Yay tətilinin sonuna gəlirik. Artıq teatrlar da sentyabrdan etibarən yeni mövsümə başlayacaq. Tamaşaçıların da, teatr xadimlərinin də ildən-ilə gözləntiləri yüksəlir. Yeni layihələr, maraqlı tamaşalar istəyindədirlər. 

 

 

Bu sualla teatrların mətbuat katibləri ilə əlaqə saxlayaraq yeni mövsümdə teatrların iş fəaliyyəti haqqında xəbər aldıq.

 

 

Milli Dram Teatrında dörd yeni tamaşa hazırlanacaq 

 

2024-cü ilin sonuna qədər Akademik Milli Dram Teatrında dörd yeni tamaşa hazırlanacaq. Teatrın mətbuat xidmətindən verilən məlumata görə, artıq yaradıcılıq işlərinə başlanılan və Uilyam Şekspirin “Maqbet” faciəsinin motivləri əsasında hazırlanacaq “Ledi Maqbet” tamaşası Xalq artisti Bəsti Cəfərovanın yubileyi münasibəti ilə benefist tamaşa olacaq. 

 

Yeni səhnə əsərinin quruluşçu rejissoru əməkdar artist Nicat Kazımov, quruluşçu rəssamı Samirə Həsənova, bəstəkarı Azər Hacıəsgərli, rəqslərin quruluşçusu Lalə Hacıyeva, rejissor assistenti Ceyran Başarandır.

 

Yeni mövsümdə premyerası keçiriləcək daha bir səhnə əsəri “Müharibə” olacaq. Mehriban Ələkbərzadə və Nihad Qulamzadənin eyniadlı əsəri əsasında hazırlanacaq tamaşanın quruluşçu rejissoru Nihad Qulamzadə, quruluşçu rəssamı Eldar Nağıyev, bəstəkarı Nigar Süleymanova, rejissor assistenti Könül Kərimovadır.

 

Akademik Milli Dram Teatrı uzun illərdən sonra yenidən Cəfər Cabbarlının “Aydın” əsərinə müraciət edib. Ərşad Ələkbərovun quruluşunda təqdim olunacaq yeni tamaşanın rəssamı Şəki Dövlət Dram Teatrının baş rəssamı Sahib Əhmədov, musiqi tərtibatçısı Azər Hacıəsgərli, rejissor assistenti Vüqar Məmmədovdur.

 

Milli Teatrın növbəti yaradıcılıq işi məşhur fransız yazıçı-dramaturqu Rober Tomanın “Səkkiz qadın” pyesi əsasında hazırlanacaq eyniadlı tamaşadır. 

 

Tamaşanın quruluşçu rejissoru Dövlət mükafatı laureatı, Əməkdar incəsənət xadimi Mehriban Ələkbərzadə, quruluşçu rəssamı Əməkdar mədəniyyət işçisi İlham Əsgərov, bəstəkarı Əməkdar incəsənət xadimi Vaqif Gərayzadə, rəqslərin quruluşçusu Ceyhun Dadaşov, rejissor assistenti Nərmin Həsənovadır.

 

 

Musiqili Teatr yeni mövsümə Milli Musiqi Günündə başlayacaq

 

Azərbaycan Dövlət Akademik Musiqili Teatrı hər il olduğu kimi, 115-ci mövsümündə də maraqlı layihələrlə teatrsevərlərin görüşünə gələcək. 

Mövsümün açılışı 18 Sentyabr – Milli Musiqi Günündə dahi bəstəkar Üzeyir Hacıbəylinin “O olmasın, bu olsun” (quruluşçu rejissor Cənnət Səlimova) tamaşası ilə başlayacaq. 

Dörd gün ardıcıl davam edəcək ənənəvi “Üzeyir Hacıbəyli Həftəsi” çərçivəsində bəstəkarın “Leyli və Məcnun” (quruluşçu rejissor və libretto müəllifi Samir Qulamov), “Ər və arvad” (quruluşçu rejissor Yusif Əkbərov), “Arşın mal alan” (quruluşçu rejissor Elvin Mirzəyev, bərpaçı rejissor Əhəd Hacıyev) tamaşaları da nümayiş olunacaq.   

Sentyabrın 22-də “Nəğməmə inan” (Polad Bülbüloğlu, Mixail Şerbaçenko, quruluşçu rejissor Cavid İmamverdiyev), 28-də “Qızıl toy” (Oqtay Kazımi, Ramiz Heydər, quruluşçu rejissor Yusif Əkbərov), 29-da Bəxtiyar” (Tofiq Quliyev, səhnələşdirən və quruluşçu rejissor Cavid İmamverdiyev) səhnə əsərləri  oynanılacaq. Tamaşalar axşam saat 19:00-da başlayacaq.

Qeyd edək ki, teatrda məşqləri uğurla davam etdirilən "Bir qalanın sirri" (Rauf Hacıyev, Məhəmmədhüseyn Təhmasib, quruluşçu rejissor və səhnələşdirən Elməddin Dadaşov), “Əliqulu evlənir” (Oqtay Rəcəbov, Sabit Rəhman, libretto müəllifi və quruluşçu rejissor İlham Namiq Kamal), "Palata" (Anton Çexov, quruluşçu rejissor Ər-Toğrul), "Killerdən teleqram" (Pərviz Seyidli, quruluşçu rejissor Zaur Əliyev) və digər tamaşaların premyeralarına hazırlıq işləri də görülür.

Yaradıcı heyət il boyu istər ölkəmizdə, istərsə də onun hüdudlarından kənarlarda maraqlı layihələrdə çıxış edəcək. 

 Bütün teatrsevərləri Azərbaycan Dövlət Akademik Musiqili Teatrının bir-birindən maraqlı layihələrini izləməyə, səhnə əsərlərinin tamaşaçısı olmağa dəvət edirik.

 

 

Sentyabr ayının 3-dən  teatrda iş günü başlanır. 

 

Bildiyimiz kimi, bu tarixdə bütün teatrlarda iş günü başlanır. Çünki, senytabrın 1-i parlament seçkiləridir. Növbəti gün istirahət günüdür. Üçündən isə artıq teatr iş rejiminə başlayacaq.  

21 sentyabrda isə 97-ci teatr mövsümümüz açılır. Bu münasibətlə gündüz saat 12:00-da Cənnət Səlimovanın quruluşunda uşaqlar üçün “Qaraca qız” tamaşası uşaqlar üçün təqdim olunacaq. Axşam saat 19:00-da Pyer Bomarşenin eyniadlı əsəri əsasında Nicat Kazımovun quruluşunda “Fiqaronun toyu” tamaşası nümayiş olunacaq. Bu tamaşa ötən mövsümün sonuncu premyerası olmuşdur. Biz  iyun ayında bu tamaşanı təhvil verib, istirahətə yollanmışdıq.  Elə  tamaşa ilə də mövsümü açacağıq. 97-ci mövsüm üçün hələ ki, planlarımız əməkdar artist Nicat Kazımovun quruluşunda İlqar Fəhminin “Şahnamə” pyesi əsasında hazırlanan eyniadlı tamaşası olacaq. Yəqin ki, 97-ci mövsümdə tamaşanın oxunuş məşqləri və daha sonra məşqləri başlanacaqdır. Bir də “Cırtdan” nağılı əsasında Elşad Rəhimzadənin “Cırtdan” tamaşası hazırlanmağa başlayacaqdı. 

Əlavə edim ki, ötən mövsümdən “Man Feyerbax”am monotamaşı festival üçün nəzərdə tutularaq hazırlanmışdı. Amma bu cür tamaşalar festival üçün hazırlansa da, sonralar teatrın repertuarına daxil olur. Adını çəkdiyim monotamaşa Cənnət Səlimovanın quruluşundadır. 

Baş rolda əməkdar artist Şövqi Hüseynov iştirak edəcəkdi. 

Bu tamaşa da hazırlanırdı. Sadəcə, tamamlanmayıb.   97-ci mövsümdə bu tamaşanı bitirib, festivala yollanacağıq. Sonra da tamaşaçılara təqdim edəcəyik.

 

 

Yeni mövsümümüz ilk toplantımız ilə sentyabrın üçü başlayacaq. 

Mövsümün ilk tamaşası sentyabrın iyirmisində olacaq. Sözsüz ki, ənənəmizə sadiq qalaraq mövsümü premyera ilə açacağıq. Premyera tamaşamız da yerli müəllif Sevinc Elsevərin “Lokomativ və vaqonlar” əsəri əsasında hazırlanmış eyniadlı tamaşadır.  Tamaşanın quruluşçu rejissoru Anar Məmmədov, quruluşçu rejissoru Rəvanə Yaqubova, bəstəkarı Vüqar Cəmalzadədir.  Tamaşa həmin gün iki seans 12:00 və 14:00-da  göstəriləcək. 

16:00-da isə repertuarımızdakı “Düyməcik” tamaşasını rus dilində tamaşaçılara nümayiş etdirəcəyik.

Nərminə Kamal