu. Bir neçə dəfə yolu açıb bağlayan köçkünlər nəhayətdə hakimiyyət nümayəndələri ilə razılığa gəldilər. Qaçqınlardan biri hakimiyyət nümayəndələrinə evlərini sökmək istəyən SOCAR əməkdaşlarının onlar üçün ermənidən heç bir fərqi olmadığını dedilər.
Yol açılsa da, şuşalı qaçqınların qəzəbi soyumayıb. Onlardan biri deyib ki, əgər Ceyhun cəzalandırılmasa, ərazidə yeni və daha böyük aksiya keçirəcəklər.