Məlumdur ki, rəsmi adı “xalq demokratik respublikası” olsa da, gerçəklikdə Şimali Koreya qeyri-məhdud hakimiyyətli birpartiyalı idarəetmə üsuluna malik, yəni bir partiya, əslində isə bir nəfər tərəfindən idarə olunan diktatura, avtoritar bir rejimdir. Bu gün Ukraynada açıq, ədalətsiz, amansız, faktiki soyqırımı ilə müşayiət olunan savaş aparan Rusiyanın lideri Vladimir Putinin Şimali Koreyaya, ardınca da Vyetnama səfəri göstərdi ki, Kreml özünə bənzər totalitar, avroritar quruluşlu dövlətlərlə hərbi-siyasi blok yaratmağa çalışır. Azərbaycan olaraq biz Ukraynaya təcavüzünün başlanmasından cəmi iki gün öncə müttəfiqlik sazişi imzaladığımız Rusiya ilə münasibətdə, demək olar ki, müttəfiqlik öhdəliklərini sadiq şəkildə yerinə yetiririk. Son illər Azərbaycan öz xarici siyasətini Kremlin bu və ya digər ölkələrə münasibətinə uyğun formalaşdırır. Rusiya Fransa ilə az qala açıq düşmənçilik səviyyəsində açıq rəqabət aparır, biz də eyni işi görürük, demək olar ki, mediamız hər gün Fransanın neokolonial, neo-müstəmləkəçi siyasətini ifşa edir, bu mövzuda dövlət və qeyri-hökumət qurumları müxtəlif yerli və beynəlxalq miqyaslı tədbirlər keçirir. Rusiya ABŞ-la, Avropa Birliyi ilə də düşmənçilik münasibətindədir, biz də son bir neçə ildə həmin ölkələrlə münasibətdə çox soyuq davranır, tədricən rəsmi şəkildə Qərb dəyərlərindən uzaqlaşmağa çalışırıq...  

 

Maraqlıdır, belə bir durumda, tutaq ki, sabah Vladimir Putin bizimlə müttəfiq dövlətin başçısı kimi təklif etdi ki, siz də Rusiyaya dəstək olaraq Şimali Koreya ilə, onun Kim Çen In adlı bütün sivil dünyanın diktator kimi tanıdığı rəhbəri ilə yaxın əlaqələrə girin, əməkdaşlıq edin, onda biz, yəni Azərbaycan dövləti necə davranacaq, biz də “dostumun dostu mənim də dostumdur” prinsipi ilə bu diktatura dövləti ilə əməkdaşlıq edəcəyik?..

 

Mövzu ilə bağlı Moderator.az-a açıqlamasında siyasi analitik Tahir Cəfərli bunları söyləyib:

 

“Demokratiya anlayışı hər ölkədə bir cürdür. Son zamanlar məlum oldu ki, nə ABŞ-da, nə Fransada, nə də başqa  Avropa ölkələrində biz gözlədiyimiz demokratiya var. Yəni həmin ölkələrdə Qərb dəyərləri deyilən dəyərlər yoxdur, sadəcə olaraq sadəlövh xalqlar üçün hazırlanan demokratiya pərdəsi altında  soyğunçuluq oyunudur. Bu isə heç bir dəyər  çərçivəsinə  sığmır. Demokratiya adıyla başqa ölkələrin daxili işlərinə qarışmaq, dövlət çevrilişləri etmək, nahaq qan axıtmaq və öz geosiyasi məqsədlərinə nail olmaqdır. Liviya, İraq, Əfqanıstan, Misir, Yəmən, Ukrayna, Gürcüstan və s. ölkələrdə baş verən qanlı toqquşalar və dövlət çevrilişləri  demokratiya oyunbazlarının hərbi cinayətləridir. 2001-ci ildən bu günə qədər ABŞ-ın Prezidentləri demokratiya və insan hüquqları adıyla 16 milyondan artıq müsəlmanın nahaq qanını axıdılmışlar. Azərbaycanın öz suveren torpaqlarını azad etmə faktını Fransanın cinayətkar Makron hökuməti qəbul etmir. Bütün  bunlar onu göstərir ki, Azərbaycan nə qədər demokratiya oyunbazlarından uzaq olsa, bir o qədər daha da güclənər və öz dövlət maraqlarından çıxış edib öz həqiqi, tarixi sərhədlərini bərpa edər... 

İkinci Qarabağ müharibəsi onu göstərdi ki, Azərbaycan ancaq özünə və şanlı ordusuna arxalanmalı və öz dövlət maraqlarından çıxış etməlidir.

İndi keçək Ukraynaya. Burada eyni kökdən, eyni dindən olan  iki millət bir-birini qırır. Səbəb  ABŞ-ın bura gətirdiyi demokratiya oyunudur və dövlət çevrilişinin nəticəsidir. Ukraynada dünya iki düşərgəyə bölünmüşdür: Qərb və Şərq geosiyasi düşərgələrinə və onun konturları günbəgün özünü biruzə verir.  Bu saat bu ölkə Qərblə Şərqin hərbi  poliqonudur. Dünyanın bütün silahları burada sınaqdan keçirilir. Ukraynadakı müharibə  bu və ya digər düşərgənin silahının qələbəsi ilə qurtaracaq...

 

Bu və ya digər  düşərgənin öz hüdudlarını və  əhatə dairəsini  artırmaq faktı da göz qabağındadır. Dünyada atom təhlükəsinin, daha doğrusu, 3-cü dünya müharibəsinin qarşısını almaq üçün iki qütblüyü bərpa etmək lazımdır, istər Qərb, istərsə Şərq düşərgələri... 

 

Sovet İttifaqı dağıldıqdan sonra dünya mono-qütblüyə keçdiyindən ABŞ bütün dövlətlərə öz  siyasi iradəsini yeridirdi və bu iradədən çıxan dövlətlərin liderlərinə qarşı ciddi dövlət çevrilişləri hazırlayırdı. 

 

Ukraynanın bu hala düşməsinə səbəb Yanukoviçin devrilməsi oldu. Buna edənlər MKİ-nin agentləri oldular…

 

Şimali Koreya ilə bağlı ABŞ-ın siyasi davranışı  bu ölkədə də siyasi sabitliyi pozmaq və demokratiya adıyla bu dövləti öz maraq dairəsinə salmaqla mono-qütblüyü bərpa etməkdir. Aydındır ki, bu, mono-qütblülüyə qarşı çıxan Rusiyanın geo-siyasi maraqlarında deyil. Odur ki, Rusiya Prezidenti V.Putin sovet dövründə də ABŞ-a sinə gələn Şimali Koreya və Vyetnamla dostluq və hərbi əlaqələrini gücləndirir.

  

Azərbaycanın dövlət başçısının Rusiya ilə müttəfiqlik sazişi bağlaması hər şeydən əvvəl ölkəmizin dövlətçilik maraqlarından irəli gəlirdi. Gəlin görək bu saziş bizə nə verdi? 

İlk növbədə. 19 sentyabr 2023-cü ildə 100000 dığanın Qarabağdan köçməsini, 2024-cü ilin aprelindən başlayaraq  Rusiya sülhməramlılarının çıxarılmasını. 

 

Yadınızda varsa, hələ 2020-ci ildə onların Qarabağda qalmayacağı haqda  sizə müsahibə də vermişdik. Onda heç kim buna inanmırdı.

 

Müttəfiqlik haqda saziş o demək deyil ki, Azərbaycan Rusiyanın çaldığı zurna ilə oynayacaq. Heç vaxt! 

 

Azərbaycan Qoşulmama hərəkatının üzvüdür və bu, ona əsas verir ki, müstəqilliyimizi üstün tutaq və hərbi  toqquşmalardan uzaq duraq. 

Yadıma Azərbaycan Prezidenti İlham Əliyevin Misir  səfəri düşdü. Misir Prezidentinin Azərbaycan dövlət başçısının necə fəxrlə qarşıladığına fikir verdiniz? Heç bir ölkə başçısı  Misirdə o təmtəraqla qarşılanmamışdı. “Niyə?” sualının cavabı Misir Prezidenti Sisinin gözlərindən görünürdü. O, son 100 ildə xristianlar tərəfindən zəbt olunmuş müsəlman torpaqlarını azad etmiş yeganə dövlət başçısını qəbul edirdi. 

Misir səfəri Azərbaycan Prezidentinin apardığı  balanslaşdırılmış siyasətinin qələbəsi idi. Bu gün dünyanın  gələcək tranzit yollarının  loqistik açarları Azərbaycan Prezidentinin əlindədir. Və bu logistikanın əhəmiyyətini Süveyş kanalından da üstündür, çünki daşınacaq  yüklərin həcmi daha da  çoxdur. 

İndi keçək Ukraynaya qarşı Azərbaycanın mövqeyinə. Azərbaycan başqa ölkələr kimi Ukraynada sülhün tərəfdarıdır, çünki bu müharibə III Dünya müharibəsinə çevrilə bilər. Bununla belə, nə üçün heç nədən Azərbaycan Ukraynanı dəstəkləməlidir? Ukrayna-Ermənistan münasibətləri əlimizə dəlil verir ki, biz ondan uzaq duraq. Biz Allahımıza dua etməliyik ki, Azərbaycan bütün təzyiqlərə  rəğmən ciddi inkişaf yolu tutmuşdur və tam əminliyi ilə deyə bilərik ki, ölkəmiz öz dövlət maraqlarından çıxış edir və bundan sonra heç vaxt bu və ya digər dövlətin “kiçik” qardaşına çevrilməyəcək!..”

 

Sultan Laçın