Moderator.az bildirir ki, bu barədə Oxu.Az-a açıqlamasında Qafqaz Müsəlmanları İdarəsinin (QMİ) sədr müavini, ilahiyyatçı alim Hacı Fuad Nurullah ölkədə iyulun 16-da keçiriləcək Aşura günü ilə bağlı məlumat verib.

 

 

 

"Ruhanilər camaatı maarifləndirirlər. Uzun illər öncə zaman-zaman bəzi başa, belə, sinəyə zəncir vurmaq halları olurdu, bunlar hamısı yığışdırılıb. Qafqaz Müsəlmanları İdarəsi (QMİ) həmişə öz müraciətini xalqa çatdırır. İmam Hüseyn mərasimlərində iştirak edən insanlar bunu bilsinlər ki, ən böyük savablardan biri də Allah yolunda kimsələrə kömək olmaq, dəstək olmaqdır. Bu dəstəkdən ən gözəli də şəhidlərin ruhlarına xatir, istər İmam Hüseyn və Kərbəla şəhidlərinə, istərsə də Vətən şəhidlərinin ruhlarına xatir qanvermə aksiyaları keçirilir.

 

QMİ-nin rəhbərliyi neçə illər bundan qabaq bu təşəbbüsü irəli sürüb və həyata keçirir. Bizim qan banklarımız var, Aşura günü verilən qanlar qan banklarında yığılır. Hətta bu təsdiqləndi ki, 2020-ci ildə Qarabağın azadlığı uğrunda 44 gün aparılan döyüşlərdə yaralanan insanlara gərəkli olan qan ehtiyacları, xüsusilə Aşura günlərində, məhərrəm ayında ehsan edilən, qan banklarında toplanan qanlardan qarşılanıb.

 

Aşuranın və məhərrəm ayının ən böyük fayda və mahiyyəti, əhəmiyyəti ondan ibarətdir ki, insanlar bu aydan bu günlərdən bəhrələnsinlər, mənəviyyatlarını qidalandırsınlar, vətəninə, torpağına, millətinə bağlı olsunlar, bu amallarla tərbiyə alaraq formalaşsınlar. Məhərrəm ayının və Aşuranın mahiyyəti birlik, vəhdət, vətənpərvərlik hissini insanlarda daha da gücləndirməkdir.

 

Çünki İmam Hüseyn haqqın, ədalətin carçısı olub. Azərbaycan xalqı illərlə, əsrlərlə bu məktəbi tanıyır. İmam Hüseynin qarşısında 680-ci ildə Kərbəlada şəhid olanlardan biri də - Müslüm azərbaycanlı olub. XV əsrdə yaşamış Füzuli ustadımız, eləcə də həmin dövrdə tarixdə Kərbəla hadisələri ilə bağlı nə qədər yazılar, mənbələr, ədəbiyyatlar var. Hamıya məlumdur ki, 680-ci ildə orada şəhid olanlardan birinin adı Müslüm Azərbaycanlı olub.

 

İmam Hüseyn təkcə müsəlmanların tanıdığı şəxsiyyət deyil, dünya İmam Hüseyni tanıyır. Dünyanın azadlıq sevən insanları İmam Hüseynin getdiyi yolu təhlil edir, analiz edir, öyrənir və öz millətinə də bunu öyrədir. Hətta tarixdə var. Hindistanın mənəvi atası Mahatma Qandi öz xalqına müraciətində deyir:

 

"Ey hind xalqı, bu azadlıq yolunda atdığımız addımları, bu mübarizəmizi mən Əli oğlu Hüseyndən öyrəndim. Hüseyn məktəbindən öyrəndim, amma onu hələ layiqincə öyrənə bilmədim".

 

Həqiqətən də İmam Hüseyn dünya üçün, insan üçün böyük məktəbdir. O bu gün də yaşayır, sabah da yaşayacaq. Quranda deyilir şəhidlər ölməzdir, insanlıq nə qədər varsa, onlar yaşayırlar, Allah süfrəsindən ruzi ilə bəhrələnirlər".

 

 

"Əlimizdə olan təqvimə görə, Aşura günü iyul ayının 16-na təsadüf edir, lakin belə bir deyim var ki, "hər gün Aşura, hər yer Kərbəla". İndi kim iyulun 15-də keçirir, kimi 16-da, 17-də keçirir - azaddır. Bu vacibi məsələ deyil. Əsas məqsəd o tarixin yad edilməsi və insanların bu əzəmətli gündən bəhrələnməsidir. Aşura günü Nuh peyğəmbərin, Yusif peyğəmbərin, Musa peyğəmbərin, bir çox peyğəmbərlərin tarixindən həmin günlə bağlı müxtəlif tarixi hadisələr danışılır. Yəni insanlıq tarixində Aşura günü məşhur gündür. Ərəbcə Aşura 10 deməkdir. Məhərrəm ayı İslam təqvimində birinci aydır, Aşura onun 10-cu günüdür. 680-ci ildə peyğəmbərin nəvəsi İmam Hüseynə qarşı sui-qəsd olundu. Onun özünə və ailəsinə qarşı törədilən soyqırımı insanlıq tarixində unudulmur, öyrənilir, araşdırılır. İnsanlara da bununla bağlı məlumatlar verilir ki, dünya insanları ədalət üçün, haqq üçün həmişə mübariz olsunlar. Heç vaxt əzilməsinlər, ayaq altında qalmasınlar. Azərbaycan xalqı da bundan bəhrələnib. İmam Hüseyn məktəbini tanıyan xalq heç vaxt torpaqlarını işğalda qoymaz. Elə də oldu və biz torpaqlarımızı da, bayrağımızı da uca tutduq. Ali Baş Komandanın əmri ilə, xalqımızın igid oğulları bu amal uğrunda canlarını fəda etdilər, şəhid oldular, əbədiyyətə qoşdular, torpaqlarını azad elədilər.

 

Ona görə də biz məhərrəm ayında şənlik eləmirik, onu təxirə salırıq. Kərbəla şəhidləri, Vətən şəhidləri yad edilir. Bizim tariximizdə nə qədər əlamətdar günlər var ki, o günləri ehtiramla yad edirik. Amma insanlar bəzən anlaşılmazlığa yol verirlər. Toy etmək və evlənmək fərqli anlayışlardır. Bir adam evlənmək istəyirsə, kəbin kəsdirib ailə sahibi ola bilər. İstənilən ayda, istənilən gündə, hətta Aşura günündə də kəbin kəsdirmək olar. Amma qaldı ki, toy, şənlik, bunu etmək olmaz. Biz səfər ayını da gözləyirik. İmam Hüseyn şəhidlərinin qırxı bu ayda çıxır. Məhərrəm ayından sonra gələn səfər ayında peyğəmbər, imamlarımız vəfat ediblər. Biz həmin bu iki ayı, yəni məhərrəm və səfər aylarını onların xatirəsinə hörmətlə matəm saxlayırıq".