“…Bu gün 35 yaşım tamam olur. Nə qədər acınacaqlı olsa da,  belə bir günü həbsxanada “qeyd” etmək məcburiyyətindəyəm.  “Belə bir gün” dedikdə yalnız insan ömrünü nəzərdə tuturam. Demək olar ki, ömrün ekvatorunu keçib ikinci yarısına qədəm qoyuram. Bu düşüncələrlə geriyə baxmaq, indiyədək etdiyim hərəkətlərə, gördüyüm işlərə qiymət vermək zəruriyyətini hiss edirəm.  Hər halda bu günədək keçirdiyim şüurlu həyat dövründə səhvlərim, artıq hərəkətlərim az olmamışdır, bəlkə də, demək olar ki, həddindən artıq çox olmuşdur.  Ancaq bütün bunlar öz şəxsi həyatımla bağlı məsələlər idi və ən əsası odur ki, heç kəsin şəxsi həyatına qarışmaq və ya şəxsiyyətini alçaldan hərəkətlərə yol vermədiyim üçün bir yüngüllük hiss edirəm.  Nə isə... Deyəsən, artıq sentimental hisslər üstələməyə başlayır – bu isə reallıqdan uzaqlaşmağa gətirib çıxara bilər.  İkincisi isə, insan  nə qədər çalışsa da, öz hərəkətlərinə obyektiv qiymət verə bilməz...” 

Bu sətirlər 26 il öncəki doğum gününü 20 Yanvar qətliamı ərəfəsində Sovet imperiyasına qarşı mübarizəsinə görə həbsə atıldığı keçmiş SSRİ “KQB”-nin “Lefortovo” zindanında keçirmiş Azərbaycan Milli İstiqlal Partiyasının lideri Etibar Məmmədovun “Levortofo gündəliyi” kitabındandır...  Həmin ad  günündə onu ilk təbrik edən, təəssüf ki, rus müstəntiq olub...

 

Bu gün isə artıq azadlıqda, müstəqil Azərbaycanda 66–cı doğum gününü qeyd edən Etibar Məmmədov Moderator.az-a açıqlamasında bildirib ki, 35 yaşı belə çətin və hüznlü, eyni zamanda qeyri-adi şəraitdə tamam olsa da, əvvəlki və sonrakı ömrü boyu da təmtəraqlı, geniş doğum günləri keçirməyi xoşlamayıb. 

 

“Heç azadlıqda olduğum dövrlərdə yubileylərimin də hərəkat və ya partiya  çərçivəsində  geniş və təntənəli şəkildə qeyd olunmasına imkan verməmişəm. Sadəcə, bəzi doğum günlərimi ailə, ən yaxın dostlar çərçivəsində  keçirmişəm. Bu dəfə də belə olacaq...”-deyə partiya lideri bildirib.

 

“Saat 11-də müstəntiq çağırdı. Ad günümü təbrik edib arzu etdi ki, tezliklə azadlığa çıxım və bu şəraitdə doğum günü keçirməyim sonuncu dəfə olsun(Etibar bəy açıqlamasında əlavə etdi ki, həmin gün onu “Lefortovo təcrudxanasının rəisi də təbrik edib-S.L.). Sonra bildirdi ki,  qardaşın Eldar gəlib, ad günün münasibətilə sovqat gətirib və xahiş edir ki, mənə çatdırılsın.  Elə yanımda rəisin müavininə zəng edib bu məsələni həll etdi. Sonra Eldarın göndərdiyi  təbrik məktubunu  verdi və  bildirdi ki, bundan əlavə çoxlu təbrik teleqramı gəlib və təbrik zəngləri olub. Doğrusu, bu, mənim üçün çox gözlənilməz və sevindirici xəbər idi...” –  istiqlalçı deputat  “Lefortovo gündəliyi”ndəki qeydində belə yazır.

 

Biz də Moderator.az olaraq Etibar bəyi daim sevindirici xəbərlər eşitməsi arzusuyla doğum günü münasibətilə təbrik edir, cansağlığı,  şəxsi və ictimai həyatında uğurlar diləyirik.

 

Sultan Laçın