Xocalı soyqırımından 28 il ötməsinə baxmayaraq Azərbaycan tərəfinin bu qanlı olayı dünyaya layiqincə tanıtmaması, düşmənin cavabını hərb meydanında verməməsi Ermənistanın həm Qarabağda, həm də informasiya müharibəsində hələ ki qalib durumda olmasına açıq şərait yaradır.

Nikol Paşinyanın Münhen Təhlükəsizlik Konfransı çərçivəsində keçirilən məlum debat zamanı bu mövzuda Ermənistanı müdafiə etmək üçün dolayısı ilə günahı Azərbaycan Respublikasının birinci Prezidenti Ayaz Mütəllibovun üstünə atması, əslində erməni xislətinə bələd olanlar üçün təəccüb doğurmamalıdır. 

Erməni "paşasının" "Dağlıq Qarabağ digər İttifaq respublikaları kimi keçmiş Sovet ölkəsindən ayrılaraq müstəqillik əldə edib" deməsinə gəlincə isə, Ayaz Mütəllibov bu günlərdə moderator.az saytına verdiyi açıqlamasında bu "ermənibaşın" əsl böhtançı olduğunu tutarlı faktlarla sübuta yetirdi. 

O, öz açıqlamasında - "DQMV, digər müttəfiq respublikalarla birlikdə Sovet İttifaqını tərk etmək məsələsini həll etmək hüququna malik deyildi. Belə ki, bundan ötrü həmin muxtariyyətin heç bir qanuni  səlahiyyəti yox idi" deyə, Paşinyanın yalan danışdığını bildirir. 

A.Mütəllibovun sözlərinə istinad etsək, o zaman ki Ermənistan prezidenti Ter-Petrosyan hətta Dağlıq Qarabağla bağlı bir kəlmə belə artıq söz deməyib. Halbuki, onun özü Qarabağ münaqişəsinin yerli təşəbbüskarı, ssenaristi və rejissoru olub. Ter-Petrosyan bütün MDB prezidentləri kimi Azərbaycanı mövcud sərhədlərdə, yəni Sovet dövründə olan sərhədləri çərçivəsində tanıyıb və digər dövlət başçıları ilə birlikdə bu sənədi imzalayıb. Sonra həmin sənəd əsasında Azərbaycan BMT-yə qəbul edilib. Bu o deməkdir ki, Paşinyan və ya digər "yanlar" nə qədər yansalar da Dağlıq Qarabağ Azərbaycanın həm tarixi, həm də hüquqi baxımdan ayrılmaz hissəsidir.

 

Ancaq Paşinyan özü keçmiş bir jurnalist kimi yəqin ki, britaniyalı jurnalist Tomas de Vaalın 2000-ci ilin dekabr ayında Ermənistanın müdafiə naziri vəzifəsini icra edən Serj Sarkisyanın Karneqi Fondunun saytında yerləşdirilmiş müsahibədə Xocalı soyqırımını bilərəkdən törətdiklərini etiraf etdiyini oxumamış deyil. Bu müsahibə ilə Sarkisyan həmin vaxta qədər hətta Azərbaycanda belə bir çox şübhəli fikirlərə səbəb olan mübahisələrə son qoydu. O, Xocalıda 613 nəfər dinc sakinin ölümü ilə nəticələnmiş soyqırımın məsuliyyətini Ermənistan ordusunun üzərinə götürərək - "Bilirsiniz, belə şeylər barədə yüksəkdən danışmırlar. Nə mümkündür, onu danışırlar. Mən də belə davranıram... Xocalıya qədər azərbaycanlılar düşünürdülər ki, ermənilər sadəcə zarafat edirlər. Azərbaycanlılar bu fikirdə idi ki, ermənilər dinc əhaliyə əl qaldıra bilməyən insanlardır. Bütün bu fikirləri dağıtmaq lazım idi" - deyə, hər şeyi özü açıq etiraf edir. Bu isə o deməkdir ki, Paşinyanın Münhendə Xocalı soyqırımının günahını "küçə söhbəti" səviyyəsində Ayaz Mütəllibovun üstünə atdığı yalanını elə onun küçə hay-küyünə salıb devirdiyi Sarkisyan bu müsahibəsi tamamilə alt-üst edir. 

Bu gün Ermənistanın istər erməni cəmiyyəti, istərsə də siyasi elitası hər hansı bir ədalətli mövqe bildirməkdən uzaqdırlar. Onlarla hansısa şərtlərlə, yəni Dağlıq Qarabağa təklif olunan ən yüksək statusla sülhə nail olmaq mümkün deyil. Əksinə bu kimi təkliflər onları daha da radikal addımlar atmağa sövq edir və yalnız öz xeyirlərinə hesablanmış, Azərbaycana qarşı kəskin şərtlərlə çıxış edirlər.  

Baxın, belə olmasaydı erməni saytlarından birinə açıqlamasında Şuşanın işğalına rəhbərlik etmiş "meşə tülküsü" ləqəbli  general-mayor Arkadi Ter-Tadevosyan - "Ermənistan Qarabağın təhlükəsizliyinin qarantıdır. Bundan əlavə, "Artsax" - Ermənistanın tərkib hissəsidir. Bakıda bunu çox yaxşı bilirlər və buna görə də "Artsax"a qarşı hər hansı bir addımın Ermənistana qarşı bir addım olduğunu və bunun cavabsız qalmayacağını da anlayırlar. Buna görə də Azərbaycan "Artsax" ərazilərini unutsa, daha yaxşıdır. Heç kim Bakıya heç nə verməyə hazırlaşmır" deyərdimi? 

Əslində hamı çox gözəl bilir ki, ermənilərin dünyada hara bir "xaçkar" qoymaları kifayət edir ki, o məkanı həyasızcasına "qədim Ermənistan" torpağı adlandırsınlar. Diqqət edin, əgər Ermənistanın xarici işlər naziri Zohrab Mnatsakanyan Slovakiyanın xarici işlər naziri ilə birgə verdiyi mətbuat konfransında Ermənistan adından İsrailin Yerusəlim şəhərinə iddialı olduğunu elan edirsə, onların az qala 30 ildir işağla məruz qoyduqları Azərbaycanın Dağlıq Qarabağına iddiasından nə vaxtsa əl çəkəcəkləri nə qədər inandırıcı görünə bilər? Bu arada onu qeyd edək ki, Yerusəlimin gələcək statusu ilə bağlı verilən suala Mnatsakanyan - "Ermənistan Yerusəlimin statusu ətrafında baş verən hadisələri xüsusi diqqətlə izləyir, bu, ermənilərin Müqəddəs şəhərdə çoxəsrlik mövcudluğu, zəngin erməni tarixi və mədəni irsi, həmçinin Erməni Apostol Kilsəsinin bu müqəddəs yerlərin kilsələrindən biri olması ilə bağlıdır. Ermənistan hesab edir ki, Yerusəlimin son statusu maraqlı tərəflər arasında aparılan danışıqlar nəticəsində müəyyən edilməlidir və o maraqlı tərəf həm də Ermənistandır" - deyə cavablandırıb.

Odur ki, nə qədər gec deyil, Azərbaycan düşməni beynəlxalq siyasi arenada susdurmaq, öz ərazi bütövlüyünü bərpa etmək üçün düşmənə layiq olduğu cavabı gecikdirməməlidir. İstər Dağlıq Qarabağı azad etmək, istərsə də Xocalı soyqırımını dünyaya tanıtmaq üçün beynəlxalq hüquq Azərbaycanın tərəfindədir. Yəni, beynəlxalq hüquqa görə, soyqırım - sülh və bəşəriyyət əleyhinə yönələn əməldir və beynəlxalq cinayətdir. BMT Baş Məclisinin 1946-cı il 11 dekabr tarixli 96 saylı qətnaməsində göstərilir ki, soyqırım insan qruplarının yaşamaq hüququnu tanımamaqla insan mənliyini təhqir edir, bəşəriyyəti insanlar tərəfindən yaradılan maddi və mənəvi dayaqlardan məhrum edir. Bundan başqa, BMT-nin 1948-ci il tarixli 260 saylı qətnaməsi ilə qəbul edilən və 1951-ci ildə qüvvəyə minmiş "Genosid cinayətlərinin qarşısının alınması və cəzalandırılması haqqında Konvensiya"da soyqırım cinayətinin hüquqi əsası təsbit olunub. Konvensiyaya qoşulan dövlətlər isə sülh və yaxud müharibə dövründə törədilməsindən asılı olmayaraq genosidin beynəlxalq hüququn normalarını pozan cinayət olduğunu təsdiq edərək onun qarşısının alınması və səbəbkarlarının cəzalandırılması üçün tədbirlər görməyi öhdələrinə götürüblər. Bu mənada Ermənistanın Azərbaycana qarşı təcavüzü zamanı adıçəkilən Konvensiyada təsbit olunan soyqırım cinayətlərinin əsasını təşkil edən bütün əməllər təsdiq olunub.

Təəssüf ki, 28 il ötməsinə baxmayaraq Xocalı soyqırımını törədənlər, onun təşkilatçıları və icraçıları hələ də cəzadan kənarda qalıblar. Bütün dünya bilir ki, Xocalı soyqırımı cinayətkar erməni siyasətçiləri və onlara dəstək olan güclərin birgə fəaliyyəti nəticəsində baş verib və XX əsrin sonunda baş vermiş bu soyqırım təkcə Azərbaycan xalqına deyil, bütün insanlığa, bəşəriyyətə qarşı yönəlmiş ən ağır cinayətlərdən biridir.  

Bu gün doğma yurdlarından didərgin düşmüş və Azərbaycanın  rayonlarına səpələnmiş Xocalı sakinləri ilə birlikdə Azərbaycanın bütün vətənpərvər insanları Ermənistanın Azərbaycana qarşı quldur təcavüzünə son qoyulması, Dağlıq Qarabağda yurd salmış terrorçularının məhv edilməsi, Xocalı soyqırımının intiqamının alınmasını, ölkənin ərazi bütövlüyünün bərpa edilməsi, məcburi köçkünlərin isə öz doğma yurdlarına qayıtmaq ümidi ilə yaşayırlar.

Bu arada qeyd edək ki, Xocalı soyqırımına məruz qalmış günahsız insanların xatirəsini əbədiləşdirmək üçün Azərbaycan dövləti paytaxtda "Ana harayı" adlı abidə ucaldıb. Amma abidənin yerləşdirildiyi məkan coğrafi mövqeyinə görə və turizm işi ilə məşğul olan şirkətlərin məsuliyyətsizliyi üzündən turistlərin diqqətindən kənarda qalır. Bununla yanaşı, həmin abidə Azərbaycana gələn xarici ölkələrin rəsmiləri tərəfindən protokol qaydada ziyarət edilmir. Buna üzdən də Xocalı soyqırımını əks etdirən "Ana harayı" abidəsinin yerinin dəyişdirilərək Şəhidlər xiyabanı ərazisinə köçürülməsi, Azərbaycana  qarşı törədilmiş soyqırımını əyani təsvir və təbliğ edən hadisələr barədə müasir standartlara cavab verən məlumatların yerləşdiyi Muzey yaradılmasına böyük ehtiyac var. Bundan əlavə, Azərbaycana gələn xarici ölkə rəsmilərinin "Ana harayı" abidəsini ziyarət dövlət və rəsmi səfərlərin protokollarına daxil edilməsi daha yaxşı olar. Azərbaycanda turizm fəaliyyətini həyata keçirən şirkətlər isə turistlər üçün gəzinti turları müəyyən edərkən bu abidəsinin də həmin marşrut üzərində olmasına diqqət yetirmələri xalqın bu qanlı faciəsini dünyaya tanıtmaq baxımından yaxşı bir addım olar.  Məgər, ermənilər özlərindən uydurduqları "erməni soyqırımı" adlandırdıqları abidələrinin qarşısında ölkələrinə gələn hər bir rəsmi qonağı yalandan əyildib-düzəltmirlərmi?! Yüz ilin tarixi hadisəsindən uydurma "soyqırım" yoğurub  dünyaya yağlı tikə kimi yedizdirmirlərmi? Haqq həmişə güclünün tərəfində olub. Bu güc isə Azərbaycanda var, zaman gözləmir, illər ötüb gedir, 28 ildir "Ana harayı" Azərbaycan ordusunu köməyə haraylayır...