Mövzu ilə bağlı sosioloq Lalə Mehralı Moderator.az-a danışıb. 

 

 

 

 

“Bizim heç vaxt növbə mədəniyyəti anlayışımız olmayıb, əvvəlcə bunu etiraf edək. Nə bankomatlarda, nə dükanda, nə poliklinikalarda növbə gözləmirlər. Bəzi iaşə obyektlərində, dövlət idarələrində, banklarda növbəni məcburi hala saldıqları üçün əlacsız qalıb gözləyirlər. Çünki kağızla, nömrə ilə çağırılırlar xidmət ala bilmək üçün. Yəni bu məcburiyyətdən yaranan mədəniyyət olur. Poliklinikalarda, bankomatların önündəki  qarışıqlığı hamı görür, hamı başqasının növbəsinə girmək istəyir, insanlar hər fürsətdə başqasının hüququnu pozmağa maraqlıdır, həvəslidir. Amma ondan sonra gələn birinin ondan öncə xidmət almasına, növbəsinə kiminsə müdaxilə etməsinə narahat olur, hay-küy salır. İnsan özünə ediləndə dözümlülük göstərmədiyi hərəkəti başqasına da etməməlidir. Empatiya, hörmət, güzəşt hissindən məhrum insanların cəmiyyətinə çevrilmişik, sadəcə. Təcrübə göstərir ki, bizim cəmiyyətdə hər hansı bir qayda yalnız zorakı, məcburi qaydada tətbiq edilərsə, işə yarayır”.