"Trampın hərbi səlahiyyətləri məhdudlaşdırılmalıdır" - ABŞ Konqresində yeni qarşıdurma

Bizi sosial şəbəkələrdən izləyin:

"Demokratlar prezidentin İranla bağlı qərarlarına nəzarəti geri qaytarmağa çalışır..."

ABŞ-da Donald Trampın elan etdiyi iki həftəlik atəşkəsə baxmayaraq, ölkə daxilində siyasi gərginlik daha da artır.

Moderator.az xəbər verir ki, bu barədə "israelinfo.co" nəşri yazıb.

Nəşr yazır ki, demokratlar Konqresdə prezidentin hərbi qərarlarını məhdudlaşdırmaq üçün növbəti addıma hazırlaşır. Məqsəd - Ağ Evi gələcək hərbi əməliyyatlar üçün Konqresdən rəsmi icazə almağa məcbur etməkdir.

Konqres nəzarəti geri almaq istəyir

Senatda demokratların lideri Çak Şhumer bəyan edib ki, ölkə "təhlükəli mərhələdədir" və qanunverici hakimiyyət öz konstitusion səlahiyyətlərini geri qaytarmalıdır. Onun sözlərinə görə, prezidentin hərbi addımları üzərində nəzarət dərhal bərpa olunmalıdır. Bu açıqlama Trampın İranla bağlı iki həftəlik atəşkəs razılaşmasını elan etməsindən cəmi bir neçə saat sonra səslənib. Prezident eyni zamanda bildirib ki, hərbi əməliyyatlar istənilən an bərpa oluna bilər.

Sərt ritorika və artan tənqidlər

Atəşkəsdən əvvəl Tramp Tehrana ultimatum verərək Hörmüz boğazı üzərindən blokadanın dərhal götürülməsini tələb etmişdi. Əks halda, İranın mülki infrastrukturu hədəf alınacağı ilə hədələyib.

Onun "əks halda bu axşam bütöv bir sivilizasiya məhv olacaq" kimi açıqlamaları həm beynəlxalq aləmdə, həm də ABŞ daxilində ciddi tənqidlərə səbəb olub. Demokratların bir qismi bu ritorikanı qəbuledilməz adlandıraraq, hətta prezidentin vəzifədən uzaqlaşdırılmasını gündəmə gətirib.

Şumer isə bu çıxışları "tarazlığını itirmiş bəyanatlar" kimi qiymətləndirib və əlavə edib ki, müharibə strateji baxımdan da uğursuz olub: İran hakimiyyəti zəifləməyib, nüvə proqramı dayandırılmayıb, əvəzində enerji qiymətləri kəskin artıb.

Respublikaçılar maneə yaradır, mübarizə davam edir

Buna baxmayaraq, Ağ Ev Trampın addımlarının qanuni olduğunu və onun baş komandan kimi səlahiyyətləri çərçivəsində hərəkət etdiyini bildirir.

Konqresdə isə vəziyyət demokratlar üçün çətindir. Hər iki palatada az fərqlə üstünlük əldə edən respublikaçılar prezidentin siyasətini dəstəkləyir və bu, hərbi səlahiyyətlərin məhdudlaşdırılması təşəbbüslərinə ciddi maneə yaradır.

Nümayəndələr Palatasında demokratların lideri Hakim Ceffris də bu təşəbbüsə qoşularaq bildirib ki, Konqres "Trampın başladığı bu düşünülməmiş müharibəyə son qoymalıdır". Beləliklə, qarşıdakı həftə ABŞ siyasəti üçün həlledici ola bilər: Konqres prezidentin hərbi qərarlarını məhdudlaşdıra biləcəkmi, yoxsa Ağ Ev öz kursunu davam etdirəcək.