“Green Card” (Yaşıl kart) qazandıqdan sonra ABŞ-a daimi yaşayış üçün köçən, yaradıcılıq fəaliyyətini orada davam etdirən müğənni Elariz Məmədoğlu vətəndən uzaqda həyatının necə keçdiyindən danışıb. Sənət fəaliyyəti ilə yanaşı Nyu-Yorkda dönərxana açan müğənni yenisabah.az-ın suallarını cavablandırıb:

- Vətəndən uzaqlarda yazıb-yaratmaq mümkündür. Məsələn, bəstəçi Sergey Raxmaninov da Amerikada yazıb-yaradırdı. Hər şey incəsənət adamının professionallığından asılıdır. 

- Bakı və Azərbaycan üçün darıxıram. Azərbaycan yadıma düşəndə ya musiqi dinləyirəm, ya da köhnə dostları arayıram. 

- Mənim istədiyim vaxt Bakıya gəlmək iznim var. İndi çox gözəl zamandır. 

- Əlbəttə, sənət dostlarımın fəaliyyətini izləyirəm. Bəzilərinin repertuarı məni qane edir, bəzilərininki isə etmir, amma hər kəs öz işini daha yaxşı bilir. Görünür, belə lazımdır. İfa tərzi isə rəngarəng olmalıdır. Müğənnilər bir-birini təqlid etməməlidirlər. Əksər müğənnilərimizi bəyənirəm. Bəzilərinin ifa tərzi düzgün olmadığına görə sevmirəm. 

 - Azərbaycanda da, ABŞ-da da işimdən razıyam. Biznesdə uğurum var. Konsertlər, toylar, banketlər və restoran işi vaxtaşırı olur (koronavirusa qədər). Lakin hər şey yaxşı olacaq. (Everything will be fine!)