“Hesab edirəm ki, bu adamları təqaüdə daha tez göndərmək lazımdır ki, vəzifəyə gənc kadrlar gəlsin. Onlar daha çox iş görə, iqtisadiyyata töhvə verə bilərlər”

Bunu Moderator.az-a açıqlamasında “Turan” İnformasiya Agentliyinin rəhbəri Mehman Əliyev yaşlı məmurların təqaüdə göndərilməsi haqda danışarkən deyib.

 M.Əliyev buna görə pensiya yaşını azaltmağı da təklif edib. 

“Yaşlı məmurların vəzifədən getməsinə ehtiyac var. Buna görə də pensiya yaşı kişilər üçün 60, qadınlar üçün isə 57 olmalıdır. Söhbət seçilməyən məmurlardan gedir, seçilən adam 70 yaşına kimi də vəzifədə qala bilər. 40-50 il bundan öncə 20 yaşlı adamla 40 yaşlı adamın arasındakı fikir fərqi çox az idi, çünki informasiyalar, biliklər eyniydi. İndisə informasiya axınları o qədər güclüdür, texnologiya axınları o qədər dəyişib ki, vəzifəyə daha cavan kadrların gətirilməsinə ehtiyac var. İndiki dövrdə kadrlar daha tez dəyişməlidir. 20-30 il vəzifədə oturmaq anormal bir vəziyyətdir. Ona görə də hər şey rahat və çevik şəkildə olmalıdır. Hesab edirəm ki, bu adamları təqaüdə daha tez göndərmək lazımdır ki, vəzifəyə gənc kadrlar gəlsin. Onlar daha çox iş görə, iqtisadiyyata töhvə verə bilərlər. Bu mənada daxili məhsul da, büdcə də, sosial ayırmalar da artacaq. Əslində belə olmalıdır. Bunlar pensiya yaşını ona görə uzatdılar ki, vəzifədə daha çox qalsınlar. Bu gün hamısı vəzifədədir və bəs gənc kadrlar harda işləsinlər?  İş yeri azdır axı. Bizdə yaşlı adamlar vəzifələrdə artıq yorulublar, işləyə bilmirlər, bilikləri azdı, müasir tələblərə uyğun deyillər. Cavan kadr isə iş yeri olmadığı üçün işə gedə bilmir və potensialını itirir. 

Yəni sistem bütövlükdə dəyişməlidir və yeni baxış olmalıdır. Hesab edirəm ki, pensiya yaşına yenidən baxılmalıdır. Bununla yanaşı, hakimiyyət daxili oyun qaydaları da dəyişməlidir. Korrupsiya problemi ortadan yığışdırılmalıdır. Özünün şəxsi maraqlarını vəzifəylə üzləşdirmək olmaz. Vəzifəyə gələn adam onun tələblərinə əməl etməlidir, buna görə konkret maaş alır, xoşu gələn işləyəcək, xoşu gəlməyən yox. Bunlar həyata keçirilməsə, cavan kadr da orda “çürüyəcək”. Ona görə də sistemin sağlamlaşdırılması məsələsinə baxmaq lazımdır. Bu iki məsələ paralel aparılmalıdır. Sağlam münasibətlər və sağlam kadrlar olsa, onda hər şey yaxşı olacaq”.