“Məqsədim gənc nəsillərdə tarixi yaddaşı möhkəmləndirməkdir”-Günel Yaz

“Burada mənim əsas məqsədim Azərbaycan milli dəyərlərini qorumaq və tanıtmaq üçün Qobustan qayaüstü təsvirlərini bir daha cəmiyyətə çatdırmaqdır. Bu, unikal abidələr, xalqımızın tarixi irsinin dərinliklərini və qədim mədəniyyətini əks etdirən qiymətli sərvətlərdir. Yəni çəkilişlərin əsas məqsədi bu dəyərləri ictimaiyyətə daha geniş tanıtmaq, gənc nəsillərdə tarixi yaddaşı möhkəmləndirməkdir”.

 

Bunu Qobustan qayaüstü təsvirləri önündə çəkilən video ilə bağlı BAYRAQDAR MEDİA-nın suallarını cavablandıran Beynəlxalq Türk Mədəniyyəti və İrsi Fondunun əməkdaşı, jurnalist Günel Yaz deyib.

 

Məlumat üçün bildirək ki, sosial şəbəkələrdə Günel Yazın Qobustan qayaüstü təsvirləri önündə, həmçinin, Qobustan qayalıqlarında çəkilmiş maraqlı videogörüntülərinə rast gəldik.

 

Bu görüntülərin çəkilmə səbəbinə aydınlıq gətirmək üçün də məhz Günel Yazın özünə müraciət etdik.

 

G.Yaz onu da əlavə etdi ki, Azərbaycanın mirvarisi sayılan Qobustan, qədim insanların həyatından izlər daşıyan bir açıq hava muzeyidir: “Burada daş dövründən qalma qayaüstü rəsmlər, qədim məskənlər və izlər, tarixin dərinliklərindən bizə mesajlar gətirir. Qobustan insan mədəniyyətinin ilk addımlarını, bəşər tarixinin başlanğıcını görmək üçün mükəmməl bir yerdir. Hesab edirəm ki, tarixlə bağlarımızı qoparmamaq üçün Qobustan kimi yerləri diqqətdə saxlamalıyıq. Ondan yola çıxaraq da bu gözəllikləri və tarix dolu qayaüstü rəsmləri bir daha təbliğ etmək üçün könüllü olaraq bu işi gördüm. Və bir video ilə o hissləri insanlara ötürməyə çalışdım”.