Ukrayna müharibəsi başlayanda Moskvadan gələn həmyerlilərimiz müharibənin mərkəzdə hiss edilmədiyini söyləsələr də, ölkəni tərk edənlər haqqında mətbuatda məlumatlar yer alırdı. Müharibəyə Moskva, Sankt-Peterburq və digər böyük şəhərlərdən deyil, daha çox əyalətlərdən, xüsusilə də rus olmayan başqa millətlərin nümayəndələrinin səfərbər olduğu barədə də məlumatlar konkret faktlarla yayılırdı. Müharibə uzandıqca, canlı qüvvəyə ehtiyac artdı və “kontraktnik”lərə də tələb yaranmağa başladı. Son aylar səfərbərliklə bağlı problemlərə görə Rusiyada müqavilə ilə işləyən könüllülərə böyük miqdarda pul ödənilir. Sadəcə, burada da Rusiya vətəndaşlarına fərqli münasibətlər sərgilənir. Yəni, Moskva və Sankt Peterburq qeydiyyatında olanlarla, əyalətdə yaşayanların “qiymət” fərqi var. Məsələn, 23 iyul 2024-cü il tarixindən etibarən hərbi xidmət keçmək üçün müqavilə imzalayan Moskva sakinləri Rusiya Federasiyasının Müdafiə Nazirliyindən birdəfəlik ödəniş olaraq 1.900.000 rubl, yəni 21.000 dollar alırlar.  Bu məbləğ Moskva meri Sergey Sobyaninin fərmanı ilə təsdiqlənib və Moskva hökümətinin saytında dərc olunub. Moskva hökümətinin rəsmi məlumatına görə paytaxtdan olan “kontraktnikə”xidmətin bir ilində verilən ümumi məbləğ 5.200.000 rubl və ya 60.000 dollar təşkil edir. Əlbəttə, əgər o sağ qalarsa. Qeyd etdiyimiz kimi Rusiya Federasiyasının regionlarından olan “kontraktnik”lərə belə yüksək ödəniş olmur. Məsələn, qonşu Dağıstanda indiyədək ödəniş cəmi 100.000 rubl idi, iyul ayından etibarən Ukraynada xidmətə görə 500.000 rubla qalxıb. Qiymət artımı digər bölgələrdə də müşahidə olunur. Misal üçün, Yamalo-Nenets muxtar dairəsində könüllü “kontraktnik” 1 iyuldan etibarən 1.100.000 rubl (20 000 dollar) alacaq. Bu dəyişikliyi regionun rəhbəri Dmitri Artyuxov imzalayıb.

 

Rusiyada orduya cəlb etməyin başqa “şirnikləşdirici” metodlarına da əl atmağa başlayıblar. Yaroslav vilayətinin başçısı Mixail Yevrayev 16 iyulda belə bir təşəbbüslə çıxış edib: ”Dostunu hərbi komissarlığa gətir, 100.000 rubl al”. Anoloji hal Tatarıstan Respublikasında da reallaşdırılır.

 

Bu qeyd olunanlardan hansı nəticəni çıxarmaq olar? RF hakimiyyəti kütləvi səfərbərlikdən çəkinir, ona görə də büdcə pullarını “könüllülərə” xərcləyir. Bu müqaviləni imzalayanların əksəriyyəti maliyyə problemlərinə görə, qumar borclarına və banklar qarşısında kredit borclarına görə “könüllü”addımı məcbur atırlar.

 

Region rəhbərləri Kreml qarşısında hesabat vermək naminə öz aralarında “yüksək məbləğ” yarışına çıxıblar. Kreml nə qədər rəsmi təbliğat aparsa ki, səfərbərliyə ehtiyac yoxdur, bütün ölkədə insanların pulla alınması geniş vüsət alıb. Müqavilə bağlayanların ödənişlərindəki qiymət fərqləri “mərkəzdənqaçma” meyllərini artırıb, separatizmə qədər yüksələ bilər. 

 

Müharibə əksər rusiyalılar üçün tədricən yeganə gəlir mənbəyinə çevrilir. Burada heç bir vətənpərvərlik yoxdur, ona görə də Ukraynada həyatı ilə vidalaşmaq istəyənlərin sayı hər gün azalır.