İşğal altında olan torpaqlarımızın azad olunması uğrunda rəşadətlə döyüşərək şəhid olan qəhrəmanlarımızdan biri də kiçik gizir Orxan Rövşən oğlu Cabbarovdur.

Orxan Cabbarov 16 oktyabr 1995-ci ildə Tovuz rayonunda anadan olub. Orxanın ailəsi sonralar Rusiyaya köçüb. Orxan da 2002-2008-ci illərdə Rusiya Federasiyasının Vladivostok şəhərində orta təhsil alıb. 2008-ci ildə vətənə qayıdan Orxan 2008-2013-cü illərdə Binəqədi rayon 179 saylı tam orta məktəbdə təhsilini davam etdirib. Orxan orta məktəb illərindən sərbəst güləş və karate ilə məşğul olub. 

 

Orxan Cabbarov 2013-cü ildə müddətli həqiqi hərbi xidmətə çağırılıb. 2013-2015-ci illərdə Azərbaycan Silahlı Qüvvələrinin “N” saylı hərbi hissəsində xidmət edib. Xidməti zamanı Xüsusi Təyinatlı Qüvvələrə seçim olub. Həmin seçimə qatılan Orxan 6 aylıq kursu uğurla bitirərək müddətdən artıq həqiqi hərbi xidmət hərbi qulluqçusu kimi xidmətini davam etdirib. 

 

Orxan Cabbarov 2013–2015-ci illərdə Azərbaycan Silahlı Qüvvələrinin sıralarında müddətli həqiqi hərbi xidmətdə olub. 2015-ci ildən isə Xüsusi Təyinatlı Qüvvələrin sıralarında müddətdən artıq həqiqi hərbi xidmət qulluqçusu olaraq xidmət edib. Orxan Cabbarov 2015-ci ildən Vətən Müharibəsinə qədər Xüsusi Təyinatlı Qüvvələrin Cəlilabad və Xızı rayonlarında yerləşən “N” saylı hərbi hissələrində xidmət edib. 

 

Orxan Cabbarov 2016-cı ilin aprel döyüşlərinin də iştirakçısı olub. Aprel döyüşləri zamanı Orxan Cabbarov Talış istiqamətində döyüşüb. 

 

Orxan Cabbarov 2019-cu ilin yanvarından Xüsusi Təyinatlı Qüvvələrin kəşfiyyatçısı, kiçik gizir rütbəsi ilə xidmət etməyə başlayıb. Xidmət dövründə də idman yarışlarında iştirak edən Orxan nailiyyətlər əldə edib. Mətinliyi, şücaəti, dözümlülüyü, qorxmazlığı, cəldliyi ilə hərbçi yoldaşları arasında xüsusi nüfuz qazanıb.

Orxan Cabbarov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan 44 günlük Vətən Müharibəsi zamanı ön cəbhədə olub. Orxan Cabbarov Vətən Müharibəsi zamanı Cəbrayılın, Füzulinin, Zəngilanın, Qubadlının, Xocavəndin və Şuşanın azadlığı uğrunda gedən döyüşlərdə iştirak edib. Orxan oktyabrın 4-də Cəbrayılda döyüş zamanı qolundan yaralanıb. Şirvan hospitalında bir müddət müalicə alandan sonra Orxan yaraları tam sağalmamış yenidən döyüşə qayıdıb. Əməliyyatlardan biri zamanı Orxan Cabbarov 4 nəfərlik qrup ilə 38 nəfərlik erməni Xüsusi Təyinatlılarını məhv edib. 

 

Müharibə zamanı Orxan Ermənistan Silahlı Qüvvələrinin zabitini əlbəyaxa döyüş zamanı öldürüb. Orxanın sonuncu döyüşü Şuşa uğrunda olub. Şuşa döyüşlərində Orxan ikinci dəfə qolundan yaralanıb, yoldaşları qıraqda, bir səngərdə ona sistem qoşublar. Amma az sonra Orxan yenidən döyüşə qatılıb. Döyüş zamanı Orxan düşmən tankının üstünə hücum edib və həmin tankdan atılan mərmi nəticəsində  qəlpə yarası alıb. Orxan Cabbarov noyabrın 9-da Şuşa döyüşləri zamanı şəhid olub. 

 

Orxan Cabbarov Tovuz rayonunun Bozalqanlı kəndində dəfn olunub. Ailəli idi. Bir övladı yadigar qalıb. 

 

Azərbaycanın ərazi bütövlüyünün bərpa edilməsində xüsusi xidmətlərinə və işğal olunan ərazilərin azad olunması zamanı düşmənin məhv edilməsi üzrə qarşıya qoyulan döyüş tapşırığını yerinə yetirən zaman göstərdiyi qəhrəmanlıq nümunəsinə görə, həmçinin hərbi qulluq vəzifəsini yerinə yetirən zamanı igidliyin və mərdliyin nümayiş etdirilməsinə görə Azərbaycan Prezidenti İlham Əliyevin 09 dekabr 2020-ci il tarixli Sərəncamına əsasən kiçik gizir Orxan Cabbarova  “Vətən Müharibəsi Qəhrəmanı” adı verilib. 

 

Bundan başqa Orxan Cabbarov Azərbaycanın ərazi bütövlüyünün təmin edilməsi uğrunda döyüş əməliyyatlarına qatıldığı və hərbi hissə qarşısında qoyulan tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin sərəncamına əsasən ölümündən sonra “Vətən uğrunda”, “Cəbrayılın azad olunmasına görə” və  “Şuşanın azad olunmasına görə” medalları ilə təltif edilib.

 

Vətən Müharibəsi Qəhrəmanı Orxan Cabbarovun adının əbədiləşdirilməsi üçün də tədbirlər görülüb. 2021-ci ildə Tovuz rayonu Qovlar şəhər İnteqrasiya təlimli internat tipli gimnaziyaya Vətən Müharibəsi Qəhrəmanı Orxan Cabbarovun adı verilib.

 

Bu yazı Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə “Təhsilə Dəstək Mərkəzi” İctimai Birliyinin icra etdiyi “Şərqi Zəngəzur məktəblərində Vətən Müharibəsi Qəhrəmanlarının təbliği” layihəsi çərçivəsində hazırlanıb. Yazının məzmununda əks olunan fikir və mülahizələr müəllifə aiddir və Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin rəsmi mövqeyini əks etdirməyə bilər.