“Otaqlar qəzalı vəziyyətdədir...”- Axtaçı kənd ümumi orta məktəbinin bitməyən PROBLEMLƏRİ-ÖZƏL

Bizi sosial şəbəkələrdən izləyin:

Sabirabad rayonu, Axtaçı kənd məktəbi qəzalı vəziyyətdədir. Bu haqda Moderator.az-a kənd sakinləri məlumat verib:

“Bu məktəbin problemlərini saymaqla bitmir. Birincisi məktəb qəzalı vəziyyətdədir, bəlkə də 40-45 il əvvəl təmir olunub. Qapı-pəncərəsi, döşəmə-tavan hissəsi köhnədir. Məktəbdə istilik problemi var. Hazırda payız ayını yaşayırıq, otaqlar soyuq olur, şagirdlər dərsdə rahat otura bilmirlər. Bu da dərsin keyfiyyətinə təsir edir” deyə şikayətçilər bildirib.

Kənd sakinləri bildirib ki, məktəb baxımsız vəziyyətdədir:

“Məktəbdə şagird sayı az olduğu üçün ibtimai siniflər komplekt siniflərdə təhsil alırlar. Şagirdlər 9-cu sinfə qədər bu məktəbdə oxuyurlar, sonra qonşu Şəhriyar kəndinə gedirlər. Çünki qışda, qarda-yağışda qonşu kəndə getmək böyük əziyyətdir” -deyə şikayətçilər bildirib.

Mil-Muğan Regional Təhsil İdarəsindən Moderator.az-ın sorğusuna belə cavab verilib:

"Mil-Muğan Regional Təhsil İdarəsinin tabeliyində fəaliyyət göstərən ümumi təhsil müəssisələrinin maddi-texniki bazasının gücləndirilməsi, müasir avadanlıqlarla təmin olunması, yeni binaların inşası və mövcud binaların əsaslı təmiri olunması əsas prioritetlərimizdəndir.

Son iki il ərzində Mil-Muğan Regional Təhsil İdarəsinin tabeliyində fəaliyyət göstərən 5 məktəb əsaslı təmir edilib, 53 məktəbdə cari təmir işləri aparılıb. Bununla yanaşı 8 yeni məktəb tikilərək istifadəyə verilib, 2 təhsil müəssisəsində isə tikinti işləri davam edir.

Ünvanladığınız sorğuya cavab olaraq bildirik ki, Sabirabad rayonu Axtaçı kənd ümumi orta məktəbinin mövcud vəziyyəti ilə bağlı məlumatlıyıq, idarənin əməkdaşları tərəfindən təhsil müəssisəsinə yerində baxış keçirilib. Sözügedən təhsil müəssisəsinin təmiri üçün aidiyyəti üzrə müraciət edilib. Qeyd edirik ki, məktəblərin təmiri və tikintisi növbəlilik və prioritetlik prinsipi əsasında həyata keçirilir".