Artıq  yarım ilə yaxındır ki,  “yeni növ koronavirus”, yaxud “COVİD-19”  deyilən mərəzin bütün planeti bürüməsi barədə saysız-hesabsız informasiyalar qulağımızı yağır etməkdədir. Operativ qərargahın məlumatlarına görə, son təxminən 20 gündə  Azərbaycanda  gündəlik yoluxanların sayı 500-ü ötür… Və ən diqqəti cəlb edən məqam odur ki, dünyada olduğu kimi, Azərbaycanda da  məşhur, vəzifəli şəxslərin koronavirusa yoluxması haqda  rəsmi və qeyri-rəsmi məlumatlar  artmaqdadır… 

 

Bəzi oxucularımızı maraqlandıran suallardan biri də məhz kifayət qədər rahat yaşayan,  çoxları elə “dünyanın düz vaxtın”dan özünü, yaşayış və iş məkanını həm təhlükəsizlik, həm də tibbi-gigiyenik baxımdan yüksək səviyyədə qoruyan məşhurların, dünya şöhrətlilərin, ali vəzifəlilərin belə, bu bəlaya mübtəla olmasıdır. Məsələn, Britaniyanın Baş nazirinin özü yoluxur, kraliça Yelizavetanın sarayının xidmətçisində belə, tapılır, Rusiyanın Baş naziri, Kanadanın Baş nazirinin xanımı, dünya şöhrətli digər məşhurlar, müğənnilər, iş adamları və s. yoluxur. Trampın iki dostu bu xəstəlikdən ölür… Və s. və i.a. 

Bu haqda sual verənlər düşünür ki, belə məntiqlə gərək müxtəlif ölkələr kimi, Azərbaycanda da kəskin sıxlıq və  antisanitar  şəraitdə yaşayan insanlar arasında, Allah eləməsin,  nəinki kütləvi xəstəlik, kütləvi ölüm halları da baş verməlidir….

Bu mövzuda suallarımızı cavablandıran tibb elmləri doktoru,  professor, Milli Elmlər Akademiyasının müxbir üzvü, Tibb Universitetinin sabiq rektoru  Yaqub Məmmədov  Moderator.az-a cavabında belə deyib:

“Bilirsiz, bu pandemiya məsələsi öncə dediyim kimi, yalnız tibbi-fizioloji problem deyil, eyni zamanda dünyadakı siyasi, iqtisadi gedişatla da sıx bağlıdır. Hələlik  aparıcı dünya təşkilatlarının, super dövlətlərin istər səhiyyə, istərsə də kəşfiyyat, xüsusi xidmət qurumları   “COVİD-19” deyilən bəlanın dəqiq mənşəyini, yaranma və yayılma səbəblərini dəqiq müəyyən edə bilmədiklərini bəyan edirlər. Belə olan halda məşhurların, yüksək vəzifəlilərin koronavirusa yoluxmasını  onların da karantin rejiminə, sanitar-gigiyenik qaydalara riayət etməkdə səhlənkarlıq göstərmələri ilə izah etmək olar. Yəni varlı, imkanlı olmalarına, komfort  şəraitdə yaşamalarına rəğmən  onlar da digərləri, yoxsullar, vəzifəsizlər kimi insandırlar. Onların da orqanizmləri, ağciyərləri, beyinləri, ürəkləri, qan dövranları, maddələr mübadiləsi və s. eyni mexanizm üzrə işləyir… Odur ki, gəlin arzu edək ki, bütün dünyada, digər ölkələr də olduğu kimi, müsəlman, türk dünyasında, o cümlədən Azərbaycanda  nə varlının, nə kasıbın, nə məşhurun, nə də adi vətəndaşın başqa ağır xəstəliklər kimi, koronavirusa da yoluxması barədə xəbərləri eşitməyək…” –deyə tibb alimi bildirib.

 

Sultan Laçın