Moderator.az xəbər verir ki, Qafqaz İslam Ordusunun Azərbaycana gəlişinin 96-cı ildönümü münasibəti ilə Gəncə şəhərində möhtəşəm tədbir keçirib.

 Tədbir “Aşıq Şəmşir Mədəniyyət Ocağı” İctimai Birliyinin,Diasporla iş üzrə Dövlət Komitəsinin,Türdilli Xalqların Əməkdaşlıq Mərkəzinin və İstanbul-Türkiyə-Azərbaycan Dostluq Dərnəyinin təşkilatçılığı ilə baş tutub. Azərbaycan-Türkiyə qardaşlığına həsr olunan tədbir iki hissədən ibarət olub.Belə ki İstanbul-Türkiyə-Azərbaycan Dostluq Dərnəyinin sədri Səfər Karaqoyunlunun rəhbərlik etdiyi nümayəndə heyəti ilk olaraq Kəlbəcər rayon icra hakimiyyətinin başçısı Aqil Məmmədovla görüşüblər.Sonra Kəlbəcər rayon Mədəniyyət evində türkiyəli qonaqların  iştirakı ilə ədəbi-bədii gecə təşkil olunub.Mərasimi giriş sözü ilə açan Kəlbəcər rayon icra hakimiyyətinin başçısı Aqil Məmmədov qonaqları salamlayıb və onların kəlbəcərlilərlə görüşünü çox mühüm hadisə kimi qiymətləndirib.O həmçinin Nuru Paşanın rəhbərlik etdiyi Qafqaz İslam Ordusunun Azərbaycana gəlişindən danışaraq bildirib ki,15 sentyabrda Bakının rus-daşanak hərbi birləşməsindən azad olunması müstəqilliyimiz üçün mühüm tarixi şərait yaradıb.O cümlədən  Qafqaz İslam Ordusu Azərbaycan-Türkiyə hərbi əməkdaşlığının təməlini qoyub. Sonra “Aşıq Şəmşir Mədəniyyət Ocağı” İctimai Birliyinin sədri Qənbər Qurbanov çıxış edib.O bildirib ki, 1918-ci ildə Azərbaycan xalqının erməni daşnakları tərəfindən soyqırıma məruz qaldığı bir vaxtda Nuru Paşanın komandanlığı altında Azərbaycana köməyə gələn  Qafqaz İslam Ordusunun şücayəti tariximizə qızıl hərflərlə yazılıb.Ermənilərin tarxi boyu Azərbaycana qarşı apardığı soyqırım siyasətini xüsusi vurğulayan natiq torpaqlarımızın 20 faizinin hələ də işğal altında olduğunu,erməni terrorunun davam etdiyini deyib.Qeyd olunub ki,hazırkı Azərbaycan-Türkiyə münasibətləri hər iki ölkənin liderləri tərəfindən çox yüksək səviyyədə qurulub və inkişaf etdirilməkdədir.

İstanbul-Türkiyə-Azərbaycan Dərnəyinin sədri Səfər Karaqoyunlu isə çıxışı zamanı burda olmaqdan məmnunluğunu ifadə edib.Türkiyəli qonaq bildirib ki, İstanbul-Türkiyə-Azərbaycan Dərnəyi 2011-ci ildə Ulu öndər  Heydər Əliyevin “Bir millət,iki dövlət” şüarı əsasında qurulub.Dərnək fəaliyyəti dövründə Azərbaycanın tarixi-mədəni irsini öyrənməklə yanaşı, Azərbaycannın  həm Türkiyə,həm də dünya dövlətləri ilə  mədəni əlaqələrinin güclənməsinə öz töhfəsini verməyə çalışıb.Və son 25 ildə mənfur ermənilərin qardaş Azərbaycanın başına gətirdiyi faciələri dünyaya çatdırmaq istiqamətində addımlar atıb. İstanbul-Türkiyə-Azərbaycan Dərnəyinin üzvü əslən azərbaycanlı Bahəddin bəyin göz yaşları içindəki çıxışı isə hər kəsdə duyğulu anlar yaşadıb.

 Türkiyə Respublikasının Gəncəyə yeni təyin olunan Baş konsulu Orhan İşık fəaliyyətinin ilk gününün belə bir möhtəşəm tədbirlə başladığını gələcək uğurlarının təməli hesab edib. “Aşıq Şəmşir Mədəniyyət Ocağı” İctimai Birliyinin genişmiqyaslı layihələrindən məlumatlı olduğunu deyən diplomat,görkəmli el sənətkarı,Azərbaycan Aşıq poeziyasının parlaq simalarından olan Aşıq Şəmşirinin yaradıcılığını yüksək qiymətləndirib. Türkiyə-Azərbaycan qardaşlığının bundan sonra da ən yüksək səviyyədə olacağına əminliyini ifadə edib.

 Sonra mərasim el sənətkarlarının,musiqi qruplarının rəngarəng çıxışları ilə davam edib.Əməkdar mədəniyyət işçisi,tanınmış aşıq Ədalət Dəlidağlının biri-birindən gözəl saz ifaları və folklor nümunəsi olan “Maral oyunu” türkiyəli qonaqların böyük marağına səbəb olub.

 Qeyd edək ki, səfər proqramı çərçivəsində Türkiyədən gələn nümayəndə heyəti Gəncənin tarixi yerlərini,Nizami məqbərəsini,Qala qapısını,Göygöl rayonundakı Aşıq Şəmşirin abidəsini ziyarət ediblər.

  Xatırladaq ki, Türkiyə-Azərbaycan Dərnəyinin üzvləri həftə ərzində Bakı,Quba,Salyanda keçiriləcək tədbirlərdə iştirak etməklə yanaşı,Şamaxıdakı Türk şəhidlərinin,Qubadakı Soyqırım abidəsini və məzarlığı ziyarət edəcəklər.Bununla da onlar Azərbaycan-Türkiyə qardaşlığını və birliyini bir daha dünyaya bəyan edəcəklər.