"Rusların Ukrayna Silahlı Qüvvələrini sıxışdırıb çıxarmaq cəhdlərinə baxmayaraq, Kursk vilayətindəki Ukrayna platsdarmı iki aydır mövcuddur və təcavüzkarın xeyli qüvvəsini cəlb edir. Bu o deməkdir ki, əməliyyat özünü doğruldub". 

 

Moderator.az "UNİAN"-a istinadla xəbər verir ki, israilli hərbi icmalçı İqal Levin belə deyib.

 

O qeyd edib ki, payız yağışları dövrünün başlanması ilə Ukrayna Silahlı Qüvvələrinin Kursk vilayətindən tam çıxarılması ehtimalı azalır. Eyni zamanda, təqribən 10 min döyüşçüsü olduğu təxmin edilən kiçik bir Ukrayna qruplaşması burada təxminən 30-50 min nəfərlik Rusiya qüvvələrini sıxışdırır.

 

“Əgər bu qiymətləndirmələr düzgündürsə, o zaman Ukrayna Baş Qərargahının düşmənin resurslarının şaxələndirilməsi planı uğurlu olub, əgər Suca tam qışdan və soyuq havadan əvvəl geri alınmasa, ukraynalılar onu (əgər onsuz da belə deyilsə) məhz yaza doğru əsil müdafiə qovşağına çevirəcəklər”, – deyə Levin diqqətə çatdırıb.

 

O, Rusiya aviasiyası və artilleriyasının hazırda Kursk vilayətində kəndləri yerlə-yeksan etməsinə də diqqət çəkib. "Bu, özlüyündə ürək açmasa da, əks halda həmin bombalar və mərmilər Ukraynanın kənd və şəhərlərinə yağacaqdı", - deyə analitik vurğulayıb.

 

 

"UNIAN"-ın yazdığı kimi, Rusiya Ukrayna Silahlı Qüvvələrini Kursk vilayətindən çıxarmaq üçün bir neçə dəfə cəhd edib. Təcavüzkar müəyyən taktiki uğurlara nail ola bilsə də, prezident Zelenski Ukrayna Silahlı Qüvvələrinin özlərinə təyin edilmiş xətləri qoruduğuna əminliyini ifadə edir.

 

Bu arada, Qərb mediası Ukraynanın tezliklə Kursk platsdarmına nəzarəti itirəcəyi ilə bağlı depressiv xəbərlərlə dolub. Eyni zamanda, Kursk əməliyyatının guya öz məqsədlərinə çatmadığına dair iddialar da səslənir...

 

S.Laçın