"Estoniyanın həbsxana məkanına maraq xeyli artıb, həm britaniyalılar, həm də isveçlilər orada öz məhbuslarını yerləşdirmək istəyir..."

 

Estoniyada cinayətkarlığın səviyyəsi aşağıdır, həbsxana kameralarının yarısı boş qalıb, onların saxlanılması sərfəli deyil.

 

Moderator.az xəbər verir ki, bu barədə Ukraynanın "Лiга.net" nəşri yazıb.

 

Ölkənin Ədliyyə Nazirliyi çıxış yolu tapıb. Həbsxanalarda olan boş yerlər əcnəbi məhbuslara icarəyə veriləcək. Bu, Estoniyaya ildə 30 milyonadək avro gəlir gətirə bilər. Bu barədə ədliyyə və rəqəmsal texnologiyalar naziri Liyza-Li Pakosta bəyan edib.

 

Estoniya Avropa İttifaqının cinayətkarlığın ən aşağı səviyyədə olan dörd ölkəsindən biridir, ona görə də Estoniya həbsxanalarının yarısı boş qalıb. Estoniyada 3 min məhbus üçün üç yeni həbsxana var, həm də Tallində işlək olmayan köhnə həbsxana var. Ədliyyə Nazirliyi Nazirlər Kabinetinə həbsxana təsərrüfatının necə optimallaşdırılması və həbsxana xərclərinin necə azaldılması ilə bağlı təkliflər təqdim edib.

 

Nazirlik üç variant təklif edir, bunlar həbsxanaların satışı,

konservləşdirilməsi və icarəyə verilməsidir. Birinci variant sərfəli hesab edilməyib, çünki həbsxalaların satışı çətindir, personalı işdən çıxarmaq lazım gələcək. İkinci variant, yəni konservasiya ildə 10 milyon avroya başa gələcək.

 

"Həbsxana yerlərini icarəyə verməklə biz daha çox insanı tamamilə normal əmək haqqı olan işlə təmin edə bilərik. Biz büdcə kəsiri ilə bağlı bir sıra məsələləri həll edə bilərik", - nazir deyib. Bundan öncə həbsxana xidmətinin rəhbəri Rayt Kuuze bəyan edib ki, artıq Estoniyanın həbsxana məkanına  maraq xeyli artıb. Həm britaniyalılar, həm də isveçlilər orada öz məhbuslarını yerləşdirmək istəyir.

 

Avropa İttifaqında artıq belə presedent var, 2015-ci ildə Norveç öz həbsxanalarını artıq yükdən azad etmək üçün 242 nəfər məhbusu Niderlandın Venheyzen şəhəri yaxınlığındakı ciddi rejimli həbsxanaya göndərib. Niderlandda həbsxanalar norveçlilər tərəfindən idarə edilib, personal isə hollandlardan ibarət olub. Kameraların icarə haqqı ildə 22 milyon avrodan artıq başa gəlib, Almaniyanın "Bild" nəşri yazıb.

 

Estoniya həbsxanalarında həmçinin əcnəbi məhbuslar var. Söhbət Tartu şəhərində üç hərbi cinayərkardan gedir, daha bir nəfər etap ediləcək.

 

Nazirin sözlərinə görə, Estoniya həmçinin Rusiya ilə mümkün hərbi münaqişə olacağı təqdirdə hərbi əsirlər üçün həbsxanaları saxlamaq istəyir. "Hərbi əsirlərin götürülməsi o demək olacaq ki, biz onları estonların mübadiləsi üçün istifadə edəcəyik", - Pakosta deyib.