Nuran Abdullayev: "Almaniyadan yüksək ixtisaslı həkimlər Bakıya gələrək burada mövcud potensialı yerində gördülər"

Bir şəhərin gücü təkcə onun möhtəşəm binaları ilə deyil, daha çox düşünən beyinləri və birgə çalışan işgüzar barmaqları ilə ölçülür.

Bakıda İnsult üzrə Beynəlxalq elmi-praktik konfransı keçirdik. Bu, bizim komanda üçün sadəcə bir konfrans deyildi — gələcəyin səhiyyəsinin konturlarının çəkildiyi, biliklərin bölüşüldüyü və beynəlxalq etimadın qurulduğu bir platforma idi.

Almaniyadan komandamızın tərkibində olan 3 klinika direktoru və bir neçə yüksək ixtisaslı həkim Bakıya gələrək burada mövcud potensialı bir daha yerində gördülər. Hansı mərkəzlər artıq bu gün beyin damar müdaxilələrini icra edə bilir, hansı klinikalar beynəlxalq standartlara uyğun inkişaf yolundadır və ən önəmlisi, Azərbaycanın insult müalicəsində regional liderə çevrilməsi üçün hansı addımlar atılmalıdır - bu məsələləri səfər çərçivəsində müzakirə etdik.

Bu görüşlər bir daha göstərdi ki, səhiyyə sahəsində Bakını sadəcə izləyən deyil, formalaşdıran, təşəbbüs göstərən və standart müəyyən edən şəhərə çevirməyin vaxtıdır.

Mənim üçün xüsusi qürurverici məqam isə Almaniya ilə Azərbaycan arasında qurduğumuz bu elmi və klinik körpünün artıq real nəticələr vermə potensialını görmək idi. Bu, yalnız tibbin inkişafı deyil. Bu, bir millətin potensialının dünyaya nümayiş etdirilməsidir.

Bu gün Bakıda gördüyümüz motivasiya, enerji və vizyon bir daha sübut etdi ki, gələcək artıq uzaqda deyil — o, Bakıda qurula bilər. Bu, növbəti böyük uğurların başlanğıcıdır.

Well done, Baku — bu, sadəcə bir başlanğıcdır. Ən güclü səhifələr isə hələ yazılmayıb.