Prezident seçkisinə qatılan qurumların mitinq keçirmək planı varmı? “Media forum” saytı sualı prezidentliyə namizədliyi təsdiqlənmiş şəxslərə ünvanlayıb. 

Ümid Partiyasının sədri, deputat İqbal Ağazadə deyib ki, bir neçə mitinq keçirəcəklər: “Bu, strategiyamızda var. Prezident seçkisinə 2008-ci ildə istifadə etdiyimiz “Dəyişək” şüarı ilə gedirik. Mitinqləri seçki qrafiki müəyyən olunduqdan sonra, təbliğat-təşviqat kampaniyası çərçivəsində edəcəyik”.

“Azərbaycan ”“ 2013” hərəkatının lideri, politoloq Ərəstun Oruclu bildirib ki, təbliğat kampaniyası dövründə mitinq keçirəcəklər: “İndi əsas gücümüzü imza toplamağa sərf edirik. Şüarlarla bağlı bir neçə təklifimiz var. İmza toplanışını başa çatdırdıqdan sonra şüarımızı dəqiqləşdirəcəyik”. 

Sosial Demokrat Partiyasının sədri Araz Əlizadə mitinq keçirməyin vaxt itkisi olduğunu söyləyib: “Ona görə də mitinq keçirmək niyyətimiz yoxdur. “Cəmiyyətdə ən nüfuzlu şəxs ana, müəllim, hərbçi olmalıdır” fikri şüarımızdır”.

Vətəndaş və İnkişaf Partiyasının sədri Əli Əliyev deyib ki, partiya piar kampaniyasının

detallarını namizədliyi rəsmən qeydə alındıqdan sonra açıqlayacaq: “Mitinqlər keçirəcəyik. Bir bunu deyə bilərəm”.

Milli Dirçəliş Hərəkatı Partiyasının sədri, deputat Fərəc Quliyev partiyanın seçkidəki şüarlarını açıqlamaq istəmədiyini bildirib: “Əlbəttə, təbliğat-təşviqat kampaniyası çərçivəsində mitinqlər keçirəcəyik. Amma şüarımızı indidən açıqlamaq istəmirəm”.