"Boris Yeltsin tərəfindən 1991-ci il oktyabrın 18-də siyasi repressiyalar qurbanlarının reabilitasiyası haqqında imzalanmış qanun Rusiya hakimiyyətinin sovet rejiminin cinayətlərini birbaşa pislədiyi yeganə qanunverici aktıdır..."

 

Rusiyanın Baş prokuroru İqor Krasnov siyasi repressiyalar qurbanlarının reabilitasiyası haqqında qərarlara yenidən baxılması barədə fərmanın layihəsini hazırlayıb.

 

Moderator.az xəbər verir ki, bu barədə "gordonua.com" nəşri məlumat yayıb.

 

Buna səbəb hökumət tərəfindən 20 iyun 2024-cü ildə siyasi repressiya qurbanlarının xatirəsinin əbədiləşdirilməsi üzrə dövlət konsepsiyasının yenilənməsi olub.

 

Konsepsiyanın özü hələ 2015-ci ildə qəbul edilib. Birinci versiyada deyilib ki, onun məqsədlərinə nail olmaq üçün "sovet dövrünün həm nailiyyətləri, həm də onun faciəli səhifələri, o cümlədən kütləvi siyasi repressiyaların" obyektiv təhlili aparılmalıdır. 

 

2024-cü ilin iyununda hökumət bu ifadədən "kütləvi" sözünün çıxarılması, "sovet dövrü" ifadəsinin isə "Rusiya dövləti" ifadəsilə əvəzlənməsi barədə sərəncam verib. 

 

Həmçinin dini konfessiyaların nümayəndələrinin repressiyaları, zorən kollektivləşdirmə, 1920-1950-ci illərin repressiyalarının qanunsuz hesab edilən qərarları barədə məlumarlar, habelə 1991-2014-cü illərdə reabilitasiya edilənlərin rəqəmləri çıxarılıb.

 

Krasnovun fərmanında "xüsusilə ağır və ağır cinayətlərin, hərbi cinayətlərin, sülh və insanlığa qarşı cinayətlərin törədilməsində təqsirli bilinən şəxslərin reabilitasiyası və bəraət  qazandırılmasının yolverilməz olduğu" deyilir. 

 

Baş prokuror "daimi əsaslarla belə qərarların aşkara çıxarılması və ləğv edilməsi üzrə işin təşkilini" təklif edir, bu zaman "nasistlərin əlaltılarına və Vətən xainlərinə bəraətin yolverilməz olduğu" vurğulanır.

 

Prokurorluq orqanlarının "tarixi həqiqətin müdafiəsi konstitusiya prinsipinə əsaslanan" fəaliyyətinin KİV-lərdə geniş işıqlandırılması planlaşdırılır.

 

Siyasi repressiyalar qurbanlarının reabilitasiyası haqqında qanun 18 oktyabr 1991-ci ildə Rusiya prezidenti Boris Yeltsin tərəfindən imzalanıb. İndiyədək bu qanun Rusiya hakimiyyətinin sovet rejiminin cinayətlərini birbaşa pislədiyi yeganə qanunverici aktıdır.