Lukaşenko müharibəyə qoşulmağı vəd edib, Zelenski belaruslara səslənib: "Siz qul deyilsiniz"

 

Belarus getdikcə Ukraynaya qarşı müharibədə Rusiyaya daha aktiv surətdə kömək edir: rusiyalı hərbçilərə raketlərin buraxılması üçün öz ərazisini təklif edir, yeni silah partiyaları göndərir. Aleksandr Lukaşenkonun belə diribaş fəaliyyəti bu günlər Rusiya prezidenti Vladimir Putinlə danışıqları zamanı onun tərəfindən edilən təzyiqlərlə bağlıdır.

 

Moderator.az xəbər verir ki, bu barədə "General SVR" "Telegram-kanal"ı yazıb.

 

"Danışıqlar göründüyü kimi rəvan olmayıb. Elə məqam olub ki, Putin Lukaşenko ilə ünsiyyəti kəsərək, danışıqlar gedən otağı tərk edib, gözləyənlərə ucadan deyib: "Bu kütbeyinə başa salın ki, buradan çıxa bilməyəcək".

 

Şahidlərin sözlərinə görə, hədə-qorxu o qədər ucadan və inandırıcı olub ki, bunu on nəfərə yaxın danışıqların bitməsini gözləyənlər, mühafizə və Lukaşenkonun özü eşidib", - məlumatda belə deyilir.

 

"General SVR"-in sözlərinə görə, Lukaşenko "gözləri yaş içində" danışıqların davam etməsini xahiş edib və Belarus Silahlı Qüvvələrinin Rusiya-Ukrayna müharibəsində "Rusiya prezidentinin arzuladığı sayda və keyfiyyətdə" iştirak edəcəyini vəd edib.

 

İyunun 27-də səhər Ukrayna Silahlı Qüvvələri məlumat verib ki, Belarus rusiyalı hərbçilərə çoxlu silah göndərib: "Əldə olan məlumata görə, Belarus rəhbərliyi Rusiyaya hərbi dəstəyini göstərməkdə davam edir, o cümlədən Belqorod vilayətinə 20-dək vaqon döyüş sursatının növbəti partiyası göndərilib.

 

Ukrayna prezidenti Vladimir Zelenski bəyan edib ki, Belarus getdikcə daha aktiv surətdə müharibəyə sövq edilir və bununla bağlı belaruslara müraciət edib.

 

"Ayrıca olaraq bu gün Belarus vətəndaşlarına, həm mülki, həm də poqonlu insanlara müraciət etmək istəyirəm. Sizi müharibəyə təhrik edirlər. Hətta bunu fevralda və yaz aylarında olduğundan

daha aktiv şəkildə edirlər. Kremldə sizin yerinizə hər şey həll edilib. Fəqət, siz qul deyilsiniz, top yemi deyilsiniz, siz ölməməlisiniz. Sizi gələcəkdə nə gözlədyinin başqalarının həll etməsinə imkan verməmək üçün gücünüz yetərlidir", - Ukrayna prezidenti deyib.

 

O, vurğulayıb ki, hazırda Belarusun sadə sakinlərindən çox şey asılıdır.

 

"Mən bilirəm ki, Belarus xalqı bizi dəstəkləyir, müharibəni yox, dəqiq bizi dəstəkləyir. Və məhz buna görə də Rusiya rəhbərliyi sizi müharibəyə təhrik etmək istəyir", - Zelenski qeyd edib.

 

Ukrayna prezidenti həmçinin Ukraynaya raket yağdıran rusiyalı təyyarəçilərə də müraciət edib.

 

"Ukraynaya raket buraxan bütün təyyarəçilər,dispetçelər və başqaları anlamalıdır: biz hamınızı tapacağıq. Hər biriniz bu zərbələrə görə cavab verəcəksiniz. Kimsə əmrə tabe olduğunu bəyan edərək məsuliyyətdən qaçmağı düşünürsə, səhv edir. Sizin raketləriniz bizim yaşayış evlərimizə zərbə endirirsə, bu, hərbi cinayətdir. Sizin hamınızı məhkəmə gözləyir. Siz heç bir yerdə-nə üzərindən raketləriniz buraxılan Xəzər dənizi sahillərində, nə Belarusda gizlənə bilməyəcəksiniz. Heç bir yerdə", - Ukrayna prezidenti deyib.