“Hazırda Ermənistan Amerika Birləşmiş Ştatları, Avropa Birliyi və Fransanın tam nəzarətindədir. Hətta, bunu daha asan şəkildə Ermənistan, Avropa Birliyi və Fransanın siyasi müstəmləkəsi vəziyyətinə düşüb kimi də ifadə etmək mümkündür.

 

Bu sözləri Moderator.az-a açıqlamasında siyasi ekspert Elçin Xalidbəyli bildirib.

 

“Burda təhlükəli məqam ondan ibarətdir ki, Ermənistanı Cənubi Qafqazda geopolitik alət kimi istifadə edilir. Qərb, Amerika Birləşmiş Ştatları, Avropa Birliyi və Fransa Ermənistan üzərindən Cənubi Qafqaza yerləşməyə can atır. Artıq Amerika Birləşmiş Ştatlarının Ermənistanda qeyri-leqal hərbi bazası yaradılıb. Həmin hərbi bazada ABŞ ordusunda xidmət edən erməni mənşəli hərbiçilər, Ermənistan ordusunun uniforması geyindirilərək, Zəngəzur bölgəsinə yerləşdirilib. Zəngəzur bölgəsində Ermənistan ordusun hərbi bazası var ki,  oraya, həmin bazaya  yerləşdiriblər.  Yəni, bu prosesi ört-basdır etməyə çalışıblar. ABŞ-ın həm Ermənistandakı, həm də Azərbaycandakı səfiri bu məlumatı təqzib etməyə çalışsa da, buna nail ola bilmədi. Əksinə, bu təqzib etiraf xarakteri daşımış oldu.  Hazırda problem ondan ibarətdir ki, bütün bunların qarşılığında təbii ki, Amerika Birləşmiş Ştatlarının Ermənistandan bir sıra tələbləri var. O tələblərdən əsasən 2 istiqamət üzrə Cənubi Qafqazı kifayət qədər ciddi təhlükələr gözləyir. Birinci tələb istiqaməti ondan ibarətdir ki, Ermənistan sürətlə silahlandırılır və rəsmi İrəvandan, Paşinyan hakimiyyətindən tələb olunur ki, Cənubi Qafqazda hərbi-siyasi situasiyanı maksimum səviyyədə gərginləşdirsin hətta, genişmiqyaslı olmasa da, qısa müddətli lokal hərbi toqquşmalar törətməyə nail olsun. Yəni, Cənubi Qafqazda bir savaşın törədilməsi ABŞ və Qərb üçün sərfəlidir. Strateji hədəflər baxımından Qərbin maraqlarına tamamilə cavab verir. Çünki, savaş baş verərsə, Qərb bundan bəhanə kimi istifadə edib, Ermənistana rəsmi şəkildə hərbi kontingentlə yerləşmək və yaxud da yerləşdirdiyi qeyri-leqal bazanı leqallaşdırmaq bəhanəsi qazana bilər. Belə bir savaş baş versə, bunun Azərbaycana qarşı olduğunu anlamaq çətin olmaz.  Bu o deməkdir ki, ABŞ , Avropa Birliyi və Fransa faktiki olaraq, Ermənistanı silahlandırıb, savaşa sövq etməklə Azərbaycana qarşı yeni savaş törədicisi, sponsoru kimi çıxış edir. 

Digər tərəfdən Ermənistandan Rusiyanın patron azlığı altında olan bütün qurumlardan kənarlaşmağı tələb olunur. İlk növbədə də Kollektiv Təhlükəsizlik Müqaviləsi Təşkilatından çıxsın. Son məlumatlara inansaq, deyə bilərik ki, Paşinyan hakimiyyəti artıq sentyabr ayında bu istiqamətdə konkret addımlar atmağa hazırlaşır. Hətta, komandasında ciddi təmizlik apararaq buna etiraz edə biləcək yəni, Ermənistanın Kollektiv Təhlükəsizlik Müqaviləsi Təşkilatından çıxmasına müqavimət göstərəcək, etiraz edə biləcək məmurları hakimiyyət strukturlarından kənarlaşdırmağa çalışırlar. Xüsusilə də səfirlərə Paşinyan hakimiyyətinin qərarları ilə razılaşmayacaqları təqdirdə, istefa vermək təklif olunur. Yəni, vəziyyət kifayət qədər qəlizdir. Böyük ehtimalla  yaxın həftələrdə xüsusilə sentyabr ayı ərzində Ermənistan Cənubi Qafqazda ikinci cəbhənin açılması ilə bağlı öhdəlik götürüb. Belə hiss olunur. Hətta, Paşinyan hakimiyyətinə yaxın şəxslər sentyabr ayında Ermənistanın gələcək taleyi ilə bağlı çox prinsipial, ciddi, qeyri-standart və radikal  addımların, siyasi qərarların qəbul olunacağına eyham vururlar. Belə anlaşılır ki, senytabr ayında təhlükəli situasiya daha da inkişaf etmiş olacaq. O baxımdan hesab etmək olar ki, Paşinyan hakimiyyəti öz mövqelərini qorumaq üçün həm Ermənistanı, həm də Cənubi Qafqazı çox böyük risk altına atmaq üzrədir. Qərb Cənubi Qafqazı böyük savaşa doğru sürükləyir. Qərbin maraqları üçün Cənubi Qafqaz dövlətləri riskə atılır. Ukrayna savaşına paralel olaraq, Cənubi Qafqazda da Rusiyanın cənub sərhədlərində bir müharibənin olması və bura Qərb hərbi kontingentlərini yerləşdirməsi bəhanəsi qazanması məqsədilə çox təhlükəli oyunlar, məkirli planlar işə salınmış durumdadır.  Ona görə də hesab etmək olar ki, yaxın həftələrdə xüsusilə də, payız aylarında Cənubi Qafqaz qarışa bilər. Həm savaş baş verə, həm də ki, ikinci cəbhə açıla bilər. Əsası da Ermənistanın gələcək taleyi ilə bağlı çox ciddi hadisələr baş verə bilər. Yəni, Paşinyan hakimiyyəti hətta, Ermənistanın dövlətçiliyini, mövcudluq şərtlərini böyük risk altına alır. Çünki, əgər bu dəfə savaş başlayarsa, Ermənistana heç bir güzəşt edilməyəcək. Bu Ermənistana çox baha başa gələcək. Ona görə də düşünmək olar ki, hazırda Cənubi Qafqazda olduqca təhlükəli bir situasiya yaranıb və əgər, bu situasiya savaşa çevrilərsə, bütün siyasi məsuliyyəti Amerika Birləşmiş Ştatları, Avropa Birliyi və Fransanın üzərinə düşəcək”.