Kainatın ən böyük sirri həll olunur: 13 milyard il əvvəl...

Bizi sosial şəbəkələrdən izləyin:

Massaçusets Texnologiya İnstitutunun (MIT) alimləri James Webb Kosmik Teleskopu (JWST) vasitəsilə 12 milyard il geriyə işıq sürəti ilə səyahət edib.

Moderator.az xəbər verir ki, onlar 10 milyard dollarlıq qabaqcıl teleskop sayəsində kainatın gənc mərhələlərində qaranlıq maddənin və superkütləvi qara dəliklərin sirli təbiəti haqqında təəccüblü tapıntılar ortaya çıxarıb.

NASA, Avropa Kosmik Agentliyi (ESA) və Kanada Kosmik Agentliyi (CSA) tərəfindən hazırlanmış James Webb Teleskopu , NIRCam adlı xüsusi infraqırmızı kameraları sayəsində bizdən milyardlarla işıq ili uzaqlıqdakı qalaktikalardan qədim işığı çəkə bilir. Beləliklə, JWST tərəfindən qeydə alınan hər bir görüntü bizim üçün “yeni” olsa da, əslində kainatda 13 milyard il əvvəl mövcud olmuş bir görüntünü göstərir . Bu xüsusiyyəti ilə JWST “zaman maşını” kimi işləyir və elmi dünyaya kosmik tarix haqqında ətraflı məlumat verir.

MİT astronomları teleskopla 13 milyard il əvvələ aid kvazarları müşahidə edərkən maraqlı bir hadisə ilə qarşılaşıblar. Kvazarlar ətrafdakı qazı və tozu udaraq, kainatın ən parlaq obyektlərindən birinə çevrilərək böyük enerji yayan superkütləli qara dəliklərdir. Bu qədim kvazarlardan bəzilərinin kosmik boşluqda təcrid olunmuş şəkildə mövcud olması alimləri təəccübləndirib.

"Bu kvazarlar o qədər təcrid olunmuş görünürlər ki, onları kifayət qədər maddə ilə təmin edəcək heç bir şey olmadığı halda necə böyüdüklərini anlamaq çətindir. Ən böyük sual kainatın belə təcrid olunmuş yerlərində bu cür kvazarların necə əmələ gəldiyidir", - MIT-də fizika professoru Anna-Kristina Eylers qeyd edib.

Araşdırma aparan alimlərin fikrincə, bu sirli kvazarların əmələ gəlməsi qaranlıq maddə ilə bağlı ola bilər. Cazibə qüvvəsindən başqa məlum maddəyə heç bir təsiri olmayan bu sirli maddənin kainatın ilk dövrlərində qaz və tozu özünə çəkib itələyərək planetlər və ulduzlar kimi kosmik strukturların meydana gəlməsini təmin etdiyi düşünülür. Tədqiqat qrupunun fikrincə , bu kvazarlar tozla örtülmüş gizli qalaktikalarla əhatə oluna bilər.