“Azərbaycan ordusunun ayrıca və xüsusən Türkiyə ordusu ilə birgə keçirdiyi son təlimlər təqdirəlayiqdir. Bu günlərdə Naxçıvanda  yeni birgə təlim də keçirildi. Bütün bunlar bizi çox ruhlandırır... Amma reallıqda bəzi məsələlər  var ki, 1-ci Qarabağ savaşının od-alovundan keçmiş ixtisaslı, peşəkar bir hərbçi kimi onları deməyi özümə borc bilirəm...” 

Bu fikirləri Moderator.az-a açıqlamasında işğal altındakı torpaqlarımızın azad edilməsi imkanlarından danışan tanınmış Qarabağ qazisi, peşəkar hərbçi, istefada olan polkovnik Azay Kərimov ifadə edib. 

Kiyev Ali Ümumqoşun Komandirlər Məktəbinin məzunu olan polkovnik daha sonra Silahlı Qüvvələrimizin dağ relyefi şəraitində təlimlər keçməyinin vacibliyindən danışıb. 

“Əgər biz gerçəkdən də Qarabağı ermənilərdən azad etmək istəyiriksə, müharibəyə hazırlıq görürüksə,  həmin ərazilərin relyefini mütləq nəzərə almalıyıq. Yəni bilməliyik ki, işğal altındakı torpaqlarımızın əsas hissəsi dağlıqdır. Amma bizim ordunun təlimləri əsasən aran-düzən şəraitində keçirilir. Əslində isə biz daha çox dağ, dərə-təpə relyefinə uyğun döyüş təlimləri keçməliyik. Təsəvvür edirsiz, işğal altındakı Azərbaycan torpaqlarında Ermənistanın yalnız Əsgəran ərazisində bir moto-atıcı piyada briqadası var. Çünki Əsgərandan Azərbaycan ordusuyla təmas xəttinədək düzənlik sahələrdir. Ermənilərin qalan hərbi birləşmələrinin hamısı dağ moto-atıcı briqadaları, alayları, taborlarıdır: Kəlbəcərdən, Laçından tutmuş ta Zəngilana, Cəbrayıladək... Və ermənilər dağ-döyüş təlimlərini real relyefə, şəraitə uyğun keçirirlər. Atın, yaxud qatırın belində “TŞK”, minaatan, patronlar daşınır... Döyüşçülər kəndirlərlə sıldırım qayalara dırmanırlar, darısqal, təhlükəli dağ cığırlarıyla, sıx meşələrlə bellərində ağır silah-sursat, su, ərzaq çantasıyla uzaq məsafələrə sürətli yerdəyişmələr edirlər, kəndirlərin köməyi ilə dərin dərələrdən axan çaylardan keçirlər və s.  Ermənistan ordusu bu gün Rusiya ordusuyla birgə Kamxud, Alagöz kimi dağ təlim poliqonlarında  genişmiqyaslı təlimlər keçir...

Hərbçi belə şəraitlərdə təlim keçməsə, yaxud heç olmasa, bu cür dağlıq ərazilərin sakini olmasa, dağ şəraitində real döyüşdə necə uğur qazana bilər? Məsələn, Bakıda, Bərdədə, Ağcabədidə böyümüş bir gənc, hətta xüsusi təyinatlı olsa belə, Murovun, Dəlidağın, Kirsin sərt yamaclarında ağır yük altında hərəkət edərkən ayağını müəyyən edilmiş bucaq altda atmasa, onun qıçının sınması ehtimalı çox böyükdür. İndiyədək nə vaxt görmüşük ki, hansısa bir taborumuz, alayımız Gədəbəyin, Daşkəsənin, yaxud heç olmasa, Şamaxının, Qusarın, Lerikin, Yardımlının uca dağlarında zirehli texnikanın, helikopterlərin və s. dəstəyi ilə geniçmiqyaslı təlim keçirsin?..”  

“Bu gün gərək Müdafiə Nazirliyinin  balansında dağ şəraitində yaşayan, həm də belə şəraitdə təlim keçmiş kifayət qədər əsgər və zabitlər olsun.  Bizim dağ-döyüş təlimləri keçmək üçün poliqonumuz da yoxdur. Qaraheybətdəki, Gorandakı,  hərbi təlim meydanlarımız- poliqonlarımız, demək olar ki, kiçik təpələr istisna olmaqla dümdüz ərazilərdir... Kimsə bizi günahlandıra bilər ki, guya düşmənlərə hərbi sirri açırıq. Ancaq bunlar göz qabağında olan faktlardır... Amma bütün hallarda Qarabağı azad etmək bizim boynumuzun borcudur... ” -deyə keçmiş kəşfiyyat komandiri bildirib.

Sultan Laçın