Pandemiya səbəbindən toylarsız qaldığı üçün ölkəni tərk edən sənətçilərin sayı hər ötən gün artır. Sənətçilərimiz əsasən qonşu Rusiyaya üz tuturlar. Onların arasında artıq qərib ölkədə biznes quranları da var.

 

Onlardan bir neçəsini təqdim edirik.

 

Nadir Qafarzadə. Ötən gün müğənni Nadir Qafarzadə də, ölkəni tərk etdiyini açıqlayıb. Müğənni Müğənni getdiyin ölkənin adını açıqlamasa bununla bağlı sosial şəbəkədəki paylaşımında Rusiyanın bayrağını qeyd edib. Nadir Qafarzadə ölkəni birdəfəlik və ya qısa müddətliyinə tərk edəcəyini zamanın axarına buraxdığını deyib.

 

Könül Kərimova. Əməkdar artist Könül Kərimova artıq uzun zamandır ki, Rusiyaya köçüb. Oğlu ilə birlikdə yaşayan müğənni artıq Moskvada öz biznesini də açıb. Belə ki, sənətçi bir müddət əvvəl sosial şəbəkədə Rusiya toy bazarına daxil olmaq üçün xına evini açdığını bildirmişdi. Onun sözlərinə görə dəvət olunduğu məclislərinin həm təşkilatçısı, aparıcısı, həm də ifaçısı kimi iştirak edəcək. Həmçinin Kərimova toyların dekorasiyası ilə məşğul olacaq. İfaçı paylaşımında ilk dəfə milli adət-ənənələri yaşadacaq bir biznes qurduğunu qeyd etmişdi.

 

Mətanət İskəndərli. Əməkdar artist Mətanət İskəndərli də bir müddət əvvəl oğlu ilə birlikdə Rusiyaya köçüb. "Hələ bir müddət Rusiyada qalmağı düşündüyünü" bildirən sənətçi oğlu ilə birlikdə toy məclislərinin birində koronavirusa yoluxub. Reanimasiyaya yerləşdirilən müğənninin vəziyyətinin ağır olduğu bildirilirdi. Qeyd edək ki, sənətçi Rusiyada aktiv yaradıcılıqla məşğul olmağı planlaşdırırdı. Belə ki, may ayının 14-də Sankt-Peterburq şəhərində sənətçinin “Azərbaycan musiqilərinin gecəsi” adlı konsert proqramı ilə çıxış edəcəyi gözlənilirdi.

 

Damla. Müğənni Damla pandemiya dövründə qazanc dalınca Rusiyaya üz tutan ilk müğənnilərdən biridir.

 

Elçin Hüseynov. Müğənni Elçin Hüseynov da bu günlərdə Rusiyaya köçmək qərarına gəldiyini bildirib. Onun sözlərinə görə "Niel" adlı ansambl yaradıb və toy təşkilatçılığı ilə məşğuldur. İfaçı Moskvada evi olduğunu və ailəsi ilə uzun müddət orada qalacağını deyib.

 

Kərim Abbasov. Müğənni Kərim Abbasov isə aprel ayının əvvəlində Rusiyaya üz tutub. Müğənni bununla bağlı sosial şəbəkədə qeyd etdmişdi: "Getməyə məcburam, məni bağışlayın".

 

Rəqsanə. Müğənni Rəqsanə isə uzun müddətdir ki, Rudiyada yaşayır. Müğənni ara-sıra qazanc dalınca Rusiyaya üz tutan həmkarlarını tənqid atəşinə tutur.

 

Fədayə Laçın. Müğənni Fədayə Laçın da pandemiya dövründə Rusiyaya üz tutan ilk sənətçilərdəndir. Müğənni son günlər fərqli fotoları ilə diqqət çəkir.

 

Pərvin Səfərov. Çoban ifaçı kimi məşhurlaşan müğənni Pərvin Səfərov da artıq aylardır ki, Rusiyada yaşayır. Müğənni açıqlamasında Rusiyaya gəzmək üçün gəldiyini, lakin sonradan toy dəvətləri aldığı üçün qərib ölkədə qalmaq qərarına gəldiyini deyib.

 

Sərxan Kərəmoğlu. Sənətçi Sərxan Kərəmoğlu isə mart ayından Rusiyaya köçüb. O, bir neçə müğənnini ətrafına yığaraq, toy məclisləri aparır.

 

Çingiz Mustafayev. Müğənni Çingiz Mustafayev də artıq bir neçə gündür ki, Rusiyaya köçüb. Müğənninin açıqlamasına görə buna səbəb musiqi janrının dəyişməsi olub:

"İki variant var idi: bir Bali, bir də Moskva. Hər iki yerdə dostlarım var, orada yaşamağa gedirdim. Düşündüm ki, hələ Bali tezdir. Mənim üçün ağır qərar idi. Düzdür, Amerikada, başqa yerdə yaşamışam. Amma ilk dəfə bu cür böyük yüklə gedirdim. 8 baqajım var idi. Daxilimdə baş verən savaş, məni bu musiqi tərzinə gətirdi. Məni dinləyənlər, dəyər verənlər başa düşməyəcək ki, niyə dəyişdim. İki il əvvəl bu musiqini, onu dinləyənləri başa düşmürdüm. Kommersiyadan çox uzaq layihədir. Amma dünyada dinləyiciləri var. İki-üç ay sonra elektron musiqi üzrə səhnəyə çıxacam".(musavat.com)