“4 iyun qiyamından sonra keçən 30 il müddətində “KQB” arxivlərinin açılması indiki nəslə, gənc nəslə və gələcək nəsillərə lazılmdır ki, dövlətimizə qarşı belə qiyamlar bir daha baş tutmasın. Arxivlər açılmalıdır. Fəqət, təəssüf ki, arxivlər nəinki açılmır, son onilliklərdə baş verənlərin tarixi də bəziləri tərəfindən təhrif olunur. Bunlar ayrı bir məsələdir və xüsusi müzakirələrə ehtiyacı var”. 

 

Bu fikirləri Moderator.az-a açıqlamasında “Əgər 4 iyun qiyamından sonra keçən dövrdə keçmiş “KQB” arxivləri açılsaydı, siyasi meydanda  kimin kim olduğu bəlli olsaydı, Azərbaycanda 31 il öncəki həmin olaylara baxış bugünkü kimi qalardımı?” sualını cavablandıran Klassik Azərbaycan Xalq Cəbhəsi Partiyasının sədri Mirmahmud Mirəlioğlu ifadə edib.

 

“Yəni 4 iyun qiyamı başlayandan onun nəticələrinədək bir çox  hadisələr baş verdi. O hadisələrə başlanğıcda münasibətləri fərqli olanlar və sonradan münasibətlərini dəyişənlər də oldu. Ancaq tarixin düz yazıldığı təqdirdə artıq bizim nəslə, yəni sözügedən olayları görən, onları yaşayan insanlara bu lazım deyil, bunları bilmək indiki və gələcək nəsilllərə lazımdır ki, dövlətçiliyimizə qarşı belə hadisələr törədilməsin, törədildiyi təqdirdə isə dərhal söndürülsün. Buna misal olaraq 4 iyun qiyamından təxminən bir il yarım sonra - 1994-cü ilin oktyabrında  və daha sonra 1995-ci ilin martında baş verən hadisələrin necə aradan qaldırılması hər kəsə bəllidir”,- deyə davamında partiya sədri bildirib.

 

“Sizcə, Azərbaycanı 4 iyun qiyamına gətirən daxili və xarici qüvvələrlə təxminən eyni dövrdə Qarabağın, torpaqlarımızın 20 faizinin işğalına gətirən qüvvələr arasında paralel aparmaq doğru olarmı?” sualına isə siyasətçi belə cavab verib:

 

“Bəli, əslində bunlar eyni qüvvələr idi. Azərbaycanın müstəqilliyini istəməyənlər, Azərbaycanda müstəqil və milli dövlətin bərpasına qarşı olan adamlar, istiqlalın əleyhinə səs vermiş məxluqlar bütün bu məsələlərdə iştirakçıdırlar, ona görə də bu qiyamın baş tutmasında da iştirakçı oldular. Odur ki, belə halların təkrarlanmamasından ötrü çox işlər görmək, o cür hallara qarşı mübarizəni öyrənmək və yeri gəldikdə tətbiq etmək gərəkdir...”

 

Sultan Laçın