Dünən Ermənistanın Baş naziri Nikol Paşinyan Qarabağdan gələn qondarma parlamentiin nümayəndə heyətini qəbul edib və ilk sözü bu olub:

”İyul hadisələri göstərdi ki, Ermənistanla güc dili ilə danışmaq olmaz”. Qarabağ ətrafında yaranmış gərginlikdən narahatlıqlarını ifadə edən “deputatları” sakitləşdirən Paşinyanın hər bir kəlməsi milli heysiyatımıza toxunur. Bu qədər yuxarıdan aşağı baxmağın səbəbi məlumdur: ermənilər 32 ildi torpaqlarımızı işğal edib və biz bir qərinədən çoxdur ki, özümüzü toparlayıb düşmənə cavab verə bilmirik, yəni torpaqlarımızı işğaldan azad edə bilmirik. Üstəlik, bu illərdə, xüsusilə Paşinyanın iki illik hakimiyyəti dövründə, şəxsən baş nazir özü bizim yuvamıza nə qədər çöp uzatsa da, biz qayıdıb düşməni sancmamışıq. 

Arutunyan da dünən bu tip bəyanatlarını davam etdirib və bizi “sülhə məcbur edəcəkləri” ilə hədələyib.

Paşinyan deyib ki, biz “1988-ci ilin status-kvosuna qayıda bilmərik”.  İlk baxışdan hesab etmək olardı ki, Paşinyan yeni fikir bildirməyib, köhnə bayatılar oxuyur, yalnız çıxışının sonunda faktiki olaraq şantaja keçib. Paşinyan deyib: 

“Azərbaycan  köhnə yolla gedir və belə demək mümkünsə konfidensial  informasiyaları açıqlayır. Azərbaycanlı həmkarlarımıza bu yolla getməməyi məsləhət görürəm, çünki məxfi məlumatları  yaymağa başlasaq, Azərbaycanda daxili siyasi vəziyyət  pozula bilər”. 

Nədi Paşinyanın əlindəki konfidensial məlumatlar ki, açıqlandığı halda, hətta Azərbaycanın daxili siyasi situasiyası pozula bilər? Hesab edirik ki, işğalçı ölkə rəhbərinin bu əsassız şantajına səlahiyyətli şəxslər cavab veriləcək və verilməlidir. 

Amma, bizim söz limitimiz bitib. Ritorikalardan çıxıb işə keçmək vaxtıdır. Bizdə əksik olan əməldir. Düşmənin hər bir sözü bizi qınağa doldurmalıdır, amma illərdir ki, əməli ilə cavab verməli adamların hərəkətliliyini görmürük. Ona görə də, yuxudan duran erməni bizi hədələyir.

Mövcud situasiya tələb edir ki, Azərbaycan beynəlxalq diplomatik dəstəyə önəm verməli, yalnız qoşulmamaq hərəkatının  xüsusi rezonans yaratmayan, məhdud dəstəyi ilə arxayınlaşmamalıdır. Bunun üçün daxilə hesablanmış müəyyən yumşaldıcı addımların atılmasının effekti həm cəmiyyətdə, həm də ölkəni daim tənqid hədəfinə gətirən beynəlxalq təşkilatların  rəyinin müsbətə doğru formalaşmasında  rol oynayacağı şübhəsizdir. Son dəfə dövlət başçısının BMT tribunasından Ermənistanı ittiham edən çıxışının ruhuna uyğun olaraq Xarici İşlər Nazirliyi də hər fürsətdən yararlanmalı, düşmənin işğalçı obrazını bir daha dünyaya tanıtmalı və baş verə biləcək hadisələrin məsuliyyət yükünü məhz Ermənistanın daşıyacağını beynəlxalq aləmə çatdırmalıdır. 

İnformasiya mübarizəsi indi çox önəmlidir. Dünyanın aparıcı informasiya mərkəzləri ilə, media strukturları ilə fəaliyyət istiqamətləri müəyyənləşdirilməli, Azərbaycanın 30 ildir işğala məruz qaldığını, xalqın səbrinin tükəndiyini və haqq və hüququn bizim tərəfimizdə olduğunu, düşmənin sülh danışıqlarını pozduğunu dünyaya inandırıcı formada çatdırmaq lazımdır.

Ölkə KİV-ləri hərbi vətənpərvərlik mövzusnda hər gün danışmalı və yazmalıdır. Kənardan nə qədər dəstək olsa da, yenə də güc xalqın özündədir.

 

Zaman bir daha bizi sınağa çəkir. Bu sınağın mürəkkəb və çətin olduğu məlumdur. O da məlumdur ki, bu sınaqdan şərəflə çıxmaq millətin gələcəyinin, onun dövlətinin varlığının taleyüklü məsələsidir.