Moskvanın Basman Məhkəməsi sabiq rusiyalı vəkil və Dövlət Dumasının deputatı, tanınmış bloger və "xarici agent" Mark Feyqinə qarşı Rusiya ordusu barədə "feyklərə" görə siyasi nifrət motivləri ilə ümumi rejimli koloniyada azadlıqdan məhrumetmə hökmü çıxarıb. Müttəhim prosesdə olmayıb, onu vəkili təmsil edib.

 

Moderator.az xəbər verir ki, bu barədə Rusiya Baş Prokurorluğunun mətbuat xidmətinin məlumatında deyilir. Məlumatı "svoboda.org" nəşri yayıb.

 

"Məhkəmə müəyyən edib ki, 2022-ci ilin aprelində Feyqin Rusiya Federasiyasının hüdudlarından kənarda olduğu İsrail KİV-lərinə verdiyi müsahibəsində Ukrayna ərazisində xüsusi hərbi əməliyyatın keçirilməsi zamanı Rusiya Silahlı Qüvvələrindən Kiyev vilayətinin Buça şəhərində dinc insanların qətlə yetirilməsi üçün istifadə edilməsi barədə qəsdən yalan məlumat yayıb", - məlumatda deyilir. 

 

Bundan başqa, istintaq müəyyən edib ki, bloger həm Ukraynanın "24 Kanal" xəbərlər kanalında, həm də özünün "YouTube"dakı "Feyqin LİVE" kanalının birbaşa efirində "feyklər" yayıb.

 

11 iilik həbs cəzasından başqa, Moskvanın Basman Məhkəməsi Feyqinə "4 il müddətində elektron saytları və ya "İnternet" informasiya-telekommunikasiya şəbəkələrində adminlik etməklə əlaqədar fəaliyyətlə məşğul olmağı" qadağan edib. Bloger həmçinin 4, 5 milyon rubl (50 900 dollar-red.) məbləğində cərimələnib.

 

Mark Feyqin sabiq rusiyalı vəkildir. O, "Pussy Riot" qrupunu Moskvada Xilaskar Xristos məbədində "pank-ibadətlə" bağlı iş üzrə, həmçinin ukraynalı hərbçi təyyarəçi qadın Nadejda Savçenkonu və Rusiyaya qarşı casusluqda ittiham edilən Ukrayna vətəndaşı Roman Suşşenkonu müdafiə edib.

 

2018-ci ildə o, Rusiyada vəkillik statusundan məhrum edilib. 2022-ci ilin aprelində Rusiya Ədliyyə Nazirliyi onu "xarici agentlər" siyahısına salıb.

 

2023-cü ilin oktyabrında Rusiya DİN Feyqini axtarışa verib. Bu ilin yanvar ayında Basman Məhkəməsi onun həbsinə order verib.

 

Hal-hazırda bloger Rusiyanın xaricindədir. Hökm müttəhimin Rusiya ərazisində həbsi anından qüvvəyə minəcək.