“Ona görə ki, əvvələr mövcud olan sistem sıradan çıxdı, dağıldı və fərdi taksi xidməti daha çox önə çıxdı. Bu baxımdan hesab edirəm ki, müəyyən bir addımlar atmaq lazımdır ki, bu sahədə hansısa bir irəliləyişə nail ola bilək”

Bunu Moderator.az-a açıqlamasında nəqliyyat üzrə ekspert Elməddin Muradlı deyib. Ekspert taksi sahəsində nəzarət mexanizminin gücləndirilməsinin vacibliyini vurğulayıb:

“İctimai nəqliyyat növlərindən biri də taksi sahəsidir və düşünürəm ki, bununla bağlı ciddi nəzarət növləri olmalıdır. Ona görə ki, əvvələr mövcud olan sistem sıradan çıxdı, dağıldı və fərdi taksi xidməti daha çox önə çıxdı. Bu baxımdan hesab edirəm ki, müəyyən bir addımlar atmaq lazımdır ki, bu sahədə hansısa bir irəliləyişə nail ola bilək. Addımların atılması üçün qanunvericilikdə nəzərdə tutulan məsələlər öz əksini tapmalıdır. Düzdür, əhalinin sosial vəziyyətini də nəzərə alaraq belə addımları atmaq daha faydalı olar, çünki əksər insanlar işsizliyə görə bu sahəyə meyl göstərirlər. Bununla yanaşı, peşəkar taksi fəaliyyəti ilə məşğul olan insanlar da var. Taksi fəaliyyətilə məşğul olan insanları maarifləndirməklə dəvət etmək lazımdır ki, fərqlənmə nişanları alsınlar, avtomobillərini saz vəziyyətdə saxlasınlar. 

Qaldı ki, “London taksi”ləri vizual şəkildə baxanda gözəl görüşünü olan avtomobillərdir, dünyanın bir çox ölkələri bu cür avtomobillərin onlarda olmasına çalışır, amma Azərbaycan bunu neçə illərdir edib. Lakin burda bir məsələ var ki, London taksilərini ölkəyə  Nəqliyyat Nazirliyi gətirirdi və onda müəyyən konfiliktlər ortaya çıxdı, taksilərin də əksəriyyəti satıldı. Bu gün şəhərdə rastınıza çıxan həmin avtomobillər fərdi nəqliyyat vasitəsidir, adamın mülküdür. Ona görə də həmin adamlar istədiyi qiymətə sərnişin aparır. Bununla yanaşı, Nəqliyyat, Rabitə və Yüksək Texnologiyalar Nazirliyinə tabe olan taksilər də var ki, onlara ciddi şəkildə nəzarət olunur. Hava limanlarında xidmət edən bu cür taksi sürücülərinin xarici dil qabiliyyəti də yoxlanılır. Bəzən vətəndaşları aldadan taksi sürücülərinə də rast gəlirik. Amma kimliyindən asılı olmayaraq istənilən halda bu sahədə ciddi nəzarət mexanizmi olmalıdır”.

Qeyd edək ki, Nəqliyyat, Rabitə və Yüksək Texnologiyalar naziri Ramin Quluzadə ölkə başısına məruzəsi zamanı yaxın müddətdə Azərbaycana nazirliyin sifarişi əsasında 100 ədəd “London taksisi” gətiriləcəyini bildirib. Həmin taksilərin özəlliyi isə onların elektriklə işləməsidir.