Belarus Respublikasının Prezidenti Aleksandr Lukaşenko Azərbaycana səfəri zamanı mühüm mesajlar verdi. Azərbaycan və Belarus prezidentlərinin mətbuata bəyanatlarla çıxışında Aleksandr Lukaşenko hərbi əməkdaşlığın daha da dərinləşdiriləcəyinə işarə edərək dedi: “Hərbi-sənaye kompleksinə gəldikdə isə Belarusun keçmiş müdafiə naziri, indiki səfir buradadır. O, sərhədlərdən başlamış ta bizim istehsal etdiyimiz müasir vasitələrə qədər hər şeyi bilir. O, istənilən məsələni həll edə bilər və nazirlər də eşitdilər, səfirin istənilən tələbi hərbi-sənaye kompleksi sahəsində reallaşdırılacaq, bizim bacardığımız və Azərbaycandakı dostlarımıza lazım olan bütün istiqamətlər üzrə”.

 

Nəzərə alsaq ki, Belarus Kollektiv Təhlükəsizlik Müqaviləsi Təşkilatının üzvüdür Aleksandr Lukaşenkonun hərbi-sənaye kompleksimizin daha da inkişaf etdirilməsi üçün Azərbaycana lazımi dəstək verilməsi ilə bağlı tapşırığı çox mühüm əhəmiyyət daşıyır. Bu, ölkəmizin yaxın vaxtlarda Belarusdan müasir hərbi texnika və silah-sursat alacağının anonsu da sayıla bilər.

Mövzu ilə Moderator.az-a açıqlama verən politoloq Tofiq Abbasov bildirib ki, Belarus Azərbaycanın strateji tərəfdaşıdır: “Strateji tərəfdaşlıq uzunmüddətli və yüksələn xətt üzrə inkişaf edən münasibətləri özündə ehtiva edir.  Bu baxımdan Azərbaycan-Belarus münasibətləri məhz bu konfiqurasiyaya uyğundur. Azərbaycanla Belarus arasındakı münasibətlərə qısqanclıqla yanaşan dövlətlər vardır. Təəssüf ki, bu, tək Ermənistan deyil. Başqa dövlətlər də vardır ki, onlar bizim yaxınlığımızı həzm edə bilmirlər. Bizim Belarusla münasibətlərimizin inkişafı hansısa dövlətin marağına zidd deyil. Kimsə bundan narahat olursa, bu, onların öz daxili problemidir. Azərbaycan və Belarus çoxsaylı layihələrlə bir-birinə bağlanıb. Bütün bunları təhlil edəndə görürük ki, bu, həqiqətən də strateji tərəfdaşlıq anlamına gələn münasibətlərdir. Bizim strateji tərəfdaşlığımızın gələcəyi ilə bağlı heç bir şübhə ola bilməz. Yadınızdadırsa, Azərbaycan Belarusdan “Polonez” raket sistemlərini alanda bəzi ölkələr hay-küy saldılar. Onların cərgəsində Ermənistan da var idi. Ancaq nəyi qəbul edib nəyi qəbul etməmək Ermənistanın öz işidir”.

 

“Azərbaycanla Belarusun hərbi-siyasi sahədə olan uğurları böyük nikbinlik yaradır”, deyən politoloq vurğulayıb ki, həm Azərbaycanın, həm də Belarusun milli zəmində olan prioritetləri vardır. Qarşıya qoyulmuş hədəflərə çatmaq üçün dostlarımızın, yaxın tərəfdaşlarımızın imkanlarından istifadə edirik. 

 

Tofiq Abbasovun sözlərinə görə hələ Aprel döyüşlərində Ermənistanda böyük bir qalmaqal yaşanıb: “O vaxt deyirdilər ki, Belarus Azərbaycana niyə silah satır?  Bəzi dövlətlər isə İlham Əliyevlə Aleksandr Lukaşenkonun münasibətlərinin sağlam təməllər üzərində qurulduğunu bildirirdilər. Ancaq deyirdilər ki, onlar gərək başqa ölkələrin də gözləntilərinə, yanaşmalarına fikir versinlər. Biz heç bir yanaşmaya fikir verən deyilik. Əgər iki dövləti və xalqı birləşdirən ümumi qayələr varsa, onlar ətrafında çalışmaq lazımdır. Biz neçə illər idi ki, xarici təcavüzdən əziyyət çəkirdik. Bədnam qonşumuz ərazilərimizi işğal etmişdi. Bəzi ölkələri çıxmaqla heç bir dövlət işğal faktına son qoyulması üçün prinsipial yanaşma sərgiləmirdi. Belarus o dövlətlərdəndir ki, bu barədə də öz mövqeyini bildirmişdi. Bütün bunlar onu göstərir ki, Belarus Azərbaycan xalqının dostudur. Mənə elə gəlir ki, bizim münasibətlərimizdə hər şey aydındır, örtülü heç nə yoxdur”. 

 

Belarusun Kollektiv Təhlükəsizlik Müqaviləsi Təşkilatının üzvü olmasının hərbi sahədə əməkdaşlığımızın dərinləşdirilməsinə təsiri barədə də danışan politoloq deyib ki, Belarus müstəqil dövlətdir. Ona heç kim irad tuta bilməz ki, niyə KTMT-nin üzvü ola-ola Azərbaycana dəstək göstərir. Bu, rəsmi Minskin özünün seçimidir.