Sumqayıtda partlayış olan binanın sakinlərinə ŞAD XƏBƏR – RƏSMİ AÇIQLAMA

“Dekabrın 3-də Sumqayıt şəhərinin 13-cü mikrorayon ərazisindəki yaşayış binasında baş vermiş partlayışın nəticələrinin aradan qaldırılması istiqamətində tədbirlər davam etdirilir”.

Bu barədə Medianews.az-a açıqlamasında Sumqayıt Şəhər İcra Hakimiyyətinin Mətbuat Xidmətinin rəhbəri Eyvaz Qocayev məlumat verib.

O qeyd edib ki, təhlükəsizlik məqsədi ilə binada ilkin bərkitmə işləri həyata keçirilib: “Binanın 6 girişi var və artıq 3 girişdə yaşayış təmin olunub. Hazırda partlayış baş verən girişdə insanlara əşyalarını çıxarması üçün şərait yaradılıb. Onların müvəqqəti mənzil kirayəsi xərclərinin ödənilməsi dövlət hesabına həyata keçiriləcək. Aidiyyəti qurumların rəyi əsasında binada tədbirlər görüldükdən sonra sakinlər mənzillərinə köçürüləcəklər”.

Xatırladaq ki, dekabrın 3-də Sumqayıt şəhər 13-cü mikrorayon, 19 saylı binada partlayış baş verib. Nəticədə 6 nəfər xəsarət alıb. Onlardan ikisi, 1977-ci il təvəllüdlü Ramin Əliyev və 2007-ci il təvəllüdlü Ayxan Əliyev xəstəxanada vəfat edib.