"Ukraynanın Sülh düsturu gerçəkləşdirilə bilər, çünki dünyanın əksəriyyəti Kremlə təzyiq edir..."

 

Ukrayna prezidenti Vladimir Zelenski müharibənin Ukraynanın şərtləri əsasında bitirməyin zəruriliyini vurğulayıb və bunun üçün Sülh düsturunun gerçəkləşdirilməsinin mümkün olduğunu hesab edir.

 

Moderator.az xəbər verir ki, bu barədə o, ənənəvi axşam müraciətində deyib. Məlumatı "dsnews.ua" nəşri yayıb.

 

Dövlət başçısı həmçinin hərbçilərə Rusiyanın hava limanları, neft emalı zavodları və logistikasına zərbələrə görə minnətdarlığını bildirib.

 

Bundan başqa, Zelenski Ukrayna Silahlı Qüvvələrinə Rusiya ərazisinə, xüsusilə işğalçıların Ukraynaya raketlər, "Şhahed"lər, bombalar yağdırdığı yerlərə uzaqmənzilli silahlardan zərbələr endirməsinə Qərbin icazəsinin lazım olduğunu vurğulayıb. "Bizə bu icazə ona görə lazımdır ki, səmərəli ola biləcək bütün silahlardan istifadə edə bilək", - o, deyib.

 

"Biz insanlarımızın həyatını müdafiə etməli və müharibəni Ukraynanın şərtləri əsasında başa çatdırmalıyıq. Rusiyanın aviasiya bombalarına dəqiq cavab verən, onun logistikasını və bazalarını məhv edən, işğalçının bizim torpağımızda olmasını şətinləşdirən hər bir zərbə müharibənin ədalətli sonluğunu yaxınlaşdırır", - Zelenski əminliyini ifadə edib.

 

Prezident qeyd edib ki, Ukraynanın Sülh düsturunu gerçəkləşdirmək mümkündür, çünki dünyanın əksəriyyəti Rusiya hakimiyyətinə təzyiq edir, onun hərbi fəallığına dəstək vermir və "beynəlxalq münasibətlərdə sabitliyə dönmək istəyir".

 

"Əsl sülh olacaq, amma bunun üçün zəifliyə yol verməmək, ədalətə söykənmək gərəkdir", - Ukrayna prezidenti buna əmindir.

 

 

2022-ci ilin noyabrında İndoneziyada G20 ölkələri birliyinin sammitində Zelenski sülhə nail olmaq üçün Ukraynanın 10 bənddən ibarət Sülh düsturunu təqdim edib.

 

Bu, radiasiya və nüvə təhlükəsizliyi, ərzaq təhlükəsizliyi, energetika təhlükəsizliyi, bütün əsirlərin və deportasiya edilənlərin azad edilməsi, BMT Nizamnaməsinin icrası və Ukraynanın ərazi bütövlüyünün və dünya düzəninin bərpası, Rusiya qoşunlarının çıxarılması, ədalətin bərpası, ekosidə qarşı müqavimət göstərilməsi, eskalasiyaya yol verilməməsi və müharibənin başa çatmasının qeydə alınmasıdır.