“İfam bitəndən sonra Heydər Əliyevin köməkçisi gəlib məni onun yanına apardı. Səhv etmirəmsə, Pakistanın dövlət başçısı da onun qonağı idi. Mən də orda əyləşdim və təsəvvür edin ki, prezidentlərin biri sağımda, biri isə solumda əyləşmişdi. Bu mənim üçün unudulmaz bir xatirədir”

 

Bunu Moderator.az-a açıqlamasında Xalq artisti Gülyanaq Məmmədova ulu öndər Heydər Əliyevlə bağlı xatirələrini bölüşərkən deyib:

“Ulu öndərimiz Heydər Əliyev haqqında danışmaq mənim üçün xoşdu, bundan şərəf duyuram. Çünki onunla bağlı çox şirin, əziz xatirələrim var. Mən 1993-cü ildən peşəkar səhnədə fəaliyyətə başlamışam. Həmin illərdə Rəşid Behbudov adına Mahnı Teatrında çalışmışam. Rəşid Behbudov da ulu öndərimizin ən çox sevdiyi sənətkarlardan olub, ifalarına çox böyük dəyər verib. Mən bu günə qədər də həmin teatrda çalışıram və şərəf duyuram. Rəşid Behbudov sənəti də mənə çox şeylər öyrədib. Səhnədə fəaliyyətimi davam etdirərkən Polad müəllim (Polad Bülbüloğlu) öncə öz yubileyinə məni dəvət etdi, sonra da ulu öndərimizin qarşısında çıxış etməyim üçün şərait yaratdı. Ustadım Kamil müəllim mənə Ramiz Mirişlinin sözləri Fikrət Qocanın olan “Bəri bax” mahnısını hazırladı və 1995-ci illərdə Gülüstan sarayında ilk dəfə çıxış etdim. İfam bitəndən sonra Heydər Əliyevin köməkçisi gəlib məni onun yanına apardı. Səhv etmirəmsə, Pakistanın dövlət başçısı da onun qonağı idi. Mən də orda əyləşdim və təsəvvür edin ki, prezidentlərin biri sağımda, biri isə solumda əyləşmişdi. Bu mənim üçün unudulmaz bir xatirədir. Heydər Əliyev orda mənə xeyir-dua verdi, harda çalışdığımı soruşdu. Rəşid Behbudov adına Mahnı Teatrında işlədiyimi eşidəndə dedi ki, “çox gözəl bir teatrda işləyirsən, çalış bu ada həmişə layiq ol”. 

 

Ondan sonra mütəmadi olaraq bütün tədbirlərində hər zaman məni görmək arzusunda oldu. 1996-97-ci illərdə Gülüstan sarayında “Heyratı” muğamı ilə Gülyaz xanımla birlikdə çıxış etdik. Orda bizə yaxınlaşıb dedi ki, “bunlar cüt imişlər”. Ondan sonra tapşırdı ki, bu cüt bacılar həmişə mənim tədbirlərimdə olsunlar. Gülüstan, Heydər Əliyev Sarayında, onun ev məclislərində, qastrol səfərlərində çıxış etmişik. Heydər Əliyev adına Sarayda Rəşid Behbudovun yubiley gecəsində çox böyük sənətkarlar ora dəvət almışdı. Onların içində ən gənci isə biz idik. Orda yenə ulu öndərimiz bizi təriflədi. Hər zaman ailə məclislərində çıxışım olub və bir dəfə ifamdan sonra yaxınlaşıb dedi ki, “mənim üçün “Arzu qızım” mahnısını oxu”. Mən o mahnını oxudum və indiyə kimi ulu öndərin gözəl bir rəqsi gözümün önündədir. Biz onunla qastrol səfərlərində çıxış etmişik. 

 

Bakımızın gözəl məkanlarından birində ulu öndərin bir xüsusi həkim qonağı var idi. Yenə orda ifa edirdim. Ustadım Kamil müəllim dedi ki, “Alagöz” mahnısını oxu, çünki bunu o, çox sevirdi. Mən “Alagöz” mahnısını oxudum və sonda məni yanına çağırıb o, əllərimdən tutub, mahnını əvvəldən-sona qədər ifa etdi. Hər konsertin sonunda gözləyirdik ki, o, bizə yaxınlaşıb xeyir-dua verəcək. Onun qaməti, şux yerişi, sadəliyi, səmimiyyətini gördüyümüz üçün çox xoşbəxtdik. Biz çox xoşbəxtdik ki, məhz ulu öndərimizin sərəncamıyla 1998-ci ildə Əməkdar artist fəxri adına layiq görüldük və onun layiqli davamçısı cənab prezidentimizin sərəncamı ilə isə 2014-cü ildə Xalq artisti fəxri adına layiq görüldük. Biz buna görə çox xoşbəxtik. Bütün ailəmizlə ona minnətdarıq, ruhu qarşısında baş əyirik. Hörmətli cənab prezidentimizə minnətdarıq. Mehriban xanım Əliyeva hər zaman muğamımıza dəstək olub. Hər zaman dövlət başçımızın və onun xanımının bizə olan qayğısı göz önündədir, onlardan çox razıyıq”.