Moderator.azməlumatına-ın məlumatına görə, sessiyanın moderatoru Azərbaycan İlahiyyat İnstitutunun rektoru Aqil Şirinov olub. O, dini radikalizmin onlayn mediada aktivləşməsi ilə mübarizənin vacibliyini diqqətə çatdırıb.

 

Qafqaz Müsəlmanları İdarəsinin sədr müavini Fuad Nurullayev isə Azərbaycanda medianın azad olduğunu vurğulayıb. O bildirib ki, bununla bərabər din həssas məsələ olduğuna görə, bəzi məqamlarda diqqət edilməli nüanslar nəzərə çarpır:

 

"Hesab edirəm ki, media dini baxımdan maariflənməlidir. Jurnalistlərin dini savadlılığı onların ərsəyə gətirdiyi məqalələrin keyfiyyətində özünü göstərəcək".

 

Daxili İşlər Nazirliyinin (DİN) Mətbuat Xidməti İdarəsinin rəis müavini Zeyni Hüseynov diqqətə çatdırıb ki, insanların dini inanclarından istifadə edərək Azərbaycana təsir cəhdlərinin qarşısı hüquqi müstəvidə alınır:

 

“Bu gün ölkəmiz bütün dinlərin qovuşduğu, milli kimliyindən asılı olmayaraq hər kəsin xoşbəxt yaşadığı, cənab Prezidentin də dediyi kimi sabitlik adasıdır. Bunu dünyanın ən nüfüzlu təşkilatlarının apardığı sorğular, statistikalar təsdiq edir. Azərbaycan dünyəvi, demokratik və tolerant dövlət kimi burada yaşayan hər bir xalqın milli ənənələrini, milli-mənəvi dəyərləri yaşatmağa çalışır, multikultural dəyərlərə hörmətlə yanaşır. Çünki mənsub olduğumuz dində bu çağırışlar var.

 

Etiraf edək ki, kənar təsirlər olsa da Azərbaycan xalqının böyük əksəriyyətinin dünyəvilik tərəfdarı olması ölkəmizdə dini zəmində qarşıdurmaların, ayrıseçkiliyin təhlükəyə çevrilməsini sıfıra endirir. Azərbaycan Şərqlə Qərb arasında mədəniyyətlər və ideyalar ortaqlığı yaradan, həmrəylik körpüsü funksiyasını yerinə yetirən, bununla həm universal dəyərlərə bağlılığını, həm də tarixi keçmişində xüsusi yer tutmuş və bu gün də qoruyub saxladığı islam dininin ali dəyərlərinə sadiq qaldığını sübut edir.

 

Dini radikalizmlə mübarizə prioritetlərdəndir.

 

Ölkəmizdə sabitliyi, əmin-amanlığı pozmağa yönəlik dini radikalizmə, pozucu çağırışlara qarşı sistemli, ardıcıl və kompleks şəkildə ciddi mübarizə tədbirləri həyata keçirilir.

 

Dünyada güclənməkdə olan dini radikalizmin insanların inanclarından sui-istifadə edilməsi hallarının ölkəmizə nüfuz etməsinin və genişlənməsinin vaxtında qarşısının alınması üçün mühüm işlər görülmüşdür.

 

Belə ki, müvafiq qanunlara, Cinayət və İnzibati Xətalar məcəllələrinə dini ekstremizm və dini radikalizmə qarşı mübarizə tədbirlərinin gücləndirilməsi istiqamətində əlavələr edilmişdir ki, bu da dini ekstremist fəaliyyətə görə cinayət və inzibati məsuliyyəti, həmçinin cəza hədlərini müəyyən edir.

 

Formasından asılı olmayaraq, radikalizmin mahiyyətində dayanan əsas ideya - öz məqsədinə nail olmaq üçün başqalarının hüquqlarını pozmaqdır. Polisin bu nöqteyi-nəzərdən fəaliyyəti də elə sözügedən tendensiyanı mənimsəyən dini kontingentin qanunsuz olaraq irəli sürdükləri məqsədlərin qarşısını almaqdan ibarətdir. Daxili İşlər Nazirliyi tərəfindən əlaqəli orqan və təşkilatlarla birgə keçirilmiş tədbirlər nəticəsində respublikanın dini durumunda sabitlik əldə edilsə də bəzən bu sahədə qanun pozuntularına rast gəlinir. “Dini etiqat azadlığı haqqında” qanunun tələblərini pozan şəxslər barəsində qanunvericiliyə uyğun tənbeh tədbirləri görülür.

 

 

Dini radikalizmə qarşı mübarizədə əsas silah maarifləndirmədir desək yanılmarıq. Bu istiqamətdə dövlət və ictimai qurumlar tərəfindən əməli addımlar atılmış, maarifləndirmə işləri əhəmiyyətli dərəcədə gücləndirilmiş ki, bu da ölkə ictimaiyyəti arasında razılıqla qarşılanır.

 

“Dini radikalizmə və ekstremizmə qarşı mübarizəyə dair” birgə təsdiq edilmiş Tədbirlər Planına əsasən Daxili İşlər Nazirliyi və digər hüquq-mühafizə orqanlarının birgə təşkilatçılığı ilə respublika ərazisində konfranslar təşkil olunur, radikalizm və ekstremizm kimi neqativ meyillərə qarşı qabaqlayıcı tədbirlər görülür, maarifləndirmə işləri aparılır.  

 

Hazırda ölkə ərazisində müxtəlif dinlərə mənsub olan icmalar fəaliyyət göstərir. Onların hər birinə ibadət etmək üçün şərait yaradılıb və təhlükəsizlikləri təmin olunur.

 

Dini radikalizm və ekstremizmə qarşı mübarizədə ailədə aparılan tərbiyə işi və məktəbdə təlim-tərbiyə prosesinin məqsədəuyğun təşkili mühüm əhəmiyyət kəsb edir. Təhsil prosesində milli-dini dəyərlərin elmi-pedaqoji tələblərə uyğun öyrədilməsi böyüməkdə olan nəsilləri tarixi köklərə möhkəm tellərlə bağlayır, onlar milli ruhlu şəxsiyyətlər kimi yetişir, ümummilli birliyin möhkəmləndirilməsində tolerantlığın əhəmiyyətini dərk edirlər.

 

Qeyd etmək yerinə düşər ki, müasir texnologiyalar insanların müxtəlif media vasitələrilə dini məsələlərdə müəyyən qədər məlumat əldə etməsinə geniş imkanlar yaradır. Bəzən gənclərin dinlə bağlı sualları cavablandıracaq ünvanları virtual məkanda axtarmaları onları zərərli təbliğatın qurbanına çevirir. Burada əsas məsələ cəmiyyət üzvlərinin dini məsələlərdə media vasitəsilə sağlam şəkildə maariflənməsidir. Nəticə etibarilə cəmiyyətdə milli kimliyin formalaşmasında olduğu kimi, dini kimliyin formalaşmasında da medianın rolu danılmazdır.

 

Məhz buna görə də bu gün burada müzakirə predmeti olan “Dini radikalizmlə mübarizə və media” mövzusuna hər birimiz daha həssas yanaşmalıyıq. Çünki din və mətbuat cəmiyyət həyatına birbaşa təsir göstərən amillərdir, hətta deyərdim ki, bir-birilə daha çox bağlıdır. Daha dəqiq desək, hər iki elementin açılımı məlumat vermək, maarifləndirməkdir.

 

Etiraf edək ki, günümüzdə İslam aləmi ciddi çağırışlar, öz həllini gözləyən çoxsaylı problemlərlə üz-üzədir və əvvəlki dövrlərdə heç zaman olmadığı qədər daha çox birliyə və həmrəyliyə ehtiyacı vardır. Bu birliyi nümayiş etdirərək sözügedən tendensiya ilə bağlı neqativ hallara qarşı media qurumları da əlaqəli dövlət orqanları ilə birgə çalışmalı, tənzimləyici və maarifləndirici funksiyaları birlikdə yerinə yetirməli və bu sahədə ictimai nəzarətin formalaşdırılmasına öz töhfələrini verməlidirlər. Çünki dini radikalizmlə effektiv mübarizə bu funksiyaların kompleks və sistemli şəkildə istifadəsini tələb edir”.