"Əgər siyasətçilər razılığa gələ bilməsələr, məsələlərin həllini gələcək nəsillərin mühakiməsinə buraxsın və atəşi dayandırsın..."

 

50-dən artıq Nobel mükafatı laureatı açıq məktub yazaraq Ukrayna və Qəzzada hərbi münaqişələrin dərhal dayandırılmasına çağırış edib.

 

Moderator.az xəbər verir ki, məktub rus dilində yazılıb və "Novaya qazeta" nəşrində dərc edilib. Məktubun tam mətninin tərcüməsini oxucuların diqqətinə çatdırırıq.

 

"Elə indi dünyada 55-dək hərbi münaqişə var. Lokal savaşlar daha mövcud deyil. Avropa qitəsində onilliklər ərzində ilk dəfə olaraq müharibə gedir, bu,  Rusiya-Ukrayna münaqişəsidir.

 

Üçüncü ildir ki, davam edən bu müharibənin nəticələri artıq müxtəlif ölkələrdə əks-səda doğuraraq Afrikada aclığı gücləndirib, Avropa ölkələrində miqrasiya böhranı yaradıb, bütün altı qitə sakinlərinin masaları üstünə su, çörək və südlə  hər bombardman zamanı ətrafa yayılan tonlarla zərərli maddələr gətirib. 

 

Avropanın mərkəzində bu ilin sonunadək həlak olan və yaralananların sayı bir milyonu ötəcək. Bu, ikinci dünya savaşından sonra ilk dəfədir ki, baş verir.

 

Bu müharibə müddətində dünyada müdafiə büdcələri o qədər artıb ki, onlar qlobal iqlim dəyişikliklərini azaltmaq üçün kifayət edəcək resurslarla müqayisə edilə bilər. İnsanlar bir-birini qətlə yetirməklə eyni zamanda planetimizi öldürür.

 

Silahlanmaya artan məsrəflər həm də bütöv 80 il ərzində bütün planetdə aclığa son qoya biləcək xərclərlə müqayisə edilə bilər.

 

Bir düşünün: heç kim ac qalmaz, heç kim əldən düşüb ölməz, dünyada heç bir körpə ac yatmazdı. Lakin resurslar həyata dəstək verilməsinə deyil, ölümün artmasına sərf edilir.

 

Bu gün müharibədə kimlər tələf olur? Qurbanlar arasında ən çox 30-40 yaş arasında olan insanlardır. Həlak olanların hər birinin ömrü orta hesabla 40 il azalır.

 

Bu o deməkdir ki, hər 100 min qətlə yetirilən şəxs gələcəyin 4 milyon insanıdır! Bunlar baş verməyən kəşflər, dünyaya gəlməyən uşaqlardır, yetimlikdir.

 

Biz dövlətləri təmsil etmirik. Lakin əgər sülhün bərqərar olması üçün dövlətlərin səyləri kifayət deyilsə, biz öz səylərimizi göstərməliyik. Biz sizdən bunu xahiş edirik.

 

Biz Ukraynada və Qəzzada sülhə çağırışımıza dəstək verməyinizi xahiş edirik. Bunlara son qoyulmasına yönələn atəşkəs və hərbi əməliyyatların dayandırılması barədə dualar etməyinizi xahiş edirik.

 

Atəşi dayandırın!

 

İnsanların həlak olmasına son qoyun!

 

Nüvə fəlakətinin qarşısını alın!

 

Biz Roma Papası Fransiskdən, Konstantinopol Patriarxı Varfolomeydən, XIV Dalay-Lamadan, İslam və iudaizm nümayəndələrindən elə Olimpiya Oyunları zamanı qulluq etdikləri Tanrının adından dünyanın bütün vətəndaşlarına və hökumətlərinə müraciət etməyi xahiş edirik. Qoy bu Oyunlara tamaşa edəcək milyardlarla insan bu dualara qoşulsun.

 

Övladlarımıza yaşamaq imkanı verin!

 

Gəlin, bir-birimizi qətlə yetirməyək, planetimizi xilas edək!

 

Biz Ukrayna və Qəzza bölgəsindəki münaqişələrə dərhal bu prinsiplərin tətbiq edilməsini tələb edirik:

 

- atəşi dərhal dayandırılmaq;

 

- hamının hamıya prinsipi ilə əsirləri mübadilə etmək və həlak olanların cəsədlərinin qaytarmaq;

 

- danışıqlara başlamaq.

 

Əgər siyasətçilər razılığa gələ bilməsələr, məsələlərin həllini gələcək nəsillərin mühakiməsinə buraxsın və atəşi dayandırsın".

 

Bu məktub döyüşən tərəflərə, Roma Papası Fransiskə, Konstantinolol Patriarxı Varfolomeyə, Dalay-Lamaya, BMT-yə Avropa Parlamentinə və Avropa Şurası Parlament Assambleyasına ünvanlanıb. Rusiya Pravoslav Kilsəsinin Patriarxı Kurillin adı məktubda xatırlanmır.

 

Məktub müxtəlif illər və müxtəlif sahələrdən olan 51 Nobel mükafatı laureatı imzalayıb, onlardan doqquzu Nobel Sülh Mükafatı laureatıdır.