Bu gün Qurban Qurbanovun “Qarabağ”da baş məşqçi kimi debütündən 11 il keçir.

Təcrübəli mütəxəssis 9 avqust 2008-ci ildə Ağdam klubuna baş məşqçi təyin olunub. O, 11 il öncə bu postda türkiyəli mütəxəssis Rasim Karanı əvəzləyib. Həmin il “Qarabağ”la 1 illik sözləşmə imzalayıb. Müqaviləsinin bitiminə iki ay qalmış isə sözləşməsi daha 3 il uzadılıb.

Onun rəhbərliyi altında Ağdam təmsilçisi 2009-cu ildə finalda "İnter" klubunu 1:0 hesabı ilə məğlub etməklə tarixində üçüncü dəfə ölkə kubokunun qalibi olub. Bununla da Qurban Qurbanov Azərbaycan kubokunu həm futbolçu, həm də məşqçi kimi qazanan ilk şəxs olub.

2009-2010 mövsümündə "Qarabağ" Qurbanovun rəhbərliyi altında UEFA Avropa Liqasının pley-off mərhələsinədək irəliləyib.

Amma onun "Qarabağ"dakı karyerası heç də indiki kimi uğurlu olmayıb. Vaxtı ilə Qurban Qurbanov da istefa şüarları ilə üzləşib. Azarkeşlərin istefa tələbinə baxmayaraq, klub rəhbərliyi Qurbanovla yola davam edib.

2010-2011 mövsümündə "Qarabağ" çempionatın bürünc medalını qazanaraq yenidən UEFA Avropa Liqasında pley-off mərhələsinə qədər irəliləyib.

2011-2012 mövsümü "Qarabağ" üçün uğursuz olub, komanda çempionatda medalsız qalıb və qitəmiqyaslı yarışlara vəsiqə qazana bilməyib.

2012-2013 mövsümünün V turunda AZAL-a 2:6 hesabıyla uduzan "Qarabağ"ın baş məşqçisi Qurban Qurbanov komandadan gedə biləcəyi ilə bağlı açıqlama versə də, klub rəhbərliyi buna imkan verməyib.

Həmin mövsümün sonunda Qurban Qurbanovun başçılıq etdiyi komanda Azərbaycan Premyer Liqasının gümüş medalını qazanıb və UEFA Avropa Liqasında pley-off mərhələsinədək irəliləyib.

2013-2014-cü il mövsümündə Qurban Qurbanov məşqçilik karyerasında "Qarabağ" komandası ilə ilk dəfə Azərbaycan çempionu titulunu qazanıb. Növbəti mövsüm UEFA Çempionlar Liqasında mübarizə aparan ağdamlılar III təsnifat mərhələsində Avstriyanın "Zalsburq" komandasına məğlub olaraq mübarizəni UEFA Avropa Liqasının pley-off mərhələsində davam etdirməli olub. Bu mərhələdə Ağdam klububun rəqibi Hollandiya "Tvente"si olub. İki oyunun nəticəsinə görə rəqibini mübarizədən kənarlaşdıran "atlılar" tarixində ilk dəfə Avroliqanın qrup mərhələsinə vəsiqə qazanıb. Qurbanov 2014/2015 mövsümünü qızıl dublla tamamlayıb. "Qarabağ" 2015-2016 mövsümündə mübarizəyə UEFA Çempionlar Liqasında başlasa da, III təsnifat mərhələsində Şotlandiyanın "Seltik" klubuna uduzub. Buna görə mübarizəni UEFA Avropa Liqasında aparmalı olan Azərbaycan çempionu İsveçrənin "Yanq Boyz" klubunu mübarizədən kənarlaşdıraraq ardıcıl ikinci dəfə bu turnirin qrup mərhələsinə vəsiqə qazanıb.

Sözsüz ki, "Qarabağ"ın bütün uğurları məhz Qurban Qurbanovun adıyla bağlıdır. 47 yaşlı mütəxəssis çalışdığı 11 il ərzində "Qarabağ"ı 6 dəfə ölkə çempionu edib, 4 dəfə isə Azərbaycan kubokunun qalibi olub. 3 dəfə ardıcıl olaraq Avroliqanın qrup mərhələsində iştirak edən "Qarabağ" 2017-ci ildə ölkə futbolu tarixində ilkə imza ataraq Çempiponlar Liqasının qrup mərhələsinə vəsiqə qazanıb.

11 il ərzində Azərbaycan futbolunda, eləcə də "Qarabağ"da çox şey dəyişib. Bütün bunların fonunda Qurban Qurbanov xarakteri dəyişməz olaraq qalır - intizamlıdır, rəqiblərə hörmətlə yanaşır, qazanılan uğurlara baxmayaraq, təvazökarlığından əl çəkmir. Bu da sözsüz ki, ona olan hörməti daha da artırır.

Qeyd edək ki, Qurban Qurbanovun "Qarabağ"ı hazırda da ölkəmizi Çempionlar Liqasında uğurla təmsil edir.(qafqazinfo)